Ezekiel
21 Zeova ti koz avek mwa ankor enn fwa ek ti dir: 2 “Garson enn zom, vir to figir ver Zerizalem, ek fer enn deklarasion kont bann plas ki sin, ek profetiz kont pei Izrael. 3 Dir pei Izrael, ‘Ala seki Zeova dir: “Aster mo pou azir kont twa, ek mo pou tir mo lepe dan so fouro ek mo pou touy bann dimounn ki drwat ek bann dimounn ki move ki ena kot twa. 4 Parski mo pou touy bann dimounn ki drwat ek bann dimounn ki move ki ena kot twa, mo lepe pou sorti dan so fouro pou touy tou bann dimounn, depi Lesid ziska Lenor. 5 Tou dimounn pou bizin kone ki mwa, Zeova, mo’nn tir mo lepe dan so fouro. Li pa pou retourn dan so fouro ankor.”’
6 “Ek twa, garson enn zom, plengne pandan ki to* pe tranble, wi, plengne avek tristes devan zot. 7 Ek si zot demann twa, ‘Kifer to pe plengne?’ to pou dir, ‘Akoz enn nouvel ki mo’nn tande.’ Parski vremem li pou arive, ek tou leker pou fonn akoz laper, tou lame pou vinn feb, tou lespri pou dekouraze, ek delo pou koule lor tou zenou.* ‘Gete! Vremem li pou arive—li pou realize,’ ala seki Segner Siprem* Zeova dir.”
8 Zeova ti koz ar mwa ankor enn fwa ek ti dir: 9 “Garson enn zom, profetize ek dir, ‘Ala seki Zeova dir: “Dir, ‘Enn lepe! Pe fit enn lepe, ek pe poli li. 10 Pe fit li pou fer enn gran masak; pe poli li pou ki li eklere parey kouma zekler.’”’”
“Eski nou pa bizin kontan?”
“Eski li* pou rezet baton rwayal mo prop garson, parey kouma li rezet tou bann pie?
11 “‘Finn donn li pou ki poli li ek pou ki enn kikenn servi li. Pe fit ek poli lepe-la pou ki met li dan lame enn kikenn ki touy dimounn.
12 “‘Kriye for, wi kriye ek plore, garson enn zom, parski li’nn vinn kont mo pep; li pe vinn kont tou bann sef Izrael. Zot pou bann viktim sa lepe-la ansam avek mo pep. Alor, tap to lakwis avek sagrin. 13 Parski inn examinn mo pep. Ek ki pou arive si lepe-la rezet baton rwayal la? Li* pou nepli existe,’ ala seki Segner Siprem Zeova dir.
14 “Ek twa, garson enn zom, profetize, tap to lame, ek repet trwa fwa ‘Enn lepe!’ Se lepe ki fer bann viktim, lepe ki fer enn gran masak, lepe ki anserkle zot. 15 Zot leker pou fonn akoz laper ek boukou pou tonbe kot laport zot lavil; mo pou fer enn masak avek lepe. Wi, li eklere parey kouma zekler ek inn poli li pou fer enn masak! 16 Koup dan kote drwat! Vir dan kote gos! Al ninport kotsa to lam ale! 17 Mo pou osi tap mo lame ