Mudi mudimu wa buakuidi uleja mudi Yehowa mutunange

1. Bua tshinyi muntu yonso utu anu dijinga ne diambuluisha?

MUNTU yonso utu anu dijinga ne diambuluisha. Bua tshinyi? Bualu katshia Adama ne Eva babenga kutumikila Nzambi, bantu bonso badi baledibua bena mpekatu; nunku kabatu baledibua bikale balunda ba Nzambi to. (Ef. 2:12; Kolos. 1:21) Nunku mpekatu au mmuenze anu bu lubuwa lunene pankatshi pa bantu ne Nzambi, ludi lubapangisha bua kufika kudiye. Bantu bobu kabayi pabuipi nende, kabena mua kupeta nsombelu wa disanka dilelela ne ditekemena bua matuku atshilualua to. Ntshinyi tshivua Yehowa muenze bua kuambuluisha bantu?

2. Ntshinyi tshituamona mu tshiena-bualu etshi?

² Bua kutupikula ku mpekatu, Yehowa uvua mulongolole bua kuikale mudimu wa buakuidi. Ke tshivuaye muenzele bena Isalele, pashishe kuluaye kuteka Yezu bu Muakuidi munene wa tshisumbu tshia bena Kristo too ne lelu. Mu tshiena-bualu etshi netumone muvua mudimu wa buakuidi muambuluishe bantu kale. Netumone kabidi mudiwu utuambuluisha lelu ne mu matuku atshilualua. Ndekelu wa bionso netumone mudiwu uleja ne: Yehowa mmutunange bikole.

MUVUA MUDIMU WA BUAKUIDI MUAMBULUISHE BENA ISALELE

3. Bilondeshile Ebelu 5:1, mmunyi muvua bakuidi bambuluisha bantu bavua batendelela Yehowa ne muoyo mujima? (Tangila kabidi tshimfuanyi.)

³ Mupostolo Paulo wakumvuija tshivua tshisake Yehowa bua kutekela bena Isalele muakuidi munene. (Bala Ebelu 5:1.) Uvua musue bua bikale pabuipi nende. Muakuidi munene ke muntu uvua Yehowa muteke ‘ku mutu kua malu avua atangila Nzambi’ bua bantu. Bakuidi bavua bambuluisha bantu bavua batendelela Nzambi ne muoyo mujima bua basemene kudiye mu mushindu uvuaye wanyisha, bienze anu bu ne: bavua bela tshilamba pa lubuwa luvua pankatshi pabu nende.

4. Bakuidi bena Isalele bavua baleji mpala ba Nzambi kumpala kua bantu mushindu kayi?

⁴ Mona mishindu ibidi ivua bakuidi bambuluisha bena Isalele bua kusemenabu pabuipi ne Yehowa ne kumuenzela mudimu mu mushindu uvuaye wanyisha: Wa kumpala, bakuidi bavua baleji mpala ba Nzambi kumpala kua bantu pavuabu babalongesha. Bua tshinyi tudi tuamba nanku? Malaki 2:7 udi wamba ne: “Bualu mishiku ya muakuidi idi ne bua kulama dimanya, ne bantu badi ne bua kukeba mukenji mukana muende, bualu yeye udi mutuadi wa mukenji wa Yehowa wa biluilu.” Nunku bakuidi bavua ne mudimu wa kulongesha bena Isalele Mikenji ya Mose bua bayumvue bimpe ne bayitumikile. Tshilejilu, mu matuku a Nehemiya, bena Lewi 13 bavua bambuluisha muakuidi Ezela bua kumvuija bantu Mikenji ya Mose ivuabu bababadila. Abi bivua biambuluisha bena Isalele bua kutumikila mikenji ya Nzambi ne kusemena pabuipi nende menemene.​—Neh. 8:2, 3, 6-8.

5. Bakuidi bena Isalele bavua baleji mpala ba bantu kumpala kua Nzambi mushindu kayi? Bidi bitulongesha tshinyi bua Yehowa?

⁵ Mushindu muibidi, bakuidi bavua baleji mpala ba bantu kumpala kua Nzambi bualu bavua balambula Nzambi milambu bua bualu buabu. Bena Isalele bavua batuishibue ne: bavua benza bilema dituku dionso ne bamanye ne: bivua bikengela Yehowa ababuikidile. (Mis. 51:9) Ke bualu kayi Yehowa wakateka bakuidi bua bikale balambula milambu bua bualu buabu bua ababuikidile. Pavua muena Isalele unyingalala bua mpekatu yende ne ujingulula ne: Yehowa mmumubuikidile, uvua umvua disulakana dia dikema! Mudimu wa buakuidi udi uleja mudi Yehowa mutunange, utumvuila luse, musue bua tuikale ne disanka ne ndekelu wa bionso tupete lupandu.

MUDIMU WA BUAKUIDI KALE, LELU, NE MU MATUKU ATSHILUALUA

6. Bua tshinyi Yehowa wakabikila bamue bantu ne: “bakuidi” kumpala mene kua yeye kutekela bena Isalele bakuidi?

⁶ Yehowa utu anu musue kuikala mu malanda mimpe ne batendeledi bende badi bamutumikila. Kumpala menemene kua Yehowa kutekela bena Isalele bakuidi, bamfumu ba mêku ke bavua balambula milambu buabu bobu nkayabu ne bua bena mu mêku abu. Tshilejilu, pakapatuka Noa mu buatu, wakalambula Yehowa nyama bua kumuela tuasakidila. (Gen. 8:20) Abalahama wakasa pende bioshelu bua kulambula Yehowa milambu. (Gen. 12:7, 8) Yobo pende wakalambula Yehowa milambu ya kuosha bua bana bende. (Yobo 1:5) Ke bualu kayi Yehowa wakabikila bamue bantu ne: “bakuidi” kumpala mene kua yeye kutekela bena Isalele bakuidi. Yehowa wakambila bena Isalele ne: “Bakuidi [bamfumu ba mêku] batu basemena pabuipi ne Yehowa pa tshibidilu badijidile, bua Yehowa kabakumi.”​—Ekes. 19:22.

7. Melekisedeke uvua nganyi? Uvua tshimfuanyi tshia Masiya mushindu kayi?

⁷ Melekisedeke ke muntu wa kumpala udibu babikile mu Bible ne: “muakuidi.” (Gen. 14:18) Uvua kabidi mukalenge. Pashishe Yehowa wakalaya ne: Masiya uvua ne bua kulua pende mukalenge ne muakuidi anu muvua Melekisedeke. Kadi malu mimpe avua bantu ne bua kupeta mu bukokeshi bua Masiya avua ne bua kushala kashidi.​—Mis. 110:4; Eb. 7:17.

8. Mbanganyi bavua bakuidi mu Isalele? Mmudimu kayi uvuabu benza?

⁸ Anu mutukadi bamone, pavua Yehowa muvuije bena Isalele bantu bende, wakabatekela bakuidi, kubapeshaye kabidi Mikenji ya Mose. Uvua muleje mu mikenji ayi tshivua bakuidi ne bua kuenza. Yehowa uvua muteke Mose ne muanabu Alona ne ndelanganyi yende bua bikale bakuidi. (Ekes. 40:12-15) Bena tshisa tshia Lewi bavua bambuluisha bakuidi bua kulambula milambu bua tshisamba tshijima ne bua muena Isalele pa nkayende. Yehowa uvua muleje kabidi mishindu ya bintu bivuabu ne bua kulambula bu milambu, tshivuabu ne bua kubifidila ne mushindu uvuabu ne bua kubifila. Mushindu uvua Yehowa mulongolole malu au uvua kadiosha ka bualu buimpe menemene buvua ne bua kuenzeka mu matuku a ndekelu.

9-10. Mbanganyi bikale mua kuenza mudimu pamue ne Yezu bu bakuidi mu Bukokeshi bua bidimu tshinunu?

