Mufuki wanyi Munene wakatuma meji ende kundi

Ndi mukolele mu Paris, mu ditunga dia France, mu kartie kavua bantu ba bungi bitaba ne: Nzambi kenaku to. Meme ne baledi banyi tuvua tuitaba petu bualu abu. Nunku, ngakitaba dilongesha dia ne: bintu mbidienzekele. Ngakitabakana dilongesha adi anu bu bantu bakuabu. Mvua ndiambila ne: bu muvuabu badilongesha mu kalasa, divua ne bua kuikala dilelela. Nunku ngakamona ne: kabivua ne mushinga bua kukeba bijadiki bidi bileja mudi muoyo mutuadije to.

Baledi banyi kabavua basua kutendelela to. Bavua badiambila ne: bu Nzambi muikalaku, kakuvua mua kuikala malu mabi ne bantu kabavua mua kuikala bakenga to. Bu mumvua mmona panyi lubombo ludi nalu bamfumu ba bitendelelu, mvua ndiambila ne: kuitaba ne: Nzambi udiku ne mmunange bantu, nkupangila lungenyi. Mvua nseka bantu bavua bitaba dikalaku dia nzambi.

Kadi lelu ndi mutuishibue ne: Nzambi udi mufuke bintu bionso udiku ne udi untabalela nansha mundi muena mibi. Lekelayi nganji kunulondela muvua kutuishibua ne: Nzambi udiku kushintulule meji anyi ne nsombelu wanyi.

Pamvua ne bidimu 19 bakatutuma bua kulonga busalayi munkatshi mua tshidimu tshimue mu ditunga dia Guyane, mu Amérique du Sud. Tshivua mumanye ne: kuya mu ditunga dilenga dia kule adi kuvua ne bua kuikala ne mushinga wa bungi mu nsombelu wanyi to.

Pangakakumbaja bidimu 20, ngakapingana mu Paris. Nkavua ngenza mudimu wa bungi kutuadijila mu Dimue too ne mu Ditanu, mu Disambombo ne mu Dia lumingu tuya ne balunda banyi mu bisankasanka, tudia ne tunua maluvu makole tupitshisha. Kadi tshivua anu ne disanka dilelela to. Disanka adi divua dia tshitupa tshîpi ne tshivua mumanye bua tshinyi mvua ne muoyo to. Pamvua mmona muvua bantu kabayi ne bululame, bikale ne kansungansunga, ne bakuabu bikale bapele, bivua bintonda bikole. Mvua mmona muvua bantu bimpe bakenga ne mmona kabidi muvua bantu banyanga buloba. Mvua musue bua malu ashintuluke. Ke meme kutuadija kuela meji bua kupingana mu Amérique du Sud.

NGAKAKEBA BUA KUIKALA NE NSOMBELU MULENGA MU GUYANE

Ngakapingana mu kamusoko kakuabu kavua mu ditu kampanda dia mu Guyane, muaba umvua muenzele mudimu wa busalayi. Mvua mumanye ne: bu muvua muaba au bintu bilenga bia mu bufuki, nsombelu wanyi nealengele bualu mvua mua kunua diamba ne mvua mua kutshionkomoka. Kadi pakapita matuku, mvua anu muanyi ne kale. Mvua anu ngenza mudimu matuku onso a munkatshi mua lumingu bua mmone mua kuya mu bisankasanka mu Disambombo ne mu Dia lumingu.

Tshikondo atshi, muntu mukuabu wakampesha Bible. Ngakatuadija kumubala mutekemene ne: mvua mua kupetamu mibelu ivua mua kumpetesha nsombelu muimpe. Kadi tshivua ngumvua bimvua mbala abi to.

Kuvua balunda banyi bakuabu bavua pabu bakeba kumanya bua tshinyi badi ne muoyo. Bakangambila bua meme kusomba nabu mu ditu amu, muaba uvuabu babikila ne: Buobumue.

