LUMINGU LUA DIA 19-25/10/2026
MUSAMBU WA 106 Tuikalayi ne ngikadilu wa dinanga
‘Ndi nkusengelela bua dinanga’
“Ndi musue meme kukusengelela bua dinanga.”—FILEM. 9.
LUNGENYI LUNENE
Tshilejilu tshia mupostolo Paulo, tshia Filemona, ne tshia Onezimo, tshidi tshituambuluisha bua kumanya tshia kuenza bua kuikala anu mu ditalala ne bena Kristo netu mu tshisumbu.
1. Ndibanza kayi didi yonso wa kutudi nadi?
TUDI ne disanka bua mudi bantu ba Yehowa bikale anu mu ditalala ne bena Kristo nabu. Ditalala adi nkadiosha ka mutuikala ne nsombelu muimpe mu Mparadizu. (Yesh. 32:17, 18) Nansha mudi Yehowa utupesha ditalala adi, yonso wa kutudi udi ne dibanza dia kukeba tshia kuenza bua kulama ditalala adi. (Lomo 12:18) Ntshinyi tshitudi mua kuenza bua kulama ditalala mu tshisumbu patudi tuenzelangana malu kampanda ne bakuabu, patudi tunyingalaja muena Kristo netu, anyi padi muntu utunyingalaja tuetu? Tudi tupeta diandamuna dia lukonko elu patudi tukonkonona bualu kampanda bua mu Bible. Netumone tshidi tshilejilu tshia mupostolo Paulo, tshia Filemona, ne tshia Onezimo bitulongesha.
‘NDI NKUSENGELELA BUA DINANGA’
2. Mbualu kayi buvua bupitakane pankatshi pa Filemona ne Onezimo? (Filemona 8, 9, 17)
2 Bala Filemona 8, 9, 17. Paulo uvua mufundile Filemona mukanda umusengelela bua ne: pavua Onezimo upingana, amuakidile. Paulo uvua umulomba bua alekele dinanga divuaye nadi bua Kristo ne bua bena Kristo nende ba mu tshisumbu dimusake bua kumuakidila. Pamuapa udi pebe uvuluka bualu bua Filemona ne Onezimo. Filemona uvua mu tshisumbu tshia mu Kolosayi. Bantu bonso bavua bamanye muvuaye ne ditabuja dikole ne muvuaye munange bantu bikole. Uvua ne mupika kampanda uvua kayi muena Kristo, diende Onezimo. Mupika eu wakamunyema, kuyaye ku Lomo; pamuapa uvua mumuibe makuta kumpala kua kumbukaye. (Filem. 18) Pavuaye mu Lomo amu wakalua muena Kristo, kushemeshaye bulunda ne Paulo. (Kolos. 4:9) Kadi bilondeshile mukenji kampanda wa bena Lomo, Onezimo uvua ne bua kupingana kudi mfumuende; ke Paulo kumupingajaye kudi Filemona.—Filem. 12, 13.
3. Nnkonko kayi ivua mua kujuka pavua Paulo upingaja Onezimo kudi Filemona? (Tangila kabidi tshimfuanyi.)
3 Ntshinyi tshivua Filemona ne bua kuenza pavua Onezimo upingana? Bilondeshile mukenji kampanda wa bena Lomo, uvua ne bukenji bua kumunyoka bikole. Uvua anu ne bua kutumikila mukenji au anyi? Ntshinyi tshivua bena mu tshisumbu mua kuamba? Kadi netuambe tshinyi bu bualu abu bufikishe bena Kristo bakuabu bavua ne bapika ku dibenga kupetangana ne bapika babu? Paulo uvua mumanye ne: bualu abu buvua mua kunyanga ditalala mu tshisumbu. Ke bualu kayi wakafundila Filemona mukanda, kuwupeshaye Tukiko bua aye kumupesha. (Ef. 6:21, 22; Kolos. 4:7-9) Musangu au ke uvuaye kabidi mutumine bena mu tshisumbu tshia mu Kolosayi mukanda. Mu tshiena-bualu etshi, netumone tshidi tshilejilu tshia Paulo, tshia Onezimo, ne tshia Filemona bitulongesha. Bilejilu ebi bidi mu mukanda wa Kolosayi ne wa Filemona.
Filemona ubala mukanda uvua Paulo mumutumine kumpala kua tshisumbu tshia bantu ne dîyi dikole; mu bantu amu mudi Onezimo ne Tukiko (Tangila tshikoso 3)
TSHIDI TSHILEJILU TSHIA PAULO TSHITULONGESHA
4-5. Ntshinyi tshidi bakulu mua kuenza bua ditalala dikale anu mu tshisumbu?
