Udi mua kutshimuna Satana ne bademon bende

1. Mbanganyi batudi tuetu bonso ne bua kuluangana nabu? (Efeso 6:11, 12)

TUETU bena mudimu ba Yehowa katutu tuya ku mvita to. (Yesh. 2:4; Yone 18:36) Kadi Bible udi uleja ne: tuetu bonso tudi ne bua kuluangana ne bisumbu bia nyuma mibi, mmumue ne: Satana ne bademon bende. (Bala Efeso 6:11, 12.) Ntshinyi tshitudi mua kuenza bua kutshimuna baluishi badi ne bukole bua bungi aba? Tudi ne bua kueyemena Yehowa bua atuambuluishe. Tudi kabidi ne bua kumanya mayele adi Satana ne bademon bende benza nawu mudimu bua kutuluisha ne kuluisha bena Kristo netu.

2. Mmalu kayi atuakuila mu tshiena-bualu etshi?

² Mu tshiena-bualu tshishale tuvua bamone mudi Satana udienzeja bua kutufikisha kudilekela kueyemena Yehowa ne Yezu. Mu tshiena-bualu etshi, netumone mayele makuabu abidi adiye wenza nawu mudimu bua kutuluisha. Mayele au ngowu aa: 1) Udi wenza muende muonso bua kututapulula ne bena Kristo netu. 2) Udi ujula buluishi ne lungenyi lua kutubueja mu ditanaji anyi bua kutupesha buôwa, ujinga bua tulekele kuenza mudimu udi Yehowa mutupeshe.

SATANA MMUSUE KUTUTAPULULA

3. Ntshinyi tshidi Satana wenza bua kututapulula ne bena Kristo netu?

³ Satana udi wenza muende muonso bua kukebesha bilumbu pankatshi petu ne bena Kristo netu. Tshipatshila tshiende ntshia ne: tuikale tuluishangana pamutu pa kumuluisha yeye. Ntshinyi tshidiye wenza bua kutufikisha ku dienza nanku? Mu bulongolodi bua Satana ebu, bantu ba bungi badi ne malu makole ne ki mbanangangane to. Kabatu mene beyemenangana to. Satana mmusue bua tubidikije, tuikale tumona bana betu mu mushindu mubi, tubakine ne tuikale tuakula bibi bua bualu buabu ne bua bulongolodi bua Yehowa.​—Lomo 16:17.

4. Bua tshinyi mukalenge Shaula wakatuadija kukina Davidi? (Tangila kabidi tshimfuanyi.)

⁴ Tuangate tshilejilu tshia muvua mukalenge Shaula mutuadije kukina Davidi. Kumpala Shaula uvua munange Davidi bualu uvua musalayi uvua ne dikima dia bungi. (1 Sam. 18:5) Kadi pashishe, wakatuadija kumvuila Davidi mukawu ne kumukina pakamonaye ne: bantu ba bungi bavua bamunange. Bua bualu abu, Shaula wakakeba misangu ya bungi bua kumushipa. (1 Sam. 18:9-11) Bu yeye mushipe Davidi, Satana uvua mua kusanka bikole be! Bua tshinyi? Yehowa ukavua mutume dîyi bua bele Davidi manyi bua kuluaye mukalenge wa Isalele. (1 Sam. 16:13) Nunku Satana uvua mua kusanka bikole bu tshipatshila tshia Yehowa atshi katshiyi tshikumbane to. Difuanyikijilabi muvua Satana mua kuikala musanke pavuaye umona muvua tshiji tshia Shaula tshienda anu tshivula, pavuaye ukeba bua kushipa muntu uvua Yehowa musungule bua kulua mukalenge pa muaba wende.

5. Bua tshinyi Satana mmusue bua tuikale tualakana bena Kristo netu ne tubumvuila mukawu? (Yakobo 3:14-16)

⁵ Satana mmumanye ne: patudi tushala mu buobumue, Yehowa udi utubenesha ne udi utuambuluisha. (Mis. 133:1) Bu mudi Satana ukeba kunyanga buobumue buetu, mmusue bua tuikale tualakana bena Kristo netu ne tubumvuila mukawu anu bu muvua Shaula muwumvuile Davidi. Satana mmumanye ne: tuetu tumvuila bena Kristo netu mukawu, nebitukolele bua kubananga. (Mâko 12:30, 31) Tuetu bakine bana betu, Yehowa udi mua kuanyisha ntendelelu wetu anyi? Muyidi Yakobo mmuakule kayi udia tshibanga bua njiwu idi mua kumueneka tuetu tumvuila bena Kristo netu mukawu.​—Bala Yakobo 3:14-16.

