Udi mumanye anyi?

Mmalu kayi avua enzeka kale ku biibi bia bimenga?

KALE, ku biibi bia tshimenga ke muaba uvua bantu babuelela mu tshimenga ne benzela malu makuabu. Bu muvua bantu ba bungi bayaku, kuakalua muaba munene uvua malu a bungi enzekela. Mu Bible, mbatele biibi bia tshimenga misangu mipite pa 50, ne malu avua enzekelaku.

Bantu bavua batuilangana ku biibi bia tshimenga. Muaku wa mu tshiena Ebelu udibu bakudimune ne: tshiibi tshia tshimenga udi ne diumvuija dialabale. Kawena umvuija anu tshibuelelu tshia tshimenga to, kadi udi umvuija kabidi muaba udibu bibake bimpe lua ku tshibuelelu tshia tshimenga anyi tshia musoko. Mu bimue bimenga, bavua bibake miaba mialabale ya tshinsangansanga ku biibi bua bantu bikale badisangishilapu.​—Neh. 8:1.

Bantu bavua bendela mushinga ku biibi bia tshimenga. Bimue biibi bia mu Yelushalema bivua bipetele mêna abi ku bintu bivuabu bapana pabuipi apu; bu mudi Tshiibi tshia Mishipa ne Tshiibi tshia Mikoko.​—Sef. 1:10; Yone 5:2.

Bantu bavua bendela mushinga ku biibi bia tshimenga ne bavua bayaku kabidi bua malu abu makuabu. Abalahama ne Boaza bakapetangana ne bantu bakuabu bilondeshile mikenji ya ditunga kumpala kua bantu ku biibi bia tshimenga. (Gen. 23:10-15, 17, 18; Luta 4:1, 10) Bamue bantu bavua benza ngendu bavua balala miaba ya tshinsangansanga ivua ku biibi bia tshimenga biobi ne: muntu nansha umue kavua mubapeshe muaba wa kulala. Bantu bavua baya kabidi ku biibi bia tshimenga bua kuteleja ngumu.​—2 Sam. 18:24, 25.

Balumbuluishi bavua balumbuluishila bantu pabuipi ne biibi bia tshimenga. Bavua bakosa bilumbu kumpala kua bantu bavua mua kuteleja bijadiki bivua bantemu bafila ne dipangadika dia ndekelu divuabu bangata. (Dut. 21:18-20) Kulumbuluisha kumpala kua bantu kuvua kubambuluisha bua balumbuluishe ne buakane ne bangate mapangadika mimpe. Pavua balumbuluishi bangata dipangadika, bakokeshi bavua batumikila dipangadika diabu adi diakamue. (Dut. 25:2) Bivua bikengela balumbuluishi bikale benza malu makane ne badituala bimpe ku biibi bia tshimenga.​—Dut. 16:18-20; Yobo 29:7, 11-17.

Bantu ba lulamatu bavua bakankamija bena Isalele bavua ku biibi bia tshimenga bua kueyemena Yehowa. Baprofete ne bantu bakuabu bavua baya kuakuila ku biibi bia tshimenga bualu bavua bamanye ne: ke muaba uvua bantu ba bungi. (1 Bak. 22:10; Yel. 17:19, 20) Tshilejilu, Mukalenge Yehu wakamba kumpala kua bantu bonso ne: Yehowa mmukumbaje dîyi divuaye muambe bua nzubu wa Ahaba. (2 Bak. 10:8-10) Mukalenge Hezikiya wakasangisha bamfumu ba basalayi bende ku biibi bia tshimenga bua kubakankamija bua bikale beyemena Yehowa.​—2 Kul. 32:6-8.

Bible udi wamba ne: “Meji malelela” adi ela mbila ne abandisha dîyi diawu “ku bibuelelu bia biibi bia musoko.” (Nsu. 1:20, 21) Mu Isalele wa kale, bantu ba lulamatu bavua bapeshangana mibelu ku biibi bia tshimenga ne bangata mapangadika mimpe. Lelu eu, tudi tupetela meji a Yehowa mu Bible, ne batendeledi bende ba miaba yonso badi bambuluisha bantu bakuabu bua kubala Bible bua kupeta meji malelela aa.