4 Tshilejilu tshia Paulo tshidi tshitulongesha tshinyi? Paulo uvua wenzela bakuabu malu mu mushindu uvua wambuluisha tshisumbu bua kuikalatshi anu mu ditalala. Tshilejilu tshiende tshidi tshituambuluisha bua kuenza bia muomumue.
5 Paulo uvua wangata Filemona bu mulunda wende. (Filem. 17) Kavua umumona bu mupika wa yeye kutumina dîyi to. (2 Kol. 1:24) Uvua umuangata bu muenzejanganyi nende wa mudimu, ne wakamuvuluija muvuabu balunda. Bushuwa, Paulo uvua tshilejilu tshimpe kudi Filemona bua mushindu uvuaye pende mua kumona Onezimo ukavua pende mulue muena Kristo. Udi kabidi tshilejilu kutudi tuetu bonso, nangananga kudi bakulu. Bakulu badi bangata binabu bu balunda babu badi bambuluisha tshisumbu bikole bua kuikalatshi mu ditalala. Bu mudi bakulu bikale balami badi banange bena Kristo nabu, kabatu ‘babakokesha bu bamfumu to.’ (1 Pet. 5:1-3) Kadi batu bapitshisha nabu dîba pamue, babateleja, babangata ne mushinga, ne babambuluisha padibu mu dikenga. Bakulu badi bangata bena Kristo nabu bu balunda anu bu Paulo, badi tshilejilu kudi mikoko ne badi bambuluisha tshisumbu bua kuikalatshi anu mu ditalala.
6. Bua tshinyi mbimpe kuela bakuabu kalumbandi?
6 Paulo wakela Filemona kalumbandi. (Filem. 4, 5, 7) Tuetu bonso tutu basue bua batuele kalumbandi. Bua tshinyi? Bua malu a bungi. Tshilejilu, bantu ba bungi batu badimona kabayi ne mushinga to. Tudi mua kuikala tusamisha mutu bua tshimuenekelu tshietu, bikala bakuabu ni mbatunange, anyi bua mutudi tuela meji ne: tudi mua kujimija mudimu utudi nawu mu bulongolodi. Bidi anu mua kufikila muntu yonso bua kusamisha mutu. Kadi imue misangu tuetu tusamisha mutu nanku, tudi mua kupeta kanyinganyinga, tukadi tufiika munda ne bua tumalu tukese, tukadi basue anu kudibingisha, anyi tukadi pamuapa tukeba kuleja mutudi bapite bakuabu. Abi bidi mua kutupangisha bua kuikala mu ditalala ne bakuabu. Tuetu tuela muntu kalumbandi, neamone ne: udi ne mushinga. (Nsu. 12:25) Nebimujadikile ne: tudi bamunange ne tudi tumuangata ne mushinga. Udi musue bua bakuabu badiumvue mushindu au anyi? Biobi nanku, keba mpunga ya kubela kalumbandi ne muoyo mujima. Bela kalumbandi bua malu mimpe adibu benze ne bua mushindu udibu baditatshishe bua kuenza bualu kampanda. Tudi mua kuamba mu tshikoso ne: paudi umona bualu buimpe kudi muntu, muambilabu.
7. Bua tshinyi mbimpe tuele meji bimpe bua malu atudi tuamba bua bakuabu? (Filemona 10-12)
7 Paulo wakakula bimpe bua Onezimo. (Bala Filemona 10-12.) Mmunyi muvua mêyi mimpe avua Paulo muambe bua Onezimo mua kuikala mambuluishe Filemona? Udi wela meji ne: mêyi au avua mua kuikala mashintulule mushindu uvuaye umona Onezimo, uvuaye muakule nende, anyi uvuaye mumuenzele malu anyi? Bivua anu mua kuikala nanku. Bia muomumue, malu atudi tuamba bua bena Kristo netu adi mua kushintulula mushindu udi bantu bakuabu babamona ne udibu babenzela malu. Tuetu tuakula bimpe bua bena Kristo netu, bidi mua kusaka bakuabu bua kubamona mu mushindu muimpe. Tumanye kabidi ne: tuetu tuakula bibi bua bena Kristo netu, bakuabu badi mua kubamona mu mushindu mubi. Kadi bua tuetu kufika ku diakula bimpe bua bakuabu, tudi ne bua kuanji kuikala ne meji mimpe bua bualu buabu. Ntshinyi tshidi mua kutuambuluisha? Mbualu buvua Paulo ne tshibidilu tshia kuenza.
