Ezekiel
11 Ek enn lafors* ti lev mwa ek ti amenn mwa kot laport dan Les dan lakaz Zeova, sa laport ki fer fas ar Les la. Laba kot lantre laport-la, mo ti trouv 25 zom, ek parmi zot ti ena Zaazania, garson Azour, ek Pelatia, garson Benaya, bann prins lepep. 2 Alor Li ti dir mwa: “Garson enn zom, se sa bann zom-la ki pe manigans bann move kitsoz ek ki pe donn bann move konsey dan* sa lavil-la. 3 Zot pe dir, ‘Eski se pa bon moman pou aranz bann lakaz? Lavil-la,* li enn marmit,* ek nou, nou laviann.’
4 “Alor profetiz kont zot. Profetize, garson enn zom.”
5 Lerla lespri Zeova ti vinn lor mwa, ek li ti dir mwa: “Dir zot, ‘Ala seki Zeova dir: “Seki zot inn dir li vre, A pep Izrael, ek mo kone ki zot pe panse.* 6 Akoz zot, boukou dimounn inn mor dan sa lavil-la, ek zot inn ranpli so bann sime avek bann mor.”’” 7 “Alor, ala seki Segner Siprem* Zeova dir: ‘Bann kadav ki zot inn zete partou-partou dan lavil se zot ki laviann-la, ek lavil-la se marmit-la. Me zot, pou tir zot ladan.’”
8 “Segner Siprem Zeova dir: ‘Zot inn per lepe, ek se enn lepe ki mo pou amenn kont zot. 9 Mo pou fer zot sorti dan lavil-la ek mo pou livre zot dan lame bann etranze ek mo pou amenn bann zizman lor zot. 10 Zot pou mor avek lepe. Mo pou ziz zot kot frontier Izrael, ek zot pou bizin kone ki momem Zeova. 11 Lavil-la pa pou enn marmit pou zot, ek zot pa pou laviann ki ladan; mo pou ziz zot kot frontier Izrael, 12 ek zot pou bizin kone ki momem Zeova. Parski zot pa’nn swiv mo bann lord ek aplik mo bann desizion legal, me zot inn swiv bann desizion legal bann nasion ki otour zot.’”
13 Deswit kouma mo ti profetize, Pelatia, garson Benaya, ti mor. Lerla mo ti tom azenou ziska ki mo fron tous later, ek mo ti kriye avek enn lavwa bien for: “Ayo, Segner Siprem Zeova! Eski to pou detrir tou bann ki reste dan Izrael?”
14 Zeova ti koz ar mwa ankor enn fwa ek ti dir: 15 “Garson enn zom, bann abitan Zerizalem inn dir to bann frer, setadir bann ki parmi to bann frer ki ena drwa pou reaste, ansam avek tou pep Izrael, ‘Res lwin ar Zeova. Pei-la pou nou; finn donn nou pei-la.’ 16 Alor dir zot, ‘Ala seki Segner Siprem Zeova dir: “Mem si mo’nn avoy zot bien lwin parmi bann nasion ek ki mo’nn dispers zot parmi bann pei, pandan enn tigit letan mo pou vinn enn tanp pou zot dan bann pei kot zot inn ale.”’
17 “Alor dir zot, ‘Ala seki Segner Siprem Zeova dir: “Mo pou osi tir zot parmi bann pep ek mo pou rasanble zot depi bann pei kot ti dispers zot, ek mo pou donn zot pei Izrael. 18 Ek zot pou retourn laba ek zot pou tir tou bann kitsoz degoutan ek bann pratik detestab ki ena laba. 19 Ek mo pou donn zot enn sel leker,* ek mo pou met enn nouvo leta-d-espri dan zot; ek mo pou tir sa leker ki ros la dan zot lekor ek mo pou donn zot enn leker ki sansib,* 20 pou ki zot kapav swiv mo bann lord ek aplik mo bann desizion legal ek obeir zot. Lerla zot pou vinn mo pep, ek mo pou vinn zot Bondie.”’
21 “‘“Me konsernan bann ki zot leker bien deside pou kontign fer zot bann kitsoz degoutan ek zot bann pratik detestab, mo pou amenn lor zot latet bann konsekans zot fason viv,” ala seki Segner Siprem Zeova dir.’”
22 Alor bann seribin ti lev zot lezel, ek bann larou ti pre ar zot, ek laglwar Bondie Izrael ti lao zot. 23 Lerla, laglwar Zeova ti leve depi lavil-la ek ti arete lao montagn ki dan Les lavil-la. 24 Lerla enn lafors* ti lev mwa—atraver enn vizion ki mo’nn gagne par mwayin lespri Bondie—ek ti amenn mwa ver bann ki an exil dan Kalde. Lerla vizion ki mo ti’nn trouve ti fini lamem. 25 Ek mo ti koumans rakont bann ki an exil tou bann kitsoz ki Zeova ti’nn montre mwa.