Ezekiel
33 Ek Zeova ti koz ar mwa ek ti dir: 2 “Garson enn zom, koz ar bann garson to pep, ek dir zot,
“‘Fer koumadir mo amenn enn lepe kont enn pei, ek tou bann dimounn dan sa pei-la swazir enn zom ek fer li vinn zot gardien, 3 ek li trouv lepe-la pe vinn kont pei-la, li soufle dan korn, ek averti lepep. 4 Si enn kikenn tann son korn-la, me ki li pa pran kont lavertisman-la ek ki enn lepe vini ek touy li,* li pou responsab so prop lamor.* 5 Li ti tann son korn-la, me li pa’nn pran kont lavertisman-la. Li pou responsab so lamor. Si li ti pran kont lavertisman-la, li ti pou gagn lavi sov.
6 “‘Me si gardien-la trouv lepe-la pe vini ek li pa soufle dan korn-la ek lepep pa gagn okenn lavertisman ek ki lerla enn lepe vini ek touy enn parmi zot, sa dimounn-la pou mor pou so prop pese, me mo pou demann gardien-la enn kont pou so disan.’*
7 “Me twa, garson enn zom, mo’nn etabli twa kouma enn gardien pou pep Izrael; ek kan to tann enn parol sorti dan mo labous, to bizin averti zot pou mwa. 8 Kan mo dir enn move dimounn, ‘Move dimounn, vremem to pou mor!’ me ki to pa koze pou averti sa move dimounn-la pou ki li sanz so fason azir, li pou mor kouma enn move dimounn akoz so prop pese, me mo pou demann twa enn kont pou so disan.* 9 Me si to averti enn move dimounn pou ki li sanz so kondwit ek ki li refiz pou sanz so fason azir, li pou mor pou so pese, me pena okenn dout ki twa to pou sap to prop lavi.
10 “Ek twa, garson enn zom, dir lepep Izrael, ‘Zot inn dir: “Nou bann aksion rebel ek nou bann pese pez lour lor nou, ek sa pe fer nou deperi; alor kouma nou kapav kontign res vivan?”’ 11 Dir zot, ‘“Parey kouma mo vivan,” ala seki Segner Siprem* Zeova dir, “Sa pa fer mwa plezir ki enn move dimounn mor, me okontrer mo prefer ki enn move dimounn sanz so kondwit ek kontign viv. Retourne, aret fer bann move kitsoz ki zot pe fer, parski kifer zot bizin mor, A pep Izrael?”’
12 “Ek twa, garson enn zom, dir bann garson to pep, ‘Bann aksion drwat ki enn dimounn drwat inn fer pa pou sap li kan li fer bann aksion rebel; ni bann move aksion ki enn move dimounn inn fer pa pou fer li tonbe kan li aret fer so bann move aksion; ni enn kikenn ki drwat pa pou kapav kontign viv akoz so bann aksion drwat si enn zour li fer pese. 13 Kan mo dir sa kikenn ki drwat la: “Vremem to pou kontign viv,” ek ki li panse ki bann kitsoz drwat ki li’nn fer pou sap li ek ki li fer seki move,* pa pou rapel okenn bann aksion drwat ki li’nn fer, me li pou mor pou move aksion ki li’nn fer.
14 “‘Ek kan mo dir sa move dimounn-la: “Vremem to pou mor,” ek ki li aret fer pese ki li’nn fer ek fer seki zis ek drwat, 15 ek ki sa move dimounn-la retourn seki ti donn li kouma garanti ek ki li rann seki li’nn kokin, ek ki li obeir bann lord ki fer gagn lavi kan li aret fer seki move, vremem li pou kontign viv. Li pa pou mor. 16 Pa pou fer li peye pou* okenn pese ki li’nn fer. Parski li’nn fer seki zis ek drwat, vremem li pou kontign viv.’
17 “Me to pep inn dir, ‘Zeova so fason azir li inzis,’ alor ki an realite se zot fason azir ki inzis.
18 “Kan enn dimounn ki drwat aret fer seki drwat ek fer seki move, li bizin mor pou sa. 19 Me kan enn move dimounn detourn li ar bann move kitsoz ki li’nn fer ek fer seki zis ek drwat, vremem li pou kontign viv parski li’nn fer sa.
20 “Me zot inn dir, ‘Zeova so fason azir li inzis.’ A pep Izrael, mo pou ziz sakenn parmi zot dapre zot fason viv.”
21 Finalman dan 12em lane kot nou ti an exil, dan diziem mwa, lor sinkiem zour sa mwa-la, enn zom ki ti’nn sove depi Zerizalem ti vini ek ti dir mwa: “Lavil inn detrir!”
22 Sa swar avan ki sa zom ki’nn sove la ti vini, pwisans* Zeova ti’nn vinn lor mwa, ek li ti’nn ouver mo labous avan ki zom-la ti vinn get mwa gramatin. Alor mo labous ti ouver, ek mo ti kapav rekoumans koze ankor.
23 Lerla Zeova ti koz ar mwa ek ti dir: 24 “Garson enn zom, bann ki res dan sa bann lavil ki’nn detrir la pe dir konsernan pei Izrael, ‘Abraam ti tousel, ek pourtan li’nn pran pei-la. Me nou nou boukou; vremem inn donn nou pei-la.’
25 “Alor dir zot, ‘Ala seki Segner Siprem Zeova dir: “Zot pe manz laviann avek so disan, zot lev zot lizie ver zot bann zidol degoutan,* ek zot pe kontign vers disan. Alor kifer zot bizin gagn pei-la? 26 Zot inn kont lor zot lepe, zot pe kontign fer zot bann pratik detestab, ek sakenn parmi zot pe dezonor madam so prosin. Alor kifer zot bizin gagn pei-la?”’
27 “Ala seki to bizin dir zot, ‘Ala seki Segner Siprem Zeova dir: “Parey kouma mo vivan, bann ki pe res dan sa bann lavil ki’nn detrir la pou mor avek lepe; bann ki res dan bwa, mo pou fer bann zanimo sovaz manz zot; ek bann ki res dan bann fortres ek dan bann lakav pou mor akoz maladi. 28 Mo pou fer pei-la vinn enn landrwa ki dezer ek abandone net, ek li pou nepli arogan ek orgeye, ek bann montagn Izrael pou vinn dezer kot personn pa pou pase. 29 Ek zot pou bizin kone ki momem Zeova kan mo pou fer pei-la vinn enn landrwa ki dezer ek abandone net akoz tou bann kitsoz detestab ki zot inn fer.”’
30 “Me twa, garson enn zom, to pep pe koz lor twa, sakenn ar zot kamarad pre kot bann miray ek dan bann lantre bann lakaz. Zot pe dir ar zot kamarad, sakenn ar so frer, ‘Vini, ek anou ekout parol ki sorti kot Zeova.’ 31 Zot pou vini kouma enn lafoul pou asiz devan twa kouma mo pep; ek zot pou ekout to bann parol, me zot pa pou met zot an pratik. Parski avek zot labous zot flat twa, me zot leker gourma bann profi malonet. 32 Gete! To kouma enn sante romantik pou zot, ki’nn sante avek enn zoli lavwa ek ki’nn zwe dan enn zoli fason lor enn linstriman ki ena lakord. Zot pou tann to bann parol, me personn pa pou pran kont seki to pe dir. 33 Ek kan sa arive—ek li pou arive—zot pou bizin kone ki ti ena enn profet parmi zot.”