8. Ntshinyi tshidi mua kutuambuluisha bua kuikala kuela meji mu mushindu muimpe bua bena Kristo netu ne kuakula bimpe bua bualu buabu? (Tangila kabidi bimfuanyi.)
8 Paulo uvua wela Yehowa tuasakidila pa tshibidilu bua ngikadilu milenga ivua nayi Filemona. (Filem. 4, 5) Uvua kabidi umuela tuasakidila bua ngikadilu mimpe ya bena Kristo nende bakuabu. (1 Kol. 1:4-7; Filip. 1:3-5; Kolos. 1:3, 4; 1 Tes. 1:2, 3) Paulo kavua wimanyina pa bilema bia bena Kristo nende to, kadi uvua wimanyina pa ngikadilu yabu mimpe. Uvua kabidi ne tshibidilu tshia kuela Yehowa tuasakidila bua muvuaye mumupeshe balunda bimpe. Biobi bikukolele bua kuakula bimpe bua bakuabu, vuluka ne: wewe ne tshibidilu tshia kuimanyina pa ngikadilu yabu mimpe ne usambila ne muoyo mujima bua Yehowa ababeneshe, nebikuambuluishe bua wikale wakula bimpe bua bualu buabu.
Ikala welela bena Kristo nebe meji mimpe ne wakula bimpe bua bualu buabu anu bu Paulo (Tangila tshikoso 8)
9. Bua tshinyi bidi bikemesha bua muvua Paulo mufundile Filemona mukanda ne mêyi a bulenga?
9 Nansha muvua Paulo mutuilangane ne ntatu ya bungi, wakenzela Filemona malu mimpe. Bikatuku bikufikile bua kupanga kuleja muntu lutulu tshikondo kampanda tshiuvua mutshioke anyi tshiuvua ne malu makutonde anyi? Tuetu tutuilangana ne nsombelu mikole, tudi mua kutuadija kufiikila bakuabu munda anyi tubenzela malu mu mushindu mubi. Nnsombelu kayi ivua Paulo utuilangana nayi pavuaye mufundile Filemona mukanda? Bidimu ndambu kumpala kua kufundaye mukanda au, tshisumbu tshia bantu tshivua tshilue kumuluisha ne tshikisu tshionso, ne pashishe bobu kumukuata pende kayi ne tshidiye muenze to. Bavua bamukuate mu buloko mu Yelushalema ne mu Kaisalia muvuabu bamulame kudi bantu. Pashishe kumutumabu mu Lomo, mazuwa kubatshibukila mu mâyi pavuabu bayaku. Nansha pavuaye ufundila Filemona mukanda apu, utshivua anu “muena buloko” mu Lomo muvuabu baye nende. (Filem. 1) Paulo uvuaku mulekele malu onso au amufikisha ku difundila Filemona mukanda mu mushindu mubi anyi? Tòo. Mukanda uvua Paulo mufundile Filemona uvua ne mêyi a bulenga ne kanemu. Bidi bitulongesha tshinyi? Tudi mua kuenza bua ditalala dikale mu tshisumbu tuetu tuenzela bena Kristo netu malu mimpe nansha patudi batshioke, padi malu matutonde, anyi patudi mu ntatu mikole. Dîba adi, netujikije bilumbu bidi mua kumueneka bimpe.
TSHIDI TSHILEJILU TSHIA ONEZIMO TSHITULONGESHA
10. Tshilejilu tshia Onezimo tshidi tshitulongesha tshinyi?
10 Tuetu bonso tutu tuamba anyi tuenza malu adi anyingalaja bakuabu. Tshilejilu tshia Onezimo tshidi tshituambuluisha bua kumanya mua kukeba ditalala padi bualu bua nunku buenzeka. Uvua muenze bualu budi mua kumueneka bu ne: mbupepele, kadi butu pa tshibidilu bukole bua kuenza. Uvua muitabe tshilema tshiende ne muenze tshivua tshikengela bua kulengejangana ne Filemona. Onezimo uvua mumanye bimpe mukenji kampanda wa bena Lomo uvua umulomba bua kupingana kudi mfumuende. Wakenza luendu lua kilometre mipite pa 1 400 luvua lumulomba makuta a bungi ne luvua lutshiokesha bua kupingana kudi Filemona. Luendu alu luvua pamuapa lumuangate matuku matue ku 50. Uvua ne bua kuitaba bua kulua kabidi mupika ne kuitaba tshionso tshivua ne bua kumufikila bua malu avuaye muenze. Dipangadika adi kadivua dipepele to. Netuambe tshinyi bu yeye udiambila ne: tshivuaye muenzele Filemona atshi tshivua tshimpe? Bu yeye udibingisha, kavua mua kupingana kudi mfumuende ne kuenza tshivua tshikengela bua kukeba nende ditalala to.
