Kandamena mateyi a Satana, weyemene Yehowa ne Yezu

1. Mmayele Kayi adi Satana wenza nawu mudimu bua kutufikisha ku dilekela kuenzela Yehowa mudimu?

KATSHIA anu dîba dituvua bangate dipangadika dia kuenzela Yehowa mudimu, tudi balue baluishi ba dikema ba Satana ne bademon bende. Satana mmumanye ne: tuetu bashale balamate Yehowa kakutupangisha bua kumuenzela mudimu to. Udi wenza muende muonso bua tulekele kuenzela Yehowa mudimu bua Yehowa katuambuluishi to. Umue mushindu udiye wenza nanku, mpadiye utufikisha ku diela meji ne: Yehowa ne Yezu ki mbatunange ne kabena batutabalela to.​—2 Kol. 11:14; Yak. 1:6.

2. Bua tshinyi bidi ne mushinga bua tuetu kueyemena Yehowa ne Yezu Kristo?

² Padi basalayi muaba udi mvita itua ipela, badi ne bua kueyemena bamfumu babu bikole. Bobu kabayi benze nanku, kabena pamuapa mua kubatumikila kabidi to. Dîba adi nebibakebele njiwu mibi mitambe, anyi mene badi mua kubashipa. Bia muomumue, tuetu petu tudi basalayi badi baluangana mvita ya mu nyuma ne “bisumbu bia nyuma mibi.” (Ef. 6:12) Satana Diabolo mmumanye ne: tuetu balekele kueyemena Yehowa Nzambi ne Yezu Kristo, katuakulonda buludiki buabu to. Nunku, udi wenza muende muonso bua kutekesha ditabuja dietu kudibu. Mu tshiena-bualu etshi, netumone muvuaye muenze mudimu ne mayele aa kale ne mudiye utungunuka ne kuenza nawu mudimu lelu. Pashishe, netumone tshitudi mua kuenza bua kukandamena mayele ende aa. Mu tshiena-bualu tshialonda, netumone mayele makuabu abidi adi Satana utuluisha nawu mu mvita yetu ya mu nyuma.a

SATANA UDI USHIMINYINA YEHOWA NE YEZU MALU

3. Mmunyi muvua Satana mufikishe Eva ku dibenga kueyemena Yehowa?

³ Pavua Yehowa mufuke Adama ne Eva, Satana uvua musue bua ne: kabamutumikidi to. Wakafikisha Eva ku ditaba ne: Mufuki wende kavua umutabalela bimpe menemene to. Kumuebejaye ne: “Nzambi uvua muambe bulelela ne: kanuena ne bua kudia mitshi yonso idi mu budimi ebu anyi?” (Gen. 3:1-5) Satana wakafikisha Eva ku ditaba ne: Yehowa uvua ubelela yeye ne bayende mikalu ivua kayiyi ne mutu. Bia dibungama, Eva wakateleja Satana, Adama kulua kuenza pende bia muomumue. Bakela Yehowa uvua mubapeshe bintu bionso bivuabu nabi nyima.​—Gen. 3:6.

4. Mmunyi muvua Satana mushiminyine Yehowa malu tshikondo tshia Yobo?

⁴ Katshia anu ku tshikondo tshia Adama ne Eva, Satana mmutungunuke ne kushiminyina Yehowa malu. Tshilejilu, wakasaka balunda babi ba Yobo bua kumufikisha ku diela meji ne: Yehowa kavua mumunange ne kavua wangata lulamatu luende ne mushinga to. (Yobo 22:1-3) Diabolo wakela meji ne: Yobo yeye mupete makenga a bungi, neele Yehowa nyima. Nansha muvua Yobo ukenga bua mateyi a Satana, wakashala anu ne lulamatu kudi Yehowa ne kavua munyange bulunda buende nende to.​—Yobo 27:1, 5.

5. Ntshinyi tshivua Satana muenze bua bantu kabalondi Yezu? (Matayi 11:19)

⁵ Pavua Yezu mulue pa buloba bidimu nkama ya bungi pashishe, Satana wakadienzeja bua kupangisha bantu bua kumulonda. Umue mushindu uvuaye mufike ku dienza nanku, mpavuaye usaka bamfumu ba ntendelelu bavua ne lukinu ne bantu bakuabu bua kumuangalajila Yezu malu a dishima. Ndekelu wa bionso bakalua kumushipa anu bu muenzavi.​—Bala Matayi 11:19; 27:27-31; Mâko 14:55, 56; Yone 8:41-45.

