LyaChiwana, March 28
Naukakinduluka cheka kulukungu.—Kupu. 3:19.
Katweshi nakusaka kulimbenja ngana muze valingile vaAlama naEveko. Tunahase kulihenda kuchuma kana kachi nge natulinangula hali Yehova, nakumona vilinga vyenyi kupwa vyavilemu nakutachikiza kanawa vishinganyeka vyenyi. Nge natulinga ngocho, kaha natuzanga chikuma Yehova. Achishinganyekenu hamujimbu waApalahama. Ou lunga azangile Yehova chikupu. Apalahama kalikangile kuli Yehovako nahalwola chamukaluhwilile kutachikiza jishimbi jenyi. Chipwe ngocho, azachile noho hakumina ngolo jenyi mangana atachikize kanawa Yehova. Chakutalilaho, omu atachikijile vishinganyeka vyaYehova kutalisa kukunongesa Sotome naNgomola, hakavanga evwile woma ngwenyi “Muka-kuyula vaka-mavu vosena” mwanongesa vaka-kwoloka navaka-kuhuka hamwe. Apalahama amwene chuma kana kupwa chakuhenga, ngocho ahulishile Yehova vihula vyavivulu mujila yakavumbi. Kaha Yehova akumbulwile vihula vyenyi. Kutwala muze, Apalahama atachikijile jino ngwenyi Yehova eji kukekesanga mumuchima wamutu himutu, kaha keshi kuhasa kuzangamisa muka-kwoloka hamwe namuka-kuhukako.—Kupu. 18:20-32. w22.08 28 ¶9-10
LyaChitanu, March 29
Muka-kushishika eji kulamanga vihande vyakusweka.—Vishi. 11:13.
Mumwaka wa 455 B.C.E., omu Nguvulu Nehemiya akumishile kutungulula nganda yaYelusalema, atondele malunga vakushishika mangana valame kanawa nganda. Ngocho atongwele malunga vamwe kuhakilako naHananyiya uze apwile mukulwane waZuvo Yakukola. Mbimbiliya yavuluka ngwayo, Hananyiya “apwile lunga wakushishika, kaha evwilenga woma Kalunga wamuchano kuhambakana vakwavo.” (Nehe. 7:2) Hananyiya azachilenga nangolo kala mulimo vamuhanyine mwomwo azangile Yehova nakumwivwa woma kuchina mwamwivwisa kupihya. Nayetu nawa nge natupwa navilinga kana, kaha vakwetu navatufwelela. Talenu nawa hachakutalilaho chikwavo chaTukiku. Apwile sepa lyakaposetolo Paulu uze afwelelele chikuma. Paulu apendaminyine hali Tukiku, kaha ambile ngwenyi Tukiku apwile “muka-kuzata wakushishika.” (Efwe. 6:21, 22) Paulu amufwelelelele hakumuhana mulimo wakumutwalilangako mikanda kuli vandumbwenyi kuEfwesu nakuKolose, nakuvakolezeza nakuvavendejeka. Tukiku eji kutwanukisanga tushinganyeke hali vandumbwetu vamalunga vakushishika vaze vali nakutuzakama kushipilitu makumbi ano.—Kolo. 4:7-9. w22.09 9-10 ¶5-6
LyaSateli, March 30
Zangi yeji kufwikanga jishili jajivulu.—Petu. 1, 4:8.
Yosefwe amwene ukalu waunene chikuma kafwe hamyaka 13. Echi pamo kachi chalingishile Yosefwe ashinganyeke ngwenyi Yehova kamuzangako. Kaha nawa kachi pamo chamulingishile ashinganyeke ngwenyi Yehova namuseze halwola asakiwile kumukafwa. Oloze Yosefwe kapihililileko. Alamine uhashi wenyi wakushinganyeka hakuunda muchima. Kaha omu apwile nalwola luze atelelele kulinga sambanjinga kuli vandumbwenyi, kalingile ngochoko, oloze avasolwelele zangi nakuvakonekela. (Kupu. 45:4, 5) Yosefwe alingile vyuma kana mwomwo apwile nakushinganyeka mujila yakwoloka. Kashinganyekele haukalu wenyiko, oloze ashinganyekelenga havyuma vize asakile Yehova. (Kupu. 50:19-21) Vyuma muka natulinangulako? Kachi nge vakwetu vanatulingi mwamupi, katwatela kupihilila naYehova chipwe kushinganyeka ngwetu natusezeko. Oloze twatela kushinganyeka omwo ali nakutukafwa mangana tumike muvyeseko. Kaha nawa nge vatu navatulinga mwamupi, katwatela kutala hatutenga twavoko, oloze twatela kuvasolwela zangi. w22.11 21 ¶4