Ezekiel
17 Zeova ti koz ar mwa ankor enn fwa ek ti dir: 2 “Garson enn zom, dir enn devinet ek rakont enn proverb konsernan lepep Izrael. 3 To bizin dir, ‘Ala seki Segner Siprem* Zeova dir: “Sa gran leg ki ena bann gran lezel, bann long plim dan bout so lezel ek enn plimaz ki epe ek tou kouler la, ti vinn Liban ek ti pran sa bout ki lao net lor enn pie sed la. 4 Li ti kas sa bourzon ki pli lao lor sa pie sed la, ti amenn li dan pei bann komersan* ek ti poz li dan lavil bann komersan. 5 Lerla li ti pran inpe dan bann lagrin sa pei-la ek ti met li dan enn karo ki ena bon later. Li ti plant sa parey kouma enn pie sol* kot ena boukou delo. 6 Alor li ti zerme ek li ti vinn enn pie rezin ki ba ek ki file, avek so bann fey ki ti vir andan ek so rasinn ki ti pouse anba li. Lerla li ti vinn enn pie rezin ek ti gagn bann bourzon ek bann brans.
7 “‘“Ek enn lot gran leg ki ena bann gran lezel ek bann larz plim dan bout so lezel ti vini. Alor sa pie rezin la ti avoy so bann rasinn ver li avek enn gran dezir, lwin ar bann karo kot ti plant li, ek li ti avoy so bann fey ver li pou ki li aroz li. 8 Pourtan ti’nn plant li dan enn bon karo pre kot ena boukou delo, pou ki li prodir bann brans, pou ki li raport frwi, ek pou ki li vinn enn extra gran pie rezin.”’
9 “Dir, ‘Ala seki Segner Siprem Zeova dir: “Eski li pou pouse? Eski personn pa pou ras so bann rasinn ek fer so frwi pouri ek fer so bann bourzon fletri? Li pou vinn telman sek ki pa pou bizin enn lebra for ni boukou dimounn pou derasinn li. 10 Mem si transplant li dan enn lot landrwa, eski li pou pouse? Eski li pa pou sek net kan divan Les pou soufle lor li? Li pou sek dan zardin kot li ti pouse.”’”
11 Ek Zeova ti koz ar mwa ankor enn fwa ek ti dir: 12 “Silteple dir sa pep ki rebel la, ‘Eski zot pa konpran ki sa bann kitsoz-la vedir?’ Dir, ‘Gete! Lerwa Babilonn ti vinn Zerizalem ek li ti pran so lerwa ek so bann prins, ek li ti amenn zot ansam avek li dan Babilonn. 13 Anplis li ti pran enn kikenn dan desandans rwayal, ti fer enn lalians avek li ek ti fer li fer enn serman. Lerla li ti pran avek li bann zom inportan dan pei-la, 14 pou ki rabes rwayom-la ek pou ki li pa kapav releve, pou ki li kapav kontign existe zis si lepep respekte so lalians. 15 Me finalman lerwa ti rebel kont li kan li ti avoy so bann mesaze dan Lezip pou ki li gagn bann seval ek enn gran larme avek zot. Eski li pou reisi? Eski sa kikenn ki fer sa bann kitsoz-la kapav sape ek pa gagn pinision? Eski li kapav kas sa lalians-la ek sape kanmem sa?’
16 “‘“Parey kouma mo vivan,” ala seki Segner Siprem Zeova dir, “li pou mor dan Babilonn, dan plas kot sa lerwa* ki ti fer li* vinn lerwa la reste, parski li’nn mepriz so serman ek li’nn kas so lalians. 17 Ek Faraon so gran larme ek so gran kantite solda pa pou kapav ed li dan lager, kan pou mont bann laranp pou atake ek kan pou aranz bann miray pou anserkle lavil-la, pou ki touy boukou dimounn. 18 Li’nn mepriz enn serman ek li’nn kas enn lalians. Mem si li ti donn so parol,* li’nn fer tou sa bann kitsoz-la, ek li pa pou sape.”’
19 “‘Alor ala seki Segner Siprem Zeova dir: “Parey kouma mo vivan, mo pou fer li pey bann konsekans parski li’nn mepriz mo serman ek li’nn kas mo lalians. 20 Mo pou avoy mo file lor li ek li pou tas dan mo file lasas. Mo pou amenn li dan Babilonn ek mo pou ziz li laba akoz li’nn azir dan enn fason infidel anver mwa. 21 Tou bann fizitif parmi so bann solda pou mor akoz lepe, ek pou dispers tou bann ki reste dan tou direksion.* Lerla zot pou bizin kone ki mwa, Zeova, mo’nn koze.”’
22 “‘Ala seki Segner Siprem Zeova dir: “Mo pou pran enn bourzon lao lor sa gran pie sed la ek mo pou plant li, ek lao lor so bann ti brans mo pou kas enn bourzon bien tann, ek momem mo pou plant li lor enn montagn ki bien ot ek gran. 23 Mo pou plant li lor enn montagn ki ot dan Izrael; ek so bann brans pou pouse, li pou raport bann frwi ek li pou vinn enn extra gran pie sed. Ek tou sort kalite zwazo pou viv anba li ek zot pou res dan lonbraz so feyaz. 24 Ek tou bann pie dan pei-la pou bizin kone ki se mwa Zeova, ki’nn abes sa pie ki ot la ek ki’nn donn loner sa ti pie-la; mo’nn fer sa pie ki ver la sek ek mo’nn fer sa pie ki sek la fleri. Mwa Zeova mo’nn koze ek mo’nn fer li.”’”