Zeremi
25 Parol ki Zeremi ti gagne konsernan tou bann dimounn dan Zida dan katriem lane Zoakim garson Zozias, lerwa Zida, setadir dan premie lane Naboukodonozor,* lerwa Babilonn. 2 Ala seki profet Zeremi ti dir konsernan* pep Zida an-antie ek tou bann abitan Zerizalem:
3 “Depi 13em lane Zozias, garson Ahmonn, lerwa Zida ziska azordi, pandan sa 23 an-la, Zeova ti koz ar mwa, ek mo ti kontign koz avek zot plizir fwa,* me zot pa ti ekoute. 4 Ek Zeova ti avoy tou so bann serviter, setadir bann profet kot zot. Li ti avoy zot plizir fwa,* me zot pa ti ekoute ouswa ouver zot zorey pou tande. 5 Zot ti dir, ‘Silvouple, sakenn parmi zot sanz zot move konportman ek aret fer bann move kitsoz; lerla zot pou kontign res pandan enn bon bout letan dan pei ki depi lontan Zeova inn donn zot ek zot bann anset. 6 Pa swiv bann lezot bondie, pa servi zot ek prostern devan zot, parski zot ofans mwa kan zot fer bann zidol; sinon mo pou amenn maler lor zot.’
7 “‘Me zot pa ti ekout mwa,’ ala seki Zeova dir. ‘Okontrer zot ti ofans mwa kan zot ti fer bann zidol, ek zotmem zot inn amenn maler lor zot.’
8 “Alor ala seki Zeova Sef bann larme dir, ‘“Parski zot pa’le ekout mo bann parol, 9 mo pe apel tou bann fami ki res dan Lenor,” ala seki Zeova dir, “mo pe apel Naboukodonozor,* lerwa Babilonn, mo serviter, ek mo pou amenn zot kont sa pei-la, kont tou so bann abitan ek kont tou bann pep toutotour. Mo pou detrir zot ek mo pou fer zot vinn enn kitsoz ki fer per, enn kitsoz ki bann dimounn pou boufone,* ek enn pil ros pou touletan. 10 Mo pou aret son kontantman ek son lazwa, lavwa nouvo-marye ek lavwa lamarye, son moulin ki tourne avek lame, ek lalimier lalanp. 11 Ek pei-la net pou vinn enn pil ros ek pou vinn enn kitsoz ki fer per, ek sa bann pep-la pou bizin servi lerwa Babilonn pandan 70 an.”’
12 “‘Kan 70 an pou fini pase, mo pou demann lerwa Babilonn ek sa pep-la rann mwa bann kont* pou zot erer,’ ala seki Zeova dir, ‘ek mo pou fer pei bann Kaldeen vinn enn landrwa abandone pou touletan. 13 Mo pou amenn lor sa pei-la tou bann parol ki mo’nn dir kont li, setadir tou seki finn ekrir dan sa liv-la, ki Zeremi inn profetize kont tou bann pep. 14 Parski boukou pep ek bann gran lerwa pou fer zot vinn bann esklav, ek mo pou fer zot peye dapre zot bann aksion ek dapre seki zot inn fer.’”
15 Parski ala seki Zeova Bondie Izrael ti dir mwa: “Pran dan mo lame koup divin mo gran koler ek fer tou bann pep ver ki mo pe avoy twa bwar sa. 16 Ek zot pou bwar, balote ek azir kouma bann fou akoz lepe ki mo pe avoye parmi zot.”
