Ezekiel

10 Pandan ki mo ti pe gete, mo ti trouv par lao sa platform ki ti lao latet bann seribin-la enn kitsoz ki ti koumadir enn safir lao zot, ek li ti resanble enn tronn. 2 Alor li ti dir sa zom ki ti ena enn linz an lin lor li la: “Rant ant bann larou, anba bann seribin, ek ranpli to de lame avek labrez ki ena ant bann seribin ek zet zot lor lavil-la.” Alor li ti rantre pandan ki mo ti pe gete.

3 Bann seribin ti pe debout dan kote drwat lakaz-la kan zom-la ti rantre, ek niaz-la ti ranpli lakour ki andan. 4 Ek laglwar Zeova ti monte depi kot bann seribin pou al ziska lantre laport lakaz, ek tigit-tigit lakaz-la ti ranpli ar niaz-la, ek lakour ti ranpli ar laglwar Zeova ki ti pe eklere. 5 Ek ti kapav tann son lezel bann seribin dan lakour ki andeor, sa ti parey kouma son Bondie Tou-Pwisan kan li koze.

6 Lerla li ti donn sa zom ki ti ena enn linz an lin lor li la sa lord-la: “Pran dife ant bann larou, ant bann seribin,” ek li ti rantre ek ti debout akote larou-la. 7 Lerla enn parmi bann seribin ti avoy so lame ver sa dife ki ti ant bann seribin la. Li ti pran inpe ladan ek ti met sa dan toule-de lame sa zom ki ti ena enn linz an lin lor li la. Apre sa, zom-la ti pran sa dife-la ek ti ale. 8 Anba lezel bann seribin ti ena seki ti paret koumadir bann lame imin.

9 Pandan ki mo ti pe gete, mo ti trouv kat larou akote bann seribin, enn larou akote sak seribin, ek bann larou-la ti pe paret pe eklere parey kouma krizolit. 10 Konsernan zot laparans, toule kat larou ti parey, zot ti koumadir enn larou dan enn lot larou. 11 Kan zot ti pe bouze, zot ti kapav al dan toule kat direksion san ki zot vire, parski zot ti al dan plas kot latet-la ti pe gete, san ki zot vire. 12 Zot lekor an-antie, zot ledo, zot lame, zot lezel, ek bann larou, bann larou toule kat seribin-la, ti ranpli ar lizie toutotour. 13 Konsernan bann larou-la, mo ti tann enn lavwa kriye pou dir zot, “Bann larou!”

14 Sakenn* ti ena kat figir. Premie ti figir sa seribin-la, deziem ti figir enn zom,* trwaziem ti figir enn lion, ek katriem ti figir enn leg.

15 Ek bann seribin-la ti monte—zot ti bann mem kreatir vivan* ki mo ti’nn trouve kot larivier Kebar— 16 ek kan bann seribin-la ti bouze, bann larou-la ti bouz ansam avek zot; ek kan bann seribin-la ti lev zot lezel pou mont pli lao ki later, bann larou-la pa ti vire ek zot ti res akote bann-la. 17 Kan bann seribin-la ti res anplas, bann larou-la ti res anplas; ek kan bann seribin-la ti monte, bann larou-la ti mont avek zot, parski lespri sin ki ti pe azir lor bann kreatir vivan la ti dan bann larou-la.

18 Lerla laglwar Zeova ti kit lantre laport lakaz-la ek ti res anplas lao bann seribin. 19 Pandan ki mo ti pe gete, bann seribin ti lev zot lezel ek ti monte depi later. Bann larou-la ti osi ansam akote zot kan zot ti pe ale. Zot ti arete kot lantre laport ki dan Les dan lakaz Zeova ek laglwar Bondie Izrael ti lao zot.

20 Sa ti bann kreatir vivan* ki mo ti’nn trouve anba Bondie Izrael kot larivier Kebar, se koumsa ki mo’nn kone ki zot ti bann seribin. 21 Zot toule kat ti ena kat figir, kat lezel, ek seki ti paret kouma bann lame imin anba zot lezel. 22 Ek zot bann figir ti parey kouma bann figir ki mo ti’nn trouve kot larivier Kebar. Sakenn ti al drwat devan li.