6. Tshilejilu tshia Yonatana tshidi tshikulongesha tshinyi? (Tangila kabidi tshimfuanyi.)

⁶ Tuetu banange bena Kristo netu ne muoyo mujima, katuakubumvuila mukawu to, kadi netuikale balunda babu ba lulamatu. Tuangatayi tshilejilu tshia Yonatana muana wa Shaula. Yonatana kavua mumvuile Davidi mukawu bu tatuende to. Wakajadikila mulunda wende au muvuaye mutuishibue ne: Yehowa neakumbaje tshivuaye mulaye. Wakambila Davidi ne: “Newikale mukalenge wa Isalele.” Bu muvua Yonatana ne budipuekeshi, wakitaba ne: Yehowa uvua musungule Davidi bua alue mukalenge wa Isalele; ke bualu kayi wakamutua mpanda.​—1 Sam. 23:16, 17.

7. Ntshinyi tshitudi mua kuenza bua kubenga kupesha Satana mpunga wa kututapulula? (Efeso 4:25-27)

⁷ Tuetu batendeledi ba Yehowa tudi bashilangane ku mmuenenu, ku ngikadilu, ku bilele, ku makoba ne ku matunga. Dishilangana dietu edi ke tshintu tshikuabu tshidi Satana ukuata natshi mudimu bua kututapulula ne bena Kristo netu. Mmusue bua tumone ne: mutudi bashilangane, katuena mua kushala mu buobumue to. Ntshinyi tshitudi mua kuenza bua kubenga kumupesha mpunga wa kututapulula? Mbimpe tuikale tujikija bilumbu bidi bimueneka pankatshi petu ne lukasa. (Bala Efeso 4:25-27.) Tunange bena Kristo netu bikole ne tuikale tubamona mu mushindu muimpe. Nansha mutudi bashilangane, tuetu bonso tudi bitupa bia mubidi umue. (1 Kol. 12:12) Tuetu ne bena Kristo netu bonso tudi tuluangana ne Satana ne bademon bende.​—1 Pet. 5:8, 9.

8. Ntshinyi tshitudi ne bua kuenza padi muena Kristo netu ututapa ku muoyo?

⁸ Padi muena Kristo nebe ukuenzela bualu anyi ukuamba dîyi didi dikutapa ku muoyo, vuluka ne: udi pebe muntu mupange bupuangane anu bu yeye. Paudi wenza mudimu wa Nzambi pamue ne bena Kristo nebe, neumone bilema bidibu benza. (Muam. 7:20) Dîba adi, mbimpe utumikile mubelu wa mu Bible wa kulejangana lutulu ne kufuilangana luse ne muoyo mujima. Nunku muntu yeye mukuenzele bibi, mbimpe umubuikidile ne lukasa. (Kolos. 3:12-14) Tshipatshila tshia Yehowa ne Yezu ntshia ne: tuikale mu buobumue; tuetu tufuilangana luse tudi tubambuluisha bua kutshikumbaja.​—Yone 17:20, 21.

SATANA UTU UJULA BULUISHI BUA KUTUTEKESHA MU MIKOLO

9. Mmushindu kayi mukuabu udi Satana ukeba kututekesha mu mikolo?

⁹ Mushindu mukuabu udi Satana ukeba kututekesha mu mikolo, mpadiye usaka bantu bua kutukengesha. Mupostolo Paulo wakadimuija bena Kristo bonso ne: nebabakengeshe. (2 Tim. 3:12) Dikengeshibua adi didi diangata dituenzela malu mabi. Bobu batukengesha, tudi mua kuenza muetu muonso bua banyoke badi batukengesha abu anyi bua tudisombuele. Tuetu benze nanku, katuakuikala ne dîba dia bungi ne makanda a kuenza mudimu wa mushinga mukole udi Yehowa mutupeshe, mmumue ne: mudimu wa diyisha.​—Lomo 12:19-21.

