Zonas
3 Lerla, Zeova ti koz ar Zonas enn deziem fwa. Li ti dir: 2 “Leve, al Niniv, sa gran lavil-la, ek fer li konn mesaz ki mo pe dir twa.”
3 Alor Zonas ti obeir lord Zeova. Li ti leve ek li ti al Niniv. Avredir, Niniv ti enn lavil ki ti bien gran* ek ti bizin trwa zour lamars pou fer letour sa lavil-la. 4 Zonas ti rant dan lavil-la. Li ti marse pandan enn zourne ek li ti pe anons sa mesaz-la: “Dan 40 zour ankor, Niniv pou detrir.”
5 Ek bann dimounn dan Niniv ti koumans ena lafwa dan Bondie. Zot ti dir ar sakenn zot kamarad ki zot pou gard karem, ek zot ti met bann latwal sak lor zot, depi so pli gran ziska so pli tipti. 6 Kan lerwa Niniv ti tann sa, li ti leve depi lor so tronn, li ti tir so linz rwayal, li ti met enn latwal sak lor li, ek li ti asiz dan lasann. 7 Anplis, li ti fer pas enn lanons partou dan Niniv pou dir,
“Par lord lerwa ek so bann zom inportan: Okenn zom ek okenn zanimo, ni bef ni mouton, pa gagn drwa manz nanye. Fode pa zot manze ek fode pa zot bwar delo. 8 Bann zom ek bann zanimo toule-de bizin kouver zot ar latwal sak. Zot bizin sipliy Bondie avek tou zot leker, aret fer seki move, ek aret fer lezot ditor. 9 Ki kone, kitfwa vre Bondie pou sanz* so desizion ek li pou aret ankoler ar nou, lerla nou pa pou mor!”
10 Kan vre Bondie ti trouv seki zot ti fer, ek kouma zot ti kit zot move semin, li ti sanz* so desizion ek li pa ti amenn maler ki li ti dir li pou amenn lor zot.