Mutshi utu wela bilongo kumpala kua mitshi mikuabu

Mutshi wa amande ngumue wa ku mishindu ya mitshi 30 idibu batele mu Bible. Udi munkatshi mua mitshi itu yela bilongo kumpala kua mitshi mikuabu patu muvu wa mashika makole ujika. Ku ndekelu kua ngondo wa kumpala, bantu batu batuadija kumona bilongo biayi bikunzubile anyi bitoke, dîba didi mitshi mikuabu kayiyi mianji kuela bilongo to. Dîna dia mutshi wa amande mu tshiena Ebelu didi diumvuija ku muaku ku muaku mutshi utu “ubika patshiatshia.” Mutshi eu mmufuanangane ne Mufuki wawu ku tshinyi?

Mu dimanyisha dia kuinshi kua dibeji didi mu Yelemiya 7:25, Yehowa udi wamba nkayende mutuye ujuka patshiatshia bua kutuma baprofete bende. Mu Tshibumba tshia Nsentedi tshia dia 15/3/2011 mbambamu ne: “Anu mutu mutshi wa amande ‘ubika’ anyi wela bilongo kumpala kua dîba, ke muvua Yehowa pende ‘mubike pa lunkelu’ mu mushindu kampanda . . . bua kudimuija bantu bende ku dikenga divua mua kubakuata bua dibenga kutumikila diabu. . . . Kavua mua kuikisha to, kadi uvua ne bua ‘kushala mutabale’ too ne pavua diyi diende dia buprofete dikumbana.”​—Yel. 1:11, 12.

Mu Bible batu batela kabidi bilongo bitoke bia mutshi wa amande bua kuakula bua nsuki mitoke ya bantu bakadi bakulakaje. (Muam. 12:5) Nansha pavua Besalele muenze tshitekelu tshia miendu ya mu ntenta wa tshitendelelu, wakenza bua tuntaku tuvua ku mulamba wa tshitekelu tuvuabu belela mafuta tuikale tufuanangane ne bilongo bia mutshi wa amande.​—Ekes. 37:17-20.