6-7. Mmushindu kayi uvua Satana muluishe bayidi ba Yezu?

⁶ Yezu mumane kufua, Satana wakatuma meji ku mudimu uvua bayidi ba Yezu benza. Tshia kumpala, wakasaka bantu bua kabitabi ne: Yezu uvua mubishibue ku lufu. Satana wakasaka bantu bua kumuangalaja lumu lua dishima ne: bayidi ba Yezu bavua bibe tshitalu tshia Yezu. (Mat. 28:11-15) Mu matuku a kalonda, Satana wakasaka kabidi bamfumu ba ntendelelu ne ba tshididi bua kukengesha bayidi ba Yezu. Wakenza bua bayidi ba Yezu bamone ne: mudimu uvua Yezu mubapeshe mmukole ne kabavua mua kukumbana bua kuwenza to.​—Bien. 7:57–8:1; 12:1-3; 28:22.

⁷ Nansha muvua bamue bena Kristo bafike ku dilekela kuenzela Yehowa mudimu, bakuabu bakashala bashindame, batungunuke anu ne kuyisha. Bakajingulula ne: Satana ne bademon bende ke bavua babaluisha. (Bien. 4:18-20; 1 Pet. 5:8) Kadi netuambe tshinyi bua lelu? Mmayele kayi adi Satana wenza nawu mudimu bua kutufikisha ku dilekela kuenzela Yehowa mudimu?

SATANA UDI UTUNGUNUKA NE KUSHIMINYINA YEHOWA NE YEZU MALU

8. Mmunyi mudi Satana ukuata mudimu ne bitendelelu bia dishima bua kumuangalajila Yehowa ne Yezu malu a dishima?

⁸ Dimue dia ku mayele manene adi Satana ukuata nawu mudimu lelu eu ndia kupangisha bantu bua kumanya Yehowa ne Yezu. Bu mudi Diabolo “tatu wa dishima,” udi ubamuangalajila malu a dishima kudiambuluisha dia bitendelelu bia dishima. (Yone 8:44) Kudiambuluisha diabi mmufofomije meji a bantu bua kabamanyi Yehowa ne Muanende bimpe to. (2 Kol. 4:3, 4) Tshilejilu, mu bitendelelu bia bukua buena Kristo batu balongesha bantu ne: Tatu ne Muana mmuntu umue. Ke bualu kayi bantu ki mbamanye ne: dîna dia Nzambi nYehowa to; ne pamutu pa kumutendelela yeye badi batendelela Yezu. Ntendelelu wa mushindu eu katu usankisha Yehowa ne Yezu to. (Mat. 4:10; Yone 4:23) Ba bungi ba kudibu batu bitaba ne: bidibu babalongeshe abi mbilelela. Ke bualu kayi batu babenga bua kututeleja patudi tujinga kubaleja bulelela, ne misangu mikuabu batu baluisha mudimu wetu wa kuyisha.

9. Mmunyi mudi Satana ukuata mudimu ne bitendelelu bia dishima bua kupangisha bantu bua kumanya Yehowa? (Yelemiya 23:26, 27)

⁹ Tuetu basue kudia bulunda ne muntu, mbimpe tumanye dîna diende. Bible udi wamba ne: tuetu bamanye dîna dia Yehowa ne bamueyemene, neatukube. (Nsu. 18:10) Kadi Satana ki mmusue bua bantu bamanye dîna dia Yehowa ne balue balunda bende to. Kukadi bidimu bia bungi bidiye ukuata mudimu ne bitendelelu bia dishima bua kupangisha bantu bua kumanya dîna dia Yehowa. (Bala Yelemiya 23:26, 27.) Tshilejilu, mmusake bakudimunyi ba bungi ba Bible bua kumbusha dîna dia Nzambi mu nkudimuinu yabu. Diabolo mmusake kabidi bitendelelu bia dishima bua kulongesha bantu ne: Nzambi ke utu ukengesha bantu. Ke bualu kayi, bantu ba bungi badi batshina Nzambi, bela meji ne: kabena mua kulua balunda bende to. (Yak. 4:8) Bualu bukuabu, Satana udi ukeba bua kutekesha ditabuja dia bantu ba Nzambi.