10. Ntshinyi tshivua Izaka muenze pavuabu bamuenzele malu mabi?

¹⁰ Tuangate tshilejilu tshia Izaka muana wa Abalahama. Wakalua mubanji ne uvua ne bimuna bia bungi. Bua bualu abu, bena Peleshete bakamumvuila mukawu, kujibikilabu bina biende bia mâyi. (Gen. 26:12-18) Mâyi a mu bina abi ke avua ambuluisha bena mu dîku diende ne bimuna biende. Nunku Izaka wakaya kumbula bina muaba mukuabu. Kadi bena Peleshete bakamba kabidi muvua muaba au wabu. Mushindu uvuabu benzele Izaka malu au uvua mua kumutekesha mu mikolo. Nansha nanku, Izaka kakalekela dikokangana divua pankatshi pa balami bende ba mikoko ne bena Peleshete dibafikisha kubi to. Tshiakenzaye ntshinyi? Wakumbuka kabidi muaba au bua ditalala dibuele, ne Yehowa wakamubenesha. (Gen. 26:19-25) Padi bantu batuenzela malu mabi, mbimpe tubenzele tuetu malu ne bulenga ne lutulu.

11. Ntshinyi tshivua Yezu muenze pavuabu bamuenzela malu mabi?

¹¹ Pavua Yezu mulue pa buloba, bantu ba bungi bakamuenzela malu mabi. Tshilejilu, bamue balela bende bakamba muvuaye mujimije lungenyi. (Mâko 3:21) Balombodi ba ntendelelu bavua pa tshibidilu bakeba kupangisha Yezu bua kuyisha. (Luka 11:15, 16) Umue wa ku bapostolo bende ba pa muoyo wakamutungila tshitungu. (Mat. 26:14-16) Mfumu wa bakuidi wakatua ku tshia bakokeshi ba tshididi bua kukosela Yezu tshibawu tshia lufu. (Mâko 15:1, 13-15) Kadi Yezu kakalekela buluishi abu bumupangisha bua kuenzela Yehowa mudimu to. Kavua nansha muenze malu avua aleja ne: uvua ne lungenyi lua kudisombuela to. Pakamukuatabu, mupostolo Petelo uvua mujinge kumukuba. Petelo wakakosa ditshi dia muena mudimu wa muakuidi munene. Kadi Yezu kavua muanyishe tshivuaye muenze atshi to; ke bualu kayi wakuondopa mputa wa muntu au mu tshishima. (Luka 22:50, 51) Mu bilejilu bionso bitudi bamone ebi, Yezu kavua mukebe bua kudisombuela anyi mulekele malu mabi avuabu bamuenzele amufikisha ku dilekela tshivua Yehowa musue to.

12. Bilondeshila Matayi 5:43, 44, mmunyi mutudi mua kuenzela bantu badi batuluisha malu?

¹² Lelu eu, tudi tutuilangana ne malu adi mua kututekesha mu mikolo. Satana udi ukeba bua tulekele kuyisha. Bena mu dîku dietu badi kabayi Bantemu anyi bantu bakuabu badi mua kutuluisha anyi kutukengesha. Kadi Yezu mmutuambile bua kunanga too ne bantu badi batukengesha. (Bala Matayi 5:43, 44.) Bualu ebu budi bumvuija ne: katuena mua kukina bantu badi batukengesha anyi kubakengesha pabu to. Kadi tudi ne bua kuenzela bantu bonso malu mimpe, kuikala nabu lutulu, ne kubanemeka nansha bobu batuluisha anyi baluisha mudimu wetu.​—1 Kol. 13:4.

13. Bua tshinyi tudi ne bua kunemeka mbulamatadi nansha yoyi ituluisha? (Tangila kabidi tshimfuanyi.)

¹³ Tudi kabidi ne bua kunemeka bakokeshi ba mbulamatadi nansha bobu bashipa mikenji idi ituanyishila bua kutendelela anyi padibu batukoleshila malu. Bua tshinyi? Bualu ke tshidi Yehowa musue bua tuenze. (Lomo 13:1, 2) Satana katu anu misangu yonso usaka mbulamatadi bua kuangata mapangadika mabi to. Kadi mmutekemene bua tuakule bibi bua mapangadika onso adi mbulamatadi yangata anyi bua katuatumikidi to. Bantu ba bungi ba mu ndongoluelu eu batu babenga mapangadika a mbulamatadi adibu kabayi banange to. Bena Kristo kabena bobu ne bua kuenza nanku to. (Nsu. 24:21, 22, dim.; Muam. 8:2, 3) Tuetu batuadije kubuelakana mu malu a tshididi, netukumbaje disua dia Satana.​—Yone 15:19.

