Nya oʼkx tuʼn t-xi kyqʼamaʼn mambʼaj kye kykʼwaʼl alkye bʼaʼn ex alkye nya bʼaʼn. Ax ikx tbʼanel qa ma che onin kyiʼj tuʼn kyximen kyiʼj xjel ik tzeʼn qe jlu: «¿Tiquʼn mintiʼ in tzaj tqʼoʼn Tyol Dios ambʼil tuʼn tkubʼ qbʼinchaʼn junjun tiʼchaq in nok kyqʼoʼn txqantl te tbʼanel? ¿Tiquʼn qʼuqli tkʼuʼja tiʼj qa in che onin tiʼja qeju kawbʼil in tzaj tqʼoʼn Tyol Dios?» (Is. 48:17, 18). Aj ttzaj tqʼamaʼn jun kʼwaʼl qa taj tuʼn tjaw aʼ twiʼ, il tiʼj tuʼn kyonin mambʼaj kyiʼj tuʼn kyximen tiʼj aqʼuntl kbʼantel kyuʼn. ¿Tiʼ t-ximbʼetz at kyiʼj tiʼchaq kbʼantel tuʼn aj tjaw aʼ twiʼ? ¿Alkyeqe tbʼanel tiʼchaq che tzajel tkʼamoʼn? ¿Alkyeqe tiʼchaq kwest kʼelel toj twitz? Maske kwest kʼelel junjun tiʼchaq toj twitz ¿tiquʼn in kubʼ t-ximen qa ktzajel tkʼamoʼn mas nim tiʼchaq tbʼanel? (Mar. 10:29, 30). Nim toklen tuʼn kyximen kʼwaʼl kyiʼj xjel lu naʼmxtoq tjaw aʼ kywiʼ. Ax ikx tbʼanel tuʼn kyonin mambʼaj kyiʼj tuʼn kyximen kyiʼj nya bʼaʼn jaku che tzaj qa mintiʼ ma che nimen, jakulo tzʼok qeʼ kykʼuʼj tiʼj qa mas tbʼanel qa kukx ma txi kynimen qe kawbʼil in tzaj tqʼoʼn Tyol Dios. w17.12 21 taqikʼ 14, 15

Aqeye erman at qkʼujlabʼile kyiʼje, ojtzqiʼn quʼne qa ateʼ junjun kyeye tok jun matij yabʼil tiʼj. Junjuntl in che xqʼuqin kyiʼj toj kyja ma che tijen, maske ax ikx kye ya chʼix kytijen. Atzun junjuntl in nok tilil kyuʼn tuʼn t-xi kyqʼoʼn qe tiʼchaq kye toj kyja, maske mintiʼ in kubʼ kyximen tuʼn t-xi kyqʼoʼn qʼinumabʼil kye, sino oʼkx aju at tajbʼen. Ax ikx ojtzqiʼn quʼne qa ateʼ junjun nya oʼkx in che ok weʼ twitz jun nya bʼaʼn, sino twitz nim nya bʼaʼn toj junx ambʼil. Pero qo ximen tiʼj jlu, qa in nok tkwentin Jehová qe tbʼinchbʼen mintiʼ kychwinqlal, ¿tiʼtzun t-ximbʼetz at tiʼja aj tajbʼena te tukʼil kʼujlabʼil ex nya tuʼnju o bʼaj tbʼinchaʼn teya tuʼn tbʼant tuʼna? (Sal. 19:1, 3, 14). Ojtzqiʼnxixa tuʼn Qtat at toj kyaʼj. Tqʼama Jesús jlu: «Ax ikx kyeye, tkyaqil ttzmal kywiʼye ajlaʼmaj» (Mat. 10:30). Ex jun kyxol qeju aj tzʼibʼil kyiʼj bʼitz tqʼama jlu: «Qeju mintiʼ kypaltil, kwentin qe tuʼn Qman» (Sal. 37:18). Toj juntl yol, ojtzqiʼn tuʼn Jehová qe joybʼil in nok weʼya twitz ex jaku tzaj tqʼoʼn tipumala tuʼn tikʼx tkyaqil jlu tuʼna. w18.01 7 taqikʼ 1; 8 taqikʼ 4

Jaw anqʼin jun okslal tuʼn apóstol Pedro, aju Dorcas tbʼi moqa Tabita ex no tuʼn jlu «nimku xjal e okslan tiʼj Qajaw» tej tok kyqʼoʼn kywitz tiʼj milagr lu. Aʼyeju akʼaj okslal lu jakutoq txi kyqʼoʼn tqanil tiʼj Jesús ex tiʼj tipumal Jehová at tuʼn kyjaw anqʼin kyimni tuʼn (Hech. 9:36-42). Qo xnaqʼtzaʼn tiʼj juntl xjal jaw anqʼin aju ok kyqʼoʼn nimku xjal kywitz tiʼj. Jun qʼij, ex tqʼoʼn apóstol Pablo jun chikʼbʼabʼil aju kubʼ bʼaj toj tmij aqʼbʼil, toj jun ja atz toj tnam Troas, aju at jaʼlo toj jawni te telex qʼij te Turquía. At jun kuʼxun Eutico tbʼi, qʼuqlitoq ex in bʼintoq tiʼj chikʼbʼabʼil ttziʼ jun ventan, ik jtan ex etz tzʼaq toj toxin kol te ja. Bʼalo a Lucas pon keʼyilte tnejel, aju aj qʼanil. Mintiʼ tqʼama qa mintiʼtl tnabʼil, sino tqʼama qa otoq kyim. Kuʼtz Pablo twitz yotx, tzaj tchleʼn t-xmilal ex xi tqʼamaʼn kye kykyaqilx qa mintiʼ otoq kyim Eutico. Nimlo e jaw labʼin xjal ok kykeʼyin milagr lu. «Nimxix qʼuqbʼanjtz kykʼuʼj» tuʼnju ok kykeʼyin tej tjaw anqʼin jun xjal (Hech. 20:7-12). w17.12 5 taqikʼ 10, 11