10. Ntshinyi tshidi mua kufikisha muena Kristo ku difiikila Yehowa munda?

¹⁰ Patudi tutuilangana ne ntatu, Satana mmusue bua tuele meji ne: Yehowa kena ututabalela to. Udi wela kabidi meji ne: netufiikile Yehowa munda tuetu batungunuke ne kukenga. (Nsu. 19:3) Bantu badi bakuluka mu buteyi ebu badi mua kubanga kudiebeja ne: ‘Bidiku ne mushinga bua kutungunuka ne kutumikila mikenji ya Yehowa ne mêyi ende manene anyi? Ndi mmona bu ne: kabiena bingambuluisha to!’ Tuetu tuela meji nunku, tudi tuenza tshidi Satana musue pamutu pa kuenza tshidi Yehowa musue.

11. Ntshinyi tshidi Satana ukuata natshi mudimu bua kutufikisha ku dibenga kutumikila mikenji ya Yehowa? (Tangila kabidi tshimfuanyi.)

¹¹ Satana ki mmusue bua tutumikile Yehowa padiye utuambila tshidi tshimpe ne tshidi tshibi to. Udi wenza nanku ku diambuluisha dia bintu bu mudi miaba ya dipetelangana ku Enternete. Mu miaba eyi bantu ba bungi batu bamba ne: mikenji ya bikadilu ya mu Bible ikadi ya kale, ne muntu yonso udi ne bua kudisunguila tshidi tshimpe ne tshidi tshibi. Satana “mukokeshi wa buloba ebu” mmufikishe bantu ba bungi ku dimona tshidi tshimpe bu tshibi ne tshidi tshibi bu tshimpe.​—Yone 14:30; Yesh. 5:20; 1 Tim. 4:1, 2.

12. Bua tshinyi tudi ne bua kuepuka malu a dishima adibu bamuangalaja mu ndongoluelu wa Satana eu?

¹² Tuetu bateleje malu a dishima adibu bamuangalaja mu ndongoluelu wa Satana eu, bidi mua kutufikisha ku diela meji ne: malu adi Yehowa utuambila ki mmalelela to. Muanetu wa bakaji kampanda utshidi nsonga utudi bapeshe dîna dia Shannon udi wamba ne: “Biakangangata matuku bua kujingulula ne: malu avuabu batulongesha mu kalasa ne bantu bamvua nsomba nabu, bivua bienda binnyanga. Bu mumvua mpitshisha dîba dia bungi mbala ne ntangila bintu bivua bantu ba mu miaba ya dipetelangana ku Enternete benza, nsombelu ya bantu abu ikavua isankisha. Tshivua kabidi ne disanka pamvua ngenzela Yehowa mudimu anyi pamvua nsomba ne bena mu dîku dietu peshi ne bena Kristo nanyi to.” Kadi Shannon wakalekela malu avua amunyanga au, kukoleshaye kabidi bulunda buende ne Yehowa. Wakasuluka ku buteyi bua Satana. Ntshinyi tshivua tshimuambuluishe?

13. Tshilejilu tshia Shannon tshidi tshikulongesha tshinyi?

¹³ Shannon wakamona ne: bidi bikengela adienzeje bua kukolesha bulunda buende ne Yehowa ne Yezu. Udi wamba ne: “Ngakalomba Yehowa bua angambuluishe mpeta balunda bimpe, meme kuenza kabidi makebulula mu mikanda yetu. Filme wa Les jeunes s’interrogent: Comment se faire de vrais amis? wakangambuluisha bikole.b Mu filme au, muanetu wa bakaji kampanda uvua utuilangana ne ntatu ya bungi ivua mifuanangane ne yanyi. Kadi wakadipuekesha, kulombaye baledi bende diambuluisha. Ke tshingakenza panyi. Baledi banyi ne bakulu, ne bena Kristo bakole mu nyuma bakangambuluisha bua kulekela balunda babi abu. Ngakalonga ne: bua kuenzela Nzambi mudimu ne muoyo mujima, mbimpe nkoleshe bulunda buanyi nende, ne ngikale mumanye tshidi tshinsaka bua kuitaba tshidi Bible wamba, pamutu pa kuikala kuya mu bisangilu anu bua kusankisha baledi banyi.”