17 Alor mo ti pran koup-la dan lame Zeova ek mo ti fer tou bann pep ver ki Zeova ti avoy mwa bwar sa: 18 Mo ti koumans avek Zerizalem ek bann lavil Zida, so bann lerwa ek so bann prins, pou ki zot vinn enn pil ros, enn kitsoz ki fer per, enn kitsoz ki bann dimounn boufone,* ek enn malediksion, kouma li ete azordi; 19 apre sa mo ti fer sa avek Faraon, lerwa Lezip ek so bann serviter, so bann prins ek tou so pep, 20 ek tou bann ki dan diferan pep ki ti viv parmi zot; tou bann lerwa dan pei Ouz; tou bann lerwa dan pei bann Filistin, Askalon, Gaza, Ekronn, ek sa tigit ki reste dan Asdod la; 21 Edom, Moab, ek bann Amonit; 22 tou bann lerwa Tir, tou bann lerwa Sidon, ek bann lerwa lor lil ki dan lamer; 23 Dedann, Tema, Bouz, ek tou bann ki’nn koup zot seve ziska zot latanp; 24 tou bann lerwa Larabi ek tou bann lerwa ki dan diferan pep ki res dan dezer; 25 tou bann lerwa Zimri, tou bann lerwa Elam, ek tou bann lerwa Medi; 26 ek tou bann lerwa ki dan Lenor, ki zot pre ouswa lwin, sakenn apre zot kamarad, ek tou bann lezot rwayom ki lor later; ek lerwa Sesak* pou bwar apre zot.
27 “Ek to bizin dir zot, ‘Ala seki Zeova Sef bann larme, Bondie Izrael dir: “Bwar, sou, vomi, ek tonbe pou ki zot pa kapav releve akoz lepe ki mo pe avoye parmi zot.”’ 28 Ek si zot pa’le pran koup-la dan to lame pou bwar, dir zot, ‘Ala seki Zeova Sef bann larme dir: “Zot bizin bwar sa! 29 Parski gete! Si pou koumanse mo pe amenn maler lor lavil ki port mo nom, eski zot, zot pou res san pinision?”’
“‘Zot pa pou res san pinision, parski mo pe apel enn lepe lor tou bann dimounn ki res lor later,’ ala seki Zeova Sef bann larme dir.
30 “Ek to bizin anons zot, tou sa bann parol-la ek dir zot,
‘Depi lao Zeova pou kriye,
Ek depi so plas ki sin kot li reste, li pou fer tann so lavwa.
Li pou kriye for kont plas kot li reste pou touletan.
Li pou kriye parey kouma bann ki kraz rezin dan preswar,
Li pou sant enn sante laviktwar kont tou bann dimounn ki res lor later.’
31 ‘Enn tapaz pou rezone ziska dan bout later,
Parski Zeova ena enn dezakor avek bann pep.
Limem li pou rann enn zizman lor tou dimounn.
Ek li pou fer bann move dimounn mor par lepe,’ ala seki Zeova dir.
32 Ala seki Zeova Sef bann larme dir:
‘Gete! Enn maler pe vinn lor bann pep enn deryer lot,
Ek enn gran siklonn pou sorti depi bann parti pli lwin lor later.
33 “‘Ek bann dimounn ki Zeova pou touye sa zour-la pou depi enn bout later ziska lot bout. Pa pou gard dey pou zot, ni pou ramas zot ouswa anter zot. Zot pou vinn kouma fimie lor later.’
34 Kriye ek plore zot bann berze ek kriye for!
Roul anba, zot ki sef parmi troupo-la
Parski inn ariv ler pou touy zot ek pou fann zot partou-partou,
Ek zot pou tonbe kouma enn resipian ki ena valer!
35 Bann berze pena okenn plas pou sove,
Ek bann ki sef parmi troupo-la pena okenn plas pou sove.
36 Ekoute! Bann berze pe kriye for-for
Ek bann ki sef parmi troupo-la pe kriye ek plore,
Parski Zeova pe detrir zot patiraz.
37 Ek pena lavi dan bann landrwa trankil kot bann dimounn ti abitie reste
Akoz gran koler Zeova.
38 Li’nn kit plas kot li reste parey kouma enn zenn lion,
Parski zot pei inn vinn enn kitsoz ki fer per
Akoz lepe ki san pitie
Ek akoz so gran koler.”