14. Ntshinyi tshitudi ne bua kuvuluka bua bantu badi batuluisha?

¹⁴ Bamue bantu bavua baluisha bulelela kumpala, lelu eu bakadi balue Bantemu ba tshisumi. (1 Tim. 1:12, 13) Ikala anu uvuluka ne: ‘bantu badi bakupenda, bakukengesha ne bakushiminyina malu mabi a mishindu yonso,’ nebashintuluke dimue dituku. (Mat. 5:11) Ikala usambila bua bakokeshi batuanyishile bua tuikale tutendelela Yehowa badilekelele. (1 Tim. 2:1, 2) Udi mua kusambila kabidi bua bantu bakuabu badi bakuluisha bu mudi bena mu dîku diebe, bena mudimu nebe, anyi balongi benu. Lomba Yehowa akuambuluishe bua kumanya tshia kuenza bua kulenga mioyo yabu. Ikala kabidi ne lutulu. Mamu mukuabu uvua muluishe bayende munkatshi mua bidimu bia bungi wakalua kuamba pakavuaye mulue Ntemu ne: “Tuetu ne lutulu lua bungi, tudi mua kuenza malu mimpe a bungi be!”

15. Bua tshinyi ki mbia meji bua kujinga kujikija malu mabi onso atudi tutuilangana nawu anyi atudi tumona?

¹⁵ Tuetu tujinga bua kujikija malu mabi onso adibu batuenzela anyi atudi tumona, netujimije makanda etu ne dîba dietu dia bungi tshianana. (Muam. 1:15) Yehowa mmumanye bimpe ntatu itudi tutuilangana nayi. (Mis. 37:18) Mu katupa kîpi emu, Bukalenge bua Nzambi nebujikije malu mabi onso adi Satana ne bena mudimu bende bakebeshe. (1 Yone 3:8; Buak. 21:5) Mu dindila tshikondo atshi, mbimpe tuikale ne lutulu ne tunange bena Kristo netu. Tudi ne bua kufila dîba dietu ne makanda etu mu mudimu wa kuambuluisha bantu ba bungi bua kulua batendeledi ba Yehowa.

TUDI MUA KUTSHIMUNA SATANA NE BADEMON BENDE

16. Ntshinyi tshidi mua kutuambuluisha bua kutshimuna Satana ne bademon bende? (Tangila kabidi bimfuanyi.)

¹⁶ Bible udi utujadikila ne: tudi mua kutshimuna mvita itudi tuluangana ne bisumbu bia nyuma mibi, mmumue ne: Satana ne bademon bende. (Yak. 4:7; 1 Yone 5:4, 5) Patudi tuluangana nabu, Bible udi uleja ne: ditabuja ke didi mua kutuambuluisha bua kubatshimuna. (Ef. 6:16) Ke bualu kayi, mbimpe tuikale ne ditabuja dikole kudi Yehowa ne kudi Yezu. Tulekele ditabuja adi ditusaka bua kutungunuka ne kunanga bena Kristo netu ne kushala nabu buobumue.

17. Mbimpe tuikale badisuike bua kuenza tshinyi?

¹⁷ Satana ne bademon bende nebatungunuke ne kuenza muabu muonso bua tuetu kuluishangana ne bena Kristo netu pamutu pa kubaluisha bobu, ne nebatutekeshe mu mikolo bua tulekele kuyisha. Kadi katulekedi batutshimuna nansha kakese. Yehowa ne Yezu mbatulaye ne: tuetu bashale ne lulamatu kudibu, nebatuambuluishe bua kutshimuna Satana. Bena Kristo netu badi netu mu mvita itudi tuluangana ne Satana, muena lukuna wetu nabu munene. Bua bantu badi batuluisha, tudi ne bua kuenza muetu muonso bua kutumikila mubelu wa Yezu wa kubenzela malu mimpe. (Luka 6:27, 28) Nunku, tungunuka ne kukandamena mayele a Satana, mutuishibue ne: neutshimune mvita iudi uluangana nende ne bademon bende.