IKALA MUTUISHIBUE NE: YEHOWA NE YEZU MBALUNDA BEBE

14. Mmunyi mutudi mua kuepuka mateyi adi Satana utuela bua kutekesha ditabuja dietu? (Tangila kabidi tshimfuanyi.)

¹⁴ Tuetu basue kulama bulunda buetu ne Yehowa, tudi ne bua kusungula balunda bimpe. (Yak. 4:4) Tuikalayi kabidi badimuke bua kubenga kuitaba malu onso a mu bulongolodi ebu atudi tumvua anyi tubala. Tshilejilu, tuetu ne tshibidilu tshia kubala anyi kuteleja malu adi kaayi ne bulelela buonso tudi mua kutuadija kuitaba malu au. Kadi tuetu tubala Bible ne mikanda yetu ne tusomba pa tshibidilu ne bena Kristo bakole mu nyuma, kabakutupambuisha bipepele to. Tuetu bamanye bulelela bimpe menemene, nebikale bipepele bua kumanya tshidi tshimpe ne tshidi tshibi, ne katuakulekela Satana utekesha ditabuja dietu kudi Yehowa to.​—Nsu. 13:20; Bien. 17:11.

15. Ntshinyi tshitudi mua kuenza bua kutuishibua ne: Yehowa ne Yezu mbatunange?

¹⁵ Tuetu tudilongela Bible bimpe, netutuishibue ne: Yehowa ne Yezu badi netu. (Nsu. 22:19) Tuetu tuelangana meji a miyuki ya mu Bible idi ileja mudi Yehowa ne Yezu batabalela bantu, nebitusake bua kubeyemena ne muoyo mujima. Mu Bible mudi malu a bungi adi atujadikila mudi Yehowa ne Yezu batunange. Tshilejilu, Yehowa udi wamba mudiye munange bantu bende bikole kupita mamu utu munange muanende wa mu maboko. (Yesh. 49:15) Utu wangata bantu bonso badi banange dîna diende bu ‘tshintu tshiende tshia mushinga mukole.’ (Mal. 3:16, 17, dim.) Bible udi uleja kabidi mudi Yezu mutunange bikole, bualu udi wamba muvuaye muitabe bua kufua bua bualu buetu.​—Yone 15:12, 13.

16. Bua tshinyi mbimpe tuikale tuvuluka muvua Yehowa mutuambuluishe tuetu anyi bantu bakuabu? (Misambu 118:5, 6)

¹⁶ Tuetu tuvuluka mushindu udi Yehowa ne Yezu batuambuluisha, netuikale batuishibue ne: mbatunange. Tudi pamuapa mua kuvuluka muvua Yehowa muandamune masambila etu anyi mutupeshe bukole. Dîba adi nebituambuluishe bua kutuishibua ne: Yehowa neatungunuke ne kututabalela. Tudi kabidi mua kuebeja bena Kristo netu bua batuambile muvua Yehowa mubambuluishe. (Nsu. 22:17) Tuetu tuenza nunku, netuikale batuishibue ne: nansha tuetu mu ntatu ya mushindu kayi, Yehowa ne Yezu nebatuambuluishe.​—Bala Misambu 118:5, 6. 

17. Bilondeshile Yone 10:29, mbualu kayi buvua Yezu mulaye bantu bonso badi batungunuka ne kumunanga yeye ne Tatu wende?

¹⁷ Tuetu bonso tudi basue kudia bulunda bushême ne Yehowa ne Yezu Kristo. Kadi bu mudi Satana ne bademon bende kabayi banji kubutudibua bua kashidi, netutuilangane anu ne mateyi adi mua kutekesha dieyemena dietu kudi Yehowa ne Yezu. (Buak. 20:1-3, 10) Bua tuetu kukandamena mayele a baluishi betu aba, yonso wa kutudi udi ne bua kuikala mu malanda mashême ne Yehowa ne kuikala mutuishibue ne: Yeye ne Muanende mbamunange ne badi bamuangata ne mushinga wa bungi. Anu muvua Yezu muambe, ‘muntu nansha umue kena mua kukunyenga mu tshianza tshia Tatu to.’​—Bala Yone 10:29; Yak. 4:7.

18. Ntshinyi tshituakonkonona mu tshiena-bualu tshialonda?

¹⁸ Mu tshiena-bualu tshialonda, netukonkonone mayele makuabu abidi adi Satana utuluisha nawu ne tshipatshila tshia kutufikisha ku dilekela kuenzela Yehowa mudimu. Diyele dia 1) udi wenza bua tuikale batapuluke ne bena Kristo netu, ne 2) udi usaka bantu bua kutukengesha. Netumone kabidi tshitudi mua kuenza bua kumukandamena.