Dilongolola malu a mpetu didi mua kufila ditalala pa buloba anyi?

TSHIDI TSHISAKA BAMUE BUA KUITABA BUALU EBU

Badi bela meji ne: matunga owu apanyishangana bintu bikole, kaena mua kuluishangana to. Tshilejilu, matunga adi enza Nsangilu wa matunga a ku Mputu (Union européenne) akalongolola bua ikale apanyishangana bintu mu mushindu mupepele. Biakenza bua bikale bambuluishangana. Dipetangana dia matunga aa diakaapetesha ditalala dia bungi nansha muvuawu aluishangana bikole kumpala.

Bakokeshi ba mu Afrike badi bela pabu meji ne: bantu bobu ne makuta a bungi nebasombe mu ditalala; ne badi bamba mudibu mua kuambuluisha bantu bua kupeta ditalala ne makuta a bungi. Cyril Ramaphosa, mfumu wa ditunga dia Afrique du Sud, wakamba ne: ‘Tudi tuenza muetu muonso bua matunga ikale apanyishangana bintu kakuyi lutatu, bajadike ne: nebiambuluishe benamu bua kuikala ne nsombelu muimpe. Kupeta bubanji bua bungi ke bualu bunene budi mua kupetesha bantu ditalala.’

Badi bela meji ne: mbulamatadi yoyi itula makuta a bungi bua kupangisha mvita bua kayenzeki, bantu nebikale ne ditalala. Buabu bobu, mbulamatadi ne malongolodi makuabu biobi bipeshe matunga adi ne ntatu idi mua kukebesha ndululu makuta, nebiambuluishe bua kukebela bantu midimu ya kuenza ne nsombelu muimpe. Nebikepeshe malu atu akebesha mvita bu mudi bupele, kudimona bashadile kudi bakuabu, ne dibenga kupesha bansonga mpunga ya kuenza imue midimu.

Badi bela meji ne: bantu bobu ne midimu ya bungi ya kuenza, nekuikale ditalala. Tshilejilu, bamue bantu badi bela meji ne: bakokeshi bobu bakebele bansonga midimu ya kuenza, kabakudibuinka mu buenzavi ne kabakubatombokela to. Bena ku banke kampanda wa mu Afrike badi bamba pabu ne: mbimpe banke mikuabu yeleshangane diboko ne malongolodi adi adienzeja bua kufila ditalala ne kuambuluisha bantu.

BUALU BUA KUELELA MEJI

Amue matunga a pa buloba bujima mmambuluishe matunga mapele ne makuta a bungi bidimu bishale ebi.

• Biobi ne: makuta adi mua kufila ditalala, bua tshinyi kutshidi anu mvita ya bungi pa buloba?

• Matunga owu ne makuta a bungi, nebijikijaku bimvundu bidi mu bitendelelu, diditambisha bua tshisa, ne dipanga kupetangana pankatshi pa mbulamatadi ne bantu badiyi ikokesha anyi?

  

  Kuinshi: Kevin Frayer/Getty Images

  Nansha bantu bobu ne makuta a bungi ne midimu mimpe, kabakulekela lukuka to

TSHIDI BIBLE WAMBA

Mu mvese eu mudi bualu bua mushinga ebu: dinanga dia makuta ne lukuka bidi bifikisha muntu ku dienza malu mabi. Bantu batu badisuike anu bua kulua babanji, batu pa tshibidilu bangata mapangadika atu alua kubanyingalaja anyi anyingalaja bantu bakuabu.​—Muambi 5:10.

Lukuka ke lutu lukebesha mvita ya bungi. Matunga atu aluishangana afuila bintu bu mudi: mâyi, kasolonyi, anyi bitupa bia maloba bidi ne bubanji bua bungi. Bua matunga a bungi, kupeta bubanji kudi ne mushinga wa bungi kupita kuambuluisha bantu. Amue matunga adi endela makuabu mushinga pambidi, ne bidi bikebesha bilumbu pankatshi pawu. Nansha matunga adi ne bukole bua bungi adi mua kutula makuta adiwu nawu bua kumuenena adi kaayi ne bukole, bienza bua ditalala kadikadiku pa buloba to.

Nansha bantu bobu ne makuta a bungi ne midimu mimpe, kabakulekela lukuka to. Mvita kayakujika bualu bantu badi ne makuta a bungi to. Kadi Bible udi uleja ne: anu bantu badi bateleja Nzambi ne benza tshidiye musue ke bapeta ditalala. (Mika 4:2, 3) Bantu abu nebashintulule lungenyi luabu. Nebakine mvita ne tshikisu. Nebalonge mua kusomba mu ditalala ne bakuabu pamutu pa kubaluisha.​—Lomo 12:18.