⁹ Pavua Yezu mubatijibue, wakalua muakuidi munene uvua wenzela Yehowa mudimu mu ntempelo munene wa mu nyuma. (Eb. 8:1) Bidimu bisatu ne tshitupa pashishe, Yezu wakafila muoyo wende mupuangane bu mulambu bua kubuikidila bantu mibi yabu bua kashidi. Mulambu au uvua mupite kule ne kule milambu ya nyama ivua bakuidi balambula mu Isalele. Yezu utshidi anu Muakuidi wetu munene udi wimana kumpala kua Nzambi bua bualu buetu. (Eb. 9:24) Mu Bukalenge bua Nzambi, bela manyi 144000 nebenze mudimu ku luseke luende bu bakalenge ne bakuidi. (1 Pet. 1:3, 4; 2:9) Pikalabu bamane kuya mu diulu, nebenze mudimu pamue ne Nzambi ne Kristo bua kuvuija bantu badi batumikila bapuangane ne kuvuija buloba mparadizu. Tudi bindile ne muoyo kuulu kuulu bua kumona muenzabu mudimu eu!

¹⁰ Tudi balonge ne: Yehowa uvua mutekele bena Isalele bakuidi bua babambuluishe bua basemene pabuipi nende. Milambu ya bungi ivua bakuidi balambula ivua ivuluija bantu ne: bavua dijinga ne tshia kubapikula natshi. Yehowa neatungunuke ne kuenza mudimu ne Yezu pamue ne bela manyi 144000 mu Bukokeshi bua bidimu tshinunu bua Kristo bua kuvuija bantu bapuangane. Pashishe bantu kabakuikala kabidi dijinga ne mudimu wa buakuidi to. Mmunyi mudi kumanya bualu ebu kutusemeja pabuipi menemene ne Yehowa? Ke bualu butuakonkonona mpindieu.

MUDI MUDIMU WA BUAKUIDI UTUSEMEJA PABUIPI MENEMENE NE YEHOWA

11. Mmunyi mudi mudimu wa buakuidi uleja ne: Yehowa mmusue kudia bulunda ne mutendeledi wende yonso?

¹¹ Mudimu wa buakuidi udi uleja mudi Yehowa musue kudia bulunda ne mutendeledi wende yonso. Nansha mudi mpekatu mutusemeje kule ne Yehowa, mmusue kuenza tshionso tshia kuenza bua tudie kabidi nende bulunda bua kashidi. Mmusue tuyukile nende, tumusankishe, tushemeshe nende bulunda ne tushale ne muoyo kashidi. (2 Kol. 5:18) Yehowa mmumanye ne: katuvua ne bualu bubi butuvua benze bua kuledibua bantu bapange bupuangane to. Nunku udi utumvuila luse, wambuluisha yonso wa kutudi bua asemene pabuipi nende bua kumusankisha. Bualu ebu kabuenaku bukusaka bua kumunanga bikole anyi?

12. Bua tshinyi bidi bitukolesha ku muoyo bua mudi Yezu muikale Muakuidi munene udi utuakuila kudi Tatu? (Ebelu 7:25) (Tangila kabidi tshimfuanyi.)

¹² Yezu pende mmusue bua tudie malanda mashême ne Yehowa. Bu mudiye Muakuidi munene, udi “muambuluishi kudi Tatu” udi utuakuila. (1 Yone 2:1; bala Ebelu 7:25.) Mmalu kayi adi Yezu mua kuelela meji kumpala kua kutuakuila kudi Tatu? Udi mua kuela meji a mushindu utudi bakole ne muaba utudi bakolele, bua masama atudi mua kuikala nawu, ne bua tunyinganyinga ne ntatu mikuabu bitudi mua kuikala nabi. Udi mua kuela kabidi meji a ngikadilu mimpe ne bienzedi bimpe bitudi nabi ne bua mutudi tuenzela Yehowa mudimu ne lulamatu. Bu mudi Yezu mumanye malu adi mu muoyo wetu, mmumanye mututu tulomba Yehowa bua atubuikidile ne mututu tudienzeja bua kuenza tshidi tshimpe. Tuikalayi batuishibue ne: Yehowa udi witaba bidi Yezu umuambila bua kutuakuila bualu udi ne luse ne udi pabuipi bua kutubuikidila. (Mis. 86:5) Bushuwa Yehowa ke udi muteke Yezu bua kutuakuila.

