Zenez

37 Zakob ti kontign res dan pei Kanaan, kot so papa ti’nn viv kouma enn etranze.

2 Ala zistwar Zakob.

Kan Zozef ti ena 17 an, sa zenom-la ti pe okip troupo avek bann garson Bila ek bann garson Zilpa, bann madam so papa. Ek Zozef ti dir so papa bann move kitsoz ki so bann frer ti pe fer. 3 Izrael ti kontan Zozef plis ki tou so bann lezot garson parski li ti gagn Zozef dan so vie zour, ek li ti fer koud enn long linz ki bien zoli pou li. 4 Kan so bann frer ti trouve ki zot papa ti kontan Zozef plis ki tou bann lezot frer, zot ti koumans ena laenn pou li ek zot pa ti kapav koz bien ar li.

5 Plitar Zozef ti fer enn rev ek li ti rakont sa so bann frer, ek zot ti gagn enn lot rezon pou ena laenn pou li. 6 Li ti dir zot: “Silvouple ekout sa rev ki mo’nn fer la. 7 Nou ti pe atas bann pake dible ansam omilie karo kan mo pake dible ti leve ek inn debout drwat, ek zot bann pake dible ti antour seki pou mwa ek ti kourbe devan li.” 8 So bann frer ti dir li: “Eski vremem to pou fer twa vinn lerwa lor nou ek to pou dominn lor nou?” Alor zot ti trouv enn lot rezon pou ena laenn pou li, akoz so bann rev ek akoz seki li ti dir.

9 Apre sa, li ti fer enn lot rev ek li ti rakont sa so bann frer: “Mo’nn fer enn lot rev. Sann fwa-la, soley, lalinn ek 11 zetwal ti pe kourb zot devan mwa.” 10 Apre sa, li ti rakont sa so papa ansam avek so bann frer, ek so papa ti kriy ar li ek ti dir li: “Ki kalite rev sa? Eski mwa, to mama ek to bann frer vremem pou vinn tom azenou devan twa ziska ki nou fron tous later?” 11 So bann frer ti koumans zalou li, me so papa ti kontign pans lor seki li ti dir.

12 Enn zour so bann frer ti amenn troupo zot papa manze pre ar Sikem. 13 Plitar Izrael ti dir Zozef: “To bann frer pe okip bann troupo pre ar Sikem, pa vre? Al get zot.” Lerla Zozef ti dir li: “Dakor!” 14 Li ti dir Zozef: “Silteple al gete si to bann frer bien. Al gete si troupo-la osi bien ek vinn dir mwa.” Zakob ti avoy li depi vale Ebron ek li ti al dan direksion Sikem. 15 Plitar letan Zozef ti pe marse lor laplenn, li ti zwenn enn misie ki ti demann li: “Ki to pe rode?” 16 Lerla Zozef ti dir li: “Mo pe rod mo bann frer. Silteple, dir mwa kotsa zot inn amenn bann troupo manze?” 17 Misie-la ti dir: “Zot inn kit sa landrwa-la ek mo’nn tann zot dir, ‘Anou al Dotann.’” Alor Zozef ti al rod so bann frer ek li ti trouv zot Dotann.

18 Zot ti trouv li depi delwin ek avan ki li ti ariv kot zot, zot ti koumans fer enn konplo pou touy li. 19 Alor zot ti dir ant zot: “Gete! Ala segner bann rev pe vini. 20 Ale, anou touy li ek anou zet li dan enn sa bann pwi-la. Apre sa nou pou dir ki se enn zanimo sovaz ki’nn devor li. Lerla nou pou gete ki pou ariv so bann rev.” 21 Kan Ribenn ti tann sa, li ti esey sap Zozef. Alor li ti dir: “Pa bizin nou touy li.” 22 Ribenn ti dir zot: “Pa vers disan. Zet li dan sa pwi-la dan dezer, me pa fer li ditor.” Li ti dir sa parski li ti anvi sap Zozef pou ki li kapav retourn li kot so papa.

23 Alor deswit kouma Zozef ti ariv kot so bann frer, zot ti ris sa linz ki Zozef ti mete la, sa long linz ki bien zoli la. 24 Ek zot ti trap li ek zot ti zet li dan pwi-la. Sa lepok-la, pwi-la ti vid; pa ti ena delo ladan.

25 Apre sa, zot ti asize pou manze. Kan zot ti lev zot latet, zot ti trouv enn group Ishmaelit ki ti pe vwayaze ek ki ti sorti Galaad. Zot bann samo ti pe sarye ladanem,* balzam* ek lekors kot kapav gagn larezinn, ek zot ti pe desann Lezip. 26 Lerla Zida ti dir so bann frer: “Ki nou pou gagne si nou touy nou frer ek nou kasiet so lamor? 27 Anou vann li avek bann Ishmaelit ek pa fer li ditor. Apre tou li nou frer, nou disan.” Alor zot ti ekout zot frer. 28 Ek kan bann marsan Madianit ti pe pas par la, zot ti tir Zozef dan pwi-la ek zot ti vann li ar bann Ishmaelit pou 20 pies larzan. Sa bann zom-la ti amenn Zozef dan Lezip.

29 Plitar kan Ribenn ti retourn kot pwi-la, li ti trouve ki Zozef pa ti dan pwi-la, alor li ti desir so linz. 30 Li ti al get so bann frer ek li ti dir: “Zanfan-la nepli la! Ki mo pou fer aster?”

31 Alor zot ti pran Zozef so long linz, zot ti koup likou enn kabri mal ek apre, zot ti plonz linz Zozef dan disan sa kabri-la. 32 Apre sa zot ti avoy sa long linz ki bien zoli la kot zot papa ek zot ti dir: “Ala seki nou’nn trouve. Silteple gete si se linz to garson sa ouswa non.” 33 Lerla Zakob ti examinn linz-la ek ti dir: “Wi, linz mo garson mem sa! Sirman enn zanimo sovaz inn desir Zozef bout-bout ek inn devor li!” 34 Alor Zakob ti desir so linz ek ti met enn latwal sak otour so lerin ek li ti gard dey pou so garson pandan boukou zour. 35 Tou so bann garson ek tou so bann tifi ti kontign esey rekonfort li, me li pa ti aksepte ki rekonfort li. Li ti dir: “Mo pou kontign gard dey pou mo garson ziska ki mo desann dan Tom!”* Ek li ti kontign plor so garson.

36 Pandan sa letan-la, bann Madianit ti vann Zozef dan Lezip ar Potifar, enn ofisie dan lakour Faraon ek sef bann gard rwayal.