Mvua musue kusomba nabu mu ditu amu bualu tuvua tusanka ne bintu bikese bituvua nabi. Tuvua tuenza malu mutuvua basue ne kakuvua muntu uvua utuambila tshia kuenza to. Tuvua tubika ku tulu padi dîba dipatuka ne tuya kulala padidi dibuela, tuvua tudikunyina biakudia, tuimba mijiki, ne tunua diamba. Tuvua tutabalela tshipapu tshituvua basombele ne tuvua tuambuluishangana ne bituvua nabi. Tuvua tudia anu bisekiseki bualu katuvua basue kuenzela nyama bibi to. Katuvua tunemeka bakokeshi to. Pavua kushipa mukenji kampanda wa mbulamatadi kuikala bua diakalenga dietu ne kakuyi kutatshisha muntu nansha umue wa kutudi, tuvua tuwushipa.

Tuvua basue bua malu enzeke pa buloba mutuvua tuetu basue. Kakuvua muntu uvua ku mutu kua bakuabu mu dingumba dietu adi to. Tuvua tunemekangana nansha mutuvua bafumine miaba mishilangane. Kadi ngakalua kumona ne: muntu yonso uvua ukeba anu diakalenga diende ne uvua ne biende bilema. Malu a buena amvua munyeme mu Paris au ke ankavua mmona kabidi mu dingumba dietu adi. Bamue ba kutudi bakenza mu dingumba adi anu matuku makese, bakuabu mbingu, banga ngondo ndambu. Kadi meme ngakashalamu bidimu bipite pa bibidi.

Tshikondo tshituvua mu ditu adi, ngakadimuenena muvua buloba butupetesha bintu bionso bituvua nabi dijinga. Dimue edi, ngakabala ntete ya tshipapayi. Nansha muvuayi ya bungi, ngakayibala anu yonso. Meme kudiebeja ne: ‘Bua tshinyi buloba budi butupetesha biakudia bipite bungi nunku? Budi anu bu nzubu udi mulongolola bimpe, muikale ne bintu bionso bidi bikengela bua kuakidila muntu.’ Ke meme kumona ne: ki mbulue ku mpukapuka to. Kudi muntu udi mutulongoluelabu. Kudi anu muntu udi mubufuke. Kadi tshiena mumumanye to.

Ngakatungunuka anu kubala Bible. Kadi bua musangu eu mvua musue kumanya tshivua Nzambi musue bua ngenze. Ngakatuadija kusambila, ntua mu dîna dia tatu, tshiyi nansha mumanye tshivuabi biumvuija to. Ngakatuadija kudiebeja bikala Yehowa ke dîna dia Mufuki wa bintu bionso, bualu tuvua tutela dîna adi mu imue misambu ituvua tuimba mu dingumba dietu.

MUNGAKAMANYA TATU WANYI MUENA MUOYO WA KUPA

Pandi mvuluka musangu ungakatuadija kusambila, ndi mmona ne: Mufuki wanyi uvua mumone dijinga dimvua nadi dia kumumanya bimpe. Umue wa ku balunda wakapetangana ne Bantemu ba Yehowa, kumupeshabu mukanda wa Vous pouvez vivre éternellement sur une terre qui deviendra un paradis.a Pangakawubala, malu amvua mupetamu akankemesha. Ngakasanka bikole pangakamanya ne: tudi mua kupeta muoyo wa tshiendelele pa buloba bukudimuna mparadizu. Ke dijinga dimvua nadi konso eku, dia kusombela muaba muimpe pa buloba apa ne bantu bandi munange kakuyi bualu bua kufua to. Mvua musue kulua mulunda wa Mufuki wanyi muena muoyo wa kupa udi mutulaye nsombelu mulenga eu.

Ngakamona ne: bivua bijinga nshintuluke, kadi mvua kabidi dijinga ne diambuluisha. Ke bualu kayi ngakalomba mulunda wanyi mukuabu bua antuangaje ne Michel, Ntemu uvua misionere uvua umulongesha Bible.

Pangakatuilangana ne Michel anu dituku adi, wakangambila bua kuya kubuela mu Mpungilu uvua wenzeka mu Matoury pabuipi ne Cayenne, tshimenga tshikulu tshia Guyane, muntatshi wa kilometre mipite pa 240 ne muaba utuvua au. Mvua ne nsuki mile ne miedi milekelela kayiyi mibeya to. Mvua muvuale tshipanupanu tshia mekala a bungi ne tshimutelu tshimpite bunene. Nansha mumvua ne tshimuenekelu tshibi, Bantemu bakangambuluisha bua mfike muaba wa mpungilu, kumpeshabu biakudia, ne kunkebelabu muaba wa kusombela. Dinanga ne muoyo wa kupa bivuabu nabi biakanjadikila ne: mvua mupete bulelela.

