Zenez

47 Alor Zozef ti al get Faraon ek ti fer li konn sa: “Mo papa ek mo bann frer inn sorti dan pei Kanaan avek zot bann mouton ek zot bann kabri, zot bann vas ek zot bann toro ek tou seki zot ti ena, ek zot dan pei Gosenn.” 2 Li ti pran sink parmi so bann frer ek li ti prezant zot Faraon.

3 Faraon ti dir so bann frer: “Ki travay zot fer?” Zot ti reponn Faraon: “To bann serviter bann gardien mouton, nou ek nou bann anset toule-de.” 4 Lerla zot ti dir Faraon: “Nou’nn vinn res kouma etranze dan sa pei-la parski lafaminn bien dir dan pei Kanaan ek pena lerb pou ki troupo to bann serviter manze. Alor silteple les to bann serviter res dan pei Gosenn.” 5 Lerla Faraon ti dir Zozef: “To papa ek to bann frer inn vinn kot twa isi. 6 Pei Lezip pou twa. Fer to papa ek to bann frer res dan pli bon landrwa dan pei-la. Les zot res dan pei Gosenn, ek si parmi zot to konn bann zom ki kalifie, met zot an-sarz mo troupo.”

7 Lerla Zozef ti amenn so papa Zakob ek ti prezant li Faraon, ek Zakob ti beni Faraon. 8 Faraon ti demann Zakob: “Ki laz to ena?” 9 Zakob ti dir Faraon: “Sa fer 130 an ki mo viv kouma enn etranze dan plizir pei. Bann lane mo lavi ti kourt ek difisil. Mo bann anset finn viv pli lontan ki mwa kouma bann etranze dan plizir landrwa.” 10 Apre sa Zakob ti beni Faraon ek li ti sorti devan li li ti ale.

11 Alor Zozef ti fer so papa ek so bann frer res dan Lezip. Li ti donn zot enn plas pou reste dan pli bon landrwa dan pei-la, setadir dan pei Ramses, parey kouma Faraon ti’nn donn li lord. 12 Ek Zozef ti kontign donn so papa, so bann frer, ek tou bann fami so papa manze* dapre kantite zanfan ki zot ti ena.

13 Pa ti ena manze* partou dan pei, parski sa lafaminn-la ti bien dir. Bann dimounn dan pei Lezip ek Kanaan ti pe bien soufer akoz sa lafaminn-la. 14 Zozef ti pe ramas tou kas ki ti ena dan Lezip ek Kanaan kan bann dimounn ti vinn aste lagrin, ek Zozef ti kontign amenn sa kas-la dan lakaz Faraon. 15 Finalman tou kas Lezip ek Kanaan ti fini. Alor tou bann Ezipsien ti vinn get Zozef ek ti dir li: “Donn nou manze! Kifer nou bizin mor devan twa parski nou nepli ena kas?” 16 Lerla Zozef ti dir: “Si zot kas inn fini, donn mwa zot bann zanimo, ek an-retour mo pou donn zot manze.” 17 Alor zot ti koumans amenn zot bann zanimo kot Zozef, ek Zozef ti kontign donn zot manze dan plas zot bann seval, mouton, kabri, vas, toro ek bourik. Li ti kontign donn zot manze dan plas tou zot bann zanimo pandan sa lane-la.

18 Kan sa lane-la ti fini, lane apre zot ti vinn get li ek ti dir: ”Nou pa pou kasiet twa mo segner ki nou’nn fini donn twa tou nou kas ek tou nou bann zanimo. Nou pa res nanye pou donn twa mo segner apart nou lekor ek nou later. 19 Kifer nou bizin mor devan to lizie ek nou later res abandone? Aste nou ek nou later ek an-retour donn nou manze. Lerla nou pou vinn esklav Faraon ek nou later pou vinn pou li. Donn nou lagrin pou ki nou viv ek pa mor ek pou ki nou later pa res abandone.” 20 Alor Zozef ti aste later tou bann Ezipsien pou Faraon. Sak Ezipsien ti vann so terin, parski lafaminn ti bien dir; ek pei-la ti vinn pou Faraon.

21 Lerla Zozef ti fer bann dimounn ki ti res dan diferan parti Lezip al res dan bann lavil. 22 Se zis later bann pret ki li pa ti aste parski Faraon ti pe donn manze bann pret. Akoz samem zot pa ti bizin vann zot later. 23 Apre sa Zozef ti dir bann dimounn-la: “Gete, zordi mo’nn aste zot ek zot later pou Faraon. Ala bann lagrin pou zot. Zot kapav al seme. 24 Kan zot later prodir, donn Faraon enn sinkiem zot rekolt, me leres rekolt-la pou vinn pou zot. Zot pou servi sa pou seme dan bann karo ek pou nouri zotmem, bann ki dan zot lakaz, ek zot bann zanfan.” 25 Alor zot ti dir: “To’nn sov nou lavi. Donn nou to faver mo segner, ek nou pou vinn bann esklav Faraon.” 26 Lerla Zozef ti pas enn lalwa ki ankor existe zordi dan Lezip, ki enn sinkiem rekolt pou vinn pou Faraon. Se zis later bann pret ki pa ti vinn pou Faraon.

27 Izrael ti kontign res dan pei Lezip, dan pei Gosenn. Zot ti gagn boukou dibien laba, zot ti gagn bann zanfan ek zot ti vinn bien boukou. 28 Zakob ti viv dan pei Lezip pandan 17 an. Alor antou Zakob ti viv 147 an.

29 Kan Izrael ti santi ki biento li ti pou mor, li ti apel so garson Zozef ek li ti dir li: “Si mo’nn gagn to faver, silteple met to lame anba mo lakwis ek montre lamour fidel ek fidelite anver mwa. Silteple, pa anter mwa dan Lezip. 30 Kan mo mor to bizin tir mwa dan Lezip ek anter mwa dan tom mo bann anset.” Lerla Zozef ti dir: “Mo pou fer kouma to’nn dir.” 31 Lerla Zakob ti dir: “Fer mwa serman.” Alor Zozef ti fer li serman. Lerla Izrael ti bes so latet devan Bondie kot latet so lili.