11. Ntshinyi tshitudi ne bua kuenza bua kukeba ditalala tuetu banyingalaje muntu? (Tangila kabidi bimfuanyi.)
11 Biobi ne: udi munyingalaje muntu, ndaku ukube nende ditalala. (Mat. 5:23-25) Mu bulelela kuenza nunku ki nkupepele to. Kadi ditalala dinuikala nadi didi ne mushinga wa bungi. Tshia kumpala, mulombe luse ne muoyo mujima. Ikala mudiakaje bua kumuteleja ne udienzeje bua kumvua mudiye umvua bua bualu abu. Itaba tshilema tshiebe. Epuka kudibingisha ne kuedi muntu mukuabu tshilumbu pambidi to. Wewe muenze malu aa, muntu neitabe luse luudi umulomba ne tshilumbu tshienu netshijike anyi mene malu kaakunyanguka to. Bitu bilomba kuikala ne budipuekeshi bua kulombangana luse, kadi kuenza nunku ke mushindu mupepele wa kukeba ditalala.—Lomo 14:19.
Ikala muena budipuekeshi ne mukebi wa ditalala anu bu Onezimo (Tangila tshikoso 11)
TSHIDI TSHILEJILU TSHIA FILEMONA TSHITULONGESHA
12. Bua tshinyi Paulo uvua mutuishibue ne: Filemona uvua ne bua kufuila Onezimo luse?
12 Tshilejilu tshia Filemona tshidi tshitulongesha mushindu utudi mua kalama ditalala padi muena Kristo netu utunyingalaja. Filemona uvuaku mufuile Onezimo luse ne mumuakidile bimpe anyi? Bible ki mmuleje bualu ebu to. Kadi Paulo uvua mutuishibue ne: Filemona uvua ne bua kuenza nanku. (Filem. 17, 21) Paulo uvua mumanye ne: ngikadilu milenga ivua nayi Filemona ivua ne bua kumusaka bua kufuila Onezimo luse. Nngikadilu kayi ayi?
13. Bua tshinyi dinanga ke ngikadilu munene udi utuambuluisha bua kulama ditalala. (Kolosayi 3:14)
13 Filemona uvua munange bena Kristo nende. (Filem. 5) Wakenza malu bilondeshile dîna diende didi diumvuija “Kunanga.” Bantu bavua bamumanye muvuaye munange bantu bikole; ngikadilu eu ke uvua mumuambuluishe bikole bua kufuila Onezimo luse. Ke bualu kayi mu mukanda uvua Paulo mufundile tshisumbu tshivua Filemona mu Kolosayi, uvua mumvuijamu mudi dinanga dikale “tshisuikidi tshipuangane tshia buobumue.” (Bala Kolosayi 3:14.) Mêyi aa adi aleja ne: kakuena ngikadilu mukuabu udi mua kuambuluisha bua kulama ditalala ne buobumue kupita dinanga to. tuetu banange bena Kristo netu bikole, nebikale bipepele bua tuetu kubafuila luse ne kubenzela malu bimpe. (1 Kol. 13:4-7) Tumonayi muvua dinanga diambuluishe Filemona bua kufuila bena Kristo nende luse.
14. Bua tshinyi tudi tuamba ne: Filemona uvua muakididi wa benyi?
14 Filemona uvua ne ngikadilu kampanda uvua umuambuluisha bua kuikala ne dinanga dikole. Ngikadilu au ngua diakidila dia benyi. Uvua mufile nzubu wende bua bikale benzelamu bisangilu. (Filem. 2) Paulo uvua kabidi muleje muvua Filemona muakididi wa benyi pavuaye mumulombe muaba wa kusombela. (Filem. 22) Bu muvua Filemona wakidila benyi ne disanka, tudi batuishibue ne: bantu bavua badiumvua bimpe.—Filem. 7.