Bavua bumvuije 1 Timote 5:8 mu mpungilu au. Mvese eu udi uleja mudi mfumu wa dîku muimpe ne bua kukumbajila bena mu dîku diende majinga abu. Ngakalonga ne: Yehowa nTatu wetu, ke bualu kayi neatungunuke anu ne kutabalela bena mu dîku diende. Ke meme kumona ne: meme muteke malu a Yehowa pa muaba wa kumpala mu nsombelu wanyi, tshiakusamisha mutu to, neantabalele. Tshilejilu tshia Michel tshiakanjadikila bualu ebu. Bualu nansha muvuaye mudifile bikole mu malu a Yehowa, kavua mupangile tshintu to; ne uvua anu ne disanka.

Bu mumvua ntungunuka ne kulonga Bible, ngakatuadija kushintuluka. Ngakapangadija bua kulekela kunua makanya ne diamba. Diakamue ngakosha makanya ne diamba bimvua mushale nabi, ne ngakabilekela kubilekelamu. Ngakabanga kubuela mu bisangilu. Dimue dituku pangakaya mu bisangilu, ngakalomba muanetu wa balume mukuabu bua ankose nsuki mile imvua nayi, yeye kuyinkosa anu ku Nzubu wa Bukalenge aku.

Mbingu mikese pashishe, ngakumbuka mu dingumba dietu adi, meme kupingana mu France. Ngakapetamu kabidi Nzubu wa Bukalenge, meme kutungunuka ne kulonga Bible. Nansha mukavua nsombelu wanyi mulengele, bivua bipitshila bena mu dîku dietu bua munkavua mushintuluke. Tshivua nnua kabidi makanya ne maluvu anyi nya mu bisankasanka to. Nansha nanku, kabavua banyisha malu amvua mbambila to, bualu tshivua mbambilawu ne bukalanga to. Pashishe ngakalonga ne: bivua bikengela ngikale nyukila nabu ne dîyi dimpe ne mbanemeka.

Ngakabatijibua mu 1996. Ngakambila Yehowa mu disambila bua kulua misionere anu bu Michel. Buanyi meme, kulua misionere ke mushindu mutambe buimpe wa kuleja Yehowa dianyisha.

TATU WANYI WA MU DIULU WAKAMBENESHA BIKOLE

Mu tshisumbu tshimvua muvua nsongakaji mukuabu muimpe kumona uvua munsankishe, diende divua Claudine. Uvua uyisha ne tshisumi ne mandamuna avuaye ufila mu bisangilu avua aleja muvuaye munange Yehowa bikole menemene. Meme kumona ne: mbimpe tutuadije kutantshilangana nende. Kadi mvua musue kuanji kumanya ni uvua pende musue kulua misionere. Wakangambila ne: uvua musue. Tuakaselangana mu ngondo 4/2000.

Tuakatuadija bumpanda-njila tshidimu tshiakalonda. Pakapita matuku tuakapangadija bua kulonga muakulu wa Mandarin bua kuambuluisha kasumbu ka muakulu wa tshiena Chine kavua pabuipi ne tshisumbu tshimvua. Muakulu au uvua munkolele be! Bivua bikengela ntuadije kuela meji anu bu bena muakulu au ne ngikale nkeba ngenyi mimpe ya malu a mu Bible a kubalongesha. Mu kuamba kuimpe ntshivua anu ne lutatu lua kuwakula. Kadi mvua anu ndienzeja, ne netuikale anu tuvuluka bikondo bimpe bituvua tuyisha ne bena Kristo netu ba mu Chine. Tshivua dibenesha dinene kutudi ne dilongesha bua midimu mikuabu ituvua mua kulua kupeta.

NTATU INGAKAPETA

Mvua mutantamene imue ntatu mu kupita kua bidimu. Tshilejilu, mvua ngela meji ne: bionso bimvua ngenzela Yehowa ne bena Kristo nanyi kabivua bimpe menemene to. Ke bualu kayi mvua mpitshisha dîba dia bungi bua kulongolola miyuki ivuabu bampesha. Nansha nanku, mvua anu ndiumvua mubungame, bualu mvua mmona ne: tshivua ngenza miyuki ayi bimpe to. (Muam. 7:16) Bivua bikengela mmanya ne: Yehowa nTatu wa dinanga, katu ukeba bua tuenze malu bu bantu bapuangane to. Kadi utu wanyisha bionso bitudi tuenza ne muoyo wetu mujima.