13. Bilondeshile Ebelu 4:16, ndiakalenga kayi dikuabu didi mudimu wa buakuidi utupetesha? Bua tshinyi bidi ne mushinga?

¹³ Mudimu wa buakuidi udi utujadikila ne: Yehowa mmusue bua tuyukile nende badilekelele. (Bala Ebelu 4:16.) Bu mudi Yezu muikale Muakuidi wetu munene, bidi bitusaka bua kusambila Yehowa badilekelele. Yehowa mmusue kututeleja patudi tumusambila. Nunku patudi tusambila bidi bileja ne: tudi tumueyemena. Kudi misangu itudi mua kupanga bua kumumvuija mutudi tumvua, pamuapa bua bukole bua kanyinganyinga katudi mua kuikala naku. (Lomo 8:26) Nansha nanku Yehowa utu anu ututeleja, utumvuila ne utuandamuna. Bu mudi Tatu wetu wa mu diulu mutunange ne utumvuila luse, katuelakanyi bua kumuambila idi mitutonde to.

14. Ntshinyi tshivua Yehowa muenze tshidi tshileja ne: mmusue bua bantu bashale ne muoyo kashidi?

¹⁴ Mudimu wa buakuidi udi uleja mudi Yehowa musue bua tushale me muoyo kashidi. (Yeh. 33:11) Milambu ya nyama ivua bakuidi balambula mu Isalele kayivua ijimijila batendeledi ba Nzambi mibi yabu bua kashidi to. (Eb. 7:19) Kadi ivua ileja ne: bavua dijinga ne mulambu mutambe buimpe wa Yezu Kristo. Mulambu eu ke udi wambuluisha bua Yehowa kutubuikidila mibi yetu bua kashidi ne kupetesha bantu badi bamutumikila muoyo wa tshiendelele. Tudi ne dianyisha dia bungi kudi Yehowa bua mulambu eu udi upetesha bantu lupandu.​—1 Yone 4:10.

15. Bua tshinyi padi Yehowa musungule bamue bantu bua balue bakuidi bidi bileja mudiye mutunange?

¹⁵ Bu mudi Yehowa musungule bantu bua balue kuenza mudimu wa buakuidi, bidi bileja mudiye mutunange. Bela manyi badi ne bua kushala ne lulamatu too ne ku lufu anu bu Yezu. (Filip. 2:8; Buak. 2:10) Lulamatu luabu elu ludi ne bua kumueneka kudi bantu bonso. Nunku, tuikalayi batuishibue ne: mu bidimu tshinunu bia bukokeshi bua Yezu, nebatuambuluishe bua kuenza malu mimpe ne bua kulua bapuangane ku kakese ku kakese. Nebatujikijile mpekatu utudi bapiane kudi Adama ne Eva. Netupete malu mimpe onso aa ku diambuluisha dia mulambu wa Yezu. Yezu ne bantu bakokeshaye nabu, nebenze malu a dikema aa too ne palua bantu bonso bapuangane ne palua buloba mparadizu.​—Buak. 22:1, 2.

16. Mmunyi mudi Ebelu 4:15 uleja ne: anu Yezu ke udi mukumbane bua kuikala Muakuidi wetu munene?

¹⁶ Muakuidi wetu munene Kristo mmumanye bimpe ntatu itudi nayi bualu yeye pende uvua ne mubidi wa mashi ne mâyi pa buloba apa. (Bala Ebelu 4:15.) Tshilejilu, utu utshioka anyi? Yezu pende uvua utshioka. (Yone 4:6) Utu umvua nzala ne nyota ya mâyi anyi? Yezu uvua ubiumvua pende. (Mat. 4:2; Yone 19:28) Batu bakuseka anyi bakuluisha bua ditabuja diebe anyi? Ke tshivuabu benzele pende Yezu. (Yesh. 50:6; Yone 15:20) Udi mufuishe anyi? Yezu uvua pende mufuishe mulunda wende Lazalo ne pamuapa Jozefe uvua tatuende mudishi. Nunku tuikalayi batuishibue ne: bu muvua Muakuidi wetu munene eu mutuilangane pende ne ntatu itudi tutuilangana nayi lelu, udi utumvuila ne mmumanye mua kutuambuluisha.