15. Mmunyi mudi kuakidila benyi kutuambuluisha bua kunanga bena Kristo netu bikole? (Tangila kabidi bimfuanyi.)
15 Mmunyi mudi kuakidila benyi anu bu muvua Filemona wenza mua kutuambuluisha bua kunanga bena Kristo netu bikole? Tudi tufika ku dimanya bena Kristo netu bimpe patudi tubabikila ku nzubu yetu. Tuetu tusomba ne bantu batutu katuyi ne tshibidilu tshia kusomba nabu, anyi batudi katuyi nabu mmuenenu wa muomumue, netufike ku dimona ne: tuetu bonso tudi bashilangane bikole, ne dishilangana adi ke didi dienza bua bulongolodi buetu buikale busankisha. Kumanya bilele biabu, mudibu bafike ku dimanya bulelela, anyi muvuabu batantamene ntatu kutu pa tshibidilu kutuambuluisha bua kubananga bikole ne kubanemeka. Kudi kutuambuluisha kabidi bua kumanya tshidi tshisake Yehowa bua kubabikila mu dîku dia batendeledi bende. (Yone 6:44) Tuetu tuakidila benyi bidi bituambuluisha bua kumanya ngikadilu mimpe ya bena Kristo netu, kubananga bikole, ne kubafuila luse.
Ikala muakididi wa benyi anu bu Filemona bua wambuluishe tshisumbu tshishale mu buobumue (Tangila tshikoso 15)
16. Mmunyi muvua Filemona mua kuikala mutumikile mubelu wa Paulo udi mu Kolosayi 3:13?
16 Udiku ne muntu uudi ukeba bua kufuila luse anyi? Nansha biobi ne: tudi banange bena Kristo netu, kubafuila luse kudi mua kutukolela imue misangu. Ntshinyi tshidi mua kutuambuluisha? Tubalayi mêyi avua Paulo mufundile tshisumbu tshia ku Kolosayi muvua Filemona, mu Kolosayi 3:13. (Bala.) Difuanyikijilabi muvua Filemona mua kuikala mumvue pavuaye uteleja mêyi au pavuabu babadila tshisumbu tshivua mu nzubu muende. Nnganyi uvuaye mua kuikala nende mu meji? Utshivuaku mua kuikala mufiikile Onezimo munda anyi? Biobi nanku, mubelu au uvua muleje patoke tshivuaye ne bua kuenza; mmumue ne: uvua ne bua kutungunuka ne kuleja Onezimo lutulu ne kumufuila luse ne muoyo mujima. Mmunyi mudi mubelu wa Paulo eu mua kutuambuluisha biobi bitukolele bua kufuila bakuabu luse?
17. Mmunyi mutudi mua ‘kutungunuka ne kulejangana lutulu?’
17 Ntshinyi tshivua Paulo usua kuamba pavuaye muambe ne: “Nutungunuke ne kulejangana lutulu?” Uvua musue kutukankamija bua tuikale tuleja bena Kristo netu lutulu nansha padibu batunyingalaja anyi batufiikisha munda. Mu mvese au Paulo mmuele kashonyi pa dinanga ne luse bidi nabi Yehowa. Yehowa katu muena malu makole to, udi ulomba batendeledi bende tshidibu mua kukokesha bua kuenza. Mmumanye mikalu yetu ne utu wimanyina pa ngikadilu yetu mimpe. (Mis. 103:13, 14; 130:3) Ke bualu kayi udi utungunuka ne kutunanga bikole , utuenzela malu mimpe ne utufuila luse ne muoyo mujima. (Muad. 3:22, 23) Tuetu tudienzeja bua kumona bena Kristo netu mudi Yehowa ubamona, nebikale bipepele bua tuetu kubaleja lutulu padibu batuenzela bilema anu bu mutubu pabu netu lutulu. Tshilejilu, patutu tuvuluka mutu mutshi muimpe padiwu wela bilongo, bitu bitusaka bua kuwutabalela padiwu kawuyi muanji kubiela. Bia muomumue, tuetu tuvuluka ngikadilu mimpe ya bena Kristo netu, netupete dijinga dia kubafuila luse ne kubenzela malu mimpe nansha bobu batunyingalaje.
18. Udi mudisuike bua kuenza tshinyi?
18 Malu onso autu wenza bua kulama ditalala mu tshisumbu tshienu, Yehowa utu uangata ne mushinga wa bungi. Ikala udienzeja dituku dionso bua kukeba ditalala. Tungunuka ne kuakula bimpe bua bakuabu ne kuyukila nabu ne bulenga. Ikala ulomba luse. Wewe mubungamije muena Kristo nebe, enza muebe muonso bua kuakaja bulunda buebe nende. Ikala munange bena Kristo nebe bikole; bualu dinanga adi ke diakuambuluisha bua kubabuikidila ne muoyo mujima. Wewe muenze malu aa, newikale mukebeshi munene wa ditalala mu tshisumbu tshienu. Newikale kabidi munkatshi mua bena bupuekele ‘bikala ne bua kupiana buloba’ ne ‘kupeta disanka dipite bungi mu ditalala divule’ bua kashidi.—Mis. 37:11.
MUSAMBU WA 154 Dinanga dia kashidi