Bakanteka mutangidi wa tshijengu muambuluishi mu Paris. Mvua ndimona muana mutekete, tshiyi mukumbane bua kuenza mudimu au to. Kadi ngakalonga ne: nyuma muimpe wa Yehowa utu utuambuluisha bua kukumbaja midimu minene itudi katuyi mua kukumbaja ku bukole buetu nkayetu.

Kuvua bualu bukuabu buvua buntatshisha. Katshia ku buana, mvua ne disama divua dienza bua ngikale nsuluila bikole. Bisululu bivua bitamba kuntuka nangananga mu bianza. Kadi malu atu anyanguka bikole pantu ne kabuôwa, tshilejilu pantu ngakula kumpala kua bantu mu mpuilu anyi mu mpungilu. Kadi pantu nsambila, Yehowa utu ungambuluisha bua kutukija. Nansha mudi lutatu elu kaluyi lujike, pantu ngeyemena Yehowa bikole, ntu ntukija ne tshiyi ntamba kutuka bisululu to.

Mu 2011, Yehowa wakandamuna dilomba dia tshintu tshituvua bindile ne muoyo mujima kukadi bidimu bia bungi. Tuakatuadija mudimu wa bu misionere mu Nouvelle-Calédonie, mu bidiila bidi ku Sud-Ouest kua mbuu wa Pacifique, muaba wa ntata wa kilometre mipite pa 16000 ne Paris. Tuvua kabidi bapete ntatu muaba eu. Tuvua ne bua kuibidilangana ne biakudia bia muaba au bu mudi: tshiombe, matabala ne bimena. Tuvua kabidi ne bua kuibidilangana ne mitoyi ya nzolo ivua isama ne ya mbua ivua ibuluka; bitunyangila tulu tua patshiatshia. Tuvua ne bua kuibidilangana kabidi ne mushindu wa kuakula wa bena muaba au. Bantu ba muaba au bavua bandamunangana ne makiki pamutu pa kuandamuna ne dîyi dia mukana.

Yehowa uvua anu utuambuluisha bua kuibidilangana ne mudimu wonso utuvua tupeta mu bulongolodi buende. Tudi benze mudimu wa bu misionere ne bambuluishe ku Betele bidimu ndambu. Tuakabuela mu Kalasa ka bamanyishi ba Bukalenge, ne mpindieu tudi mu mudimu wa butangidi bua tshijengu. Tudi badimuenene mudi Yehowa mutuambuluishe ne nyuma wende mu mudimu wonso utudi benze. Mundongeshe ne: nansha muntu yeye ne matekete, udi anu umuangata ne mushinga. Nunku mvua anu nsambila ne muoyo mujima bua angambuluishe ngikale nkumbaja mudimu wende. Nansha muntshidi anu ne lutatu pantu ngakula kumpala kua bantu ba bungi, Yehowa utu anu ungambuluisha bua kukankamija bana betu ba mu bisumbu bintu nkumbula ne bua kubapesha buludiki budi bukengela.

Mu midimu yonso eyi, mukajanyi Claudine utu anu ungambuluisha bikole. Utu nanyi lutulu lua bungi nansha muntu ngenza bilema. Utu anu uyisha ne tshisumi ne ungelesha diboko mu mudimu utudi tuenza. Katu udiabakena padi mivu ishintuluka anyi bua ntatu ya mu mudimu wa butangidi bua tshijengu to.

Mu mpungilu wa kumpala umvua mubuele, ngakalonga ne: Yehowa Mufuki wanyi Munene utu anu utabalela batendeledi bende. Ke bualu kayi mumbeneshe bikole. Mungambuluishe bua meme kuikala kunemeka bakokeshi ne kuikala ne budipuekeshi. Ndi mulekele balunda babi ba panu bamvua nabu bua mmone mua kutumikila mikenji ya Yehowa. Yehowa mungambuluishe bua kupeta balunda bakuabu bimpe ba bungi. Ndi mupete mukaji muimpe wa dikema. Yehowa mmupeteshe kabidi ditekemena dilenga dia muoyo wa tshiendelele ne bintu bikuabu bimpe.​—Mâko 10:29, 30.