17. Bua tshinyi tudi batuishibue ne: bela manyi nebatumvuile ne nebatuambuluishe bua kulua bapuangane?

¹⁷ Pikala bakuidi 144000 mua kuenza mudimu pamue ne Yezu, nebatumvuile ne nebatuambuluishe bua kulua bapuangane. Pavua bakuidi abu pa buloba, bavua pabu bapange bupuangane. Mbamanye mutu muntu umvua bibi patuye wenza bilema. Mbamanye kabidi mutu muntu umvua padiye usama ne padiye ne malu makuabu adi amutonda. Bonso buabu mba miaba mishilashilangane, bavua ne muoyo mu bikondo bishilangane ne bavua batuilangane ne malu mashilashilangane. Nansha wewe mutuilangane ne lutatu lua mushindu kayi, manya ne: kudi anu umue wa ku bakuidi 144000 uvua pende mutuilangane nalu.

18. Malu onso atudi balonge bua mudimu wa buakuidi adi atulongesha tshinyi bua Yehowa? Ntshinyi tshiudi mua kuenza ne malu au?

¹⁸ Malu onso atudi balonge bua mudimu wa buakuidi adi atulongesha ne: Yehowa mmutunange bikole, udi utumvuila luse, utubuikidila, ne mmumanye ntatu itudi nayi, ne udi utuambuluisha. Satana ke udi utungunuka ne kutubanda, ki n’Yehowa to. (Buak. 12:10) Tudi balonge mu tshiena-bualu etshi ne: Yehowa mmuenze malu a bungi bua tusemene pabuipi nende ne bua tuikale batuishibue ne: tudi mua kumusankisha ne kuikala balunda bende. Enza bua malu au akusemeje pabuipi menemene ne Yehowa ne akuambuluishe bua kumona ne: Yehowa mmukunange ne mmusue kukubuikidila bilema.

19. Mmunyi mutu Yehowa utumona patutu tudipisha?

¹⁹ Imue misangu tudi mua kumona bu ne: bua mpekatu yetu Yehowa ki mmutunange kabidi to. Kadi tshiena-bualu etshi ntshitujadikile ne: Yehowa udi utumvuila. Mmumanye kabidi ne: tudi lupuishi. (Mis. 103:14) Nansha nanku katu wimanyina pa bilema bietu to, kadi udi wimanyina pa malu mimpe atudi nawu, pa dijinga dietu dia kushintuluka, ne pa tshitudi mua kuikala mu matuku atshilualua. Bituikale anu tudipisha, mbimpe tuvuluka ne: Yehowa “mmunene kupita mioyo yetu ne mmumanye malu onso.”​—1 Yone 3:20.

20. Bua tshinyi udi ne dianyisha bua mudimu wa buakuidi? Udi mudisuike bua kuenza tshinyi?

²⁰ Anu mutudi bamone mu tshiena-bualu etshi, mudimu wa buakuidi udi utuambuluisha bua kutendelela Yehowa mudiye musue. Mmusue bushuwa bua tuikale pabuipi nende. Mmulongolole mudimu eu bua kuambuluisha batendeledi bende ba lulamatu bua badie nende bulunda nansha mudibu bapange bupuangane. Mbimpe tuleje mutudi ne dianyisha bua mudimu wa buakuidi eu ne tutumikile mubelu udi mu Ebelu 4:16 wa ne: “Nunku tusemenayi ku nkuasa wa bukalenge wa ngasa ne dikima dia kuakula, bua tupete luse ne ngasa bua kutuambuluisha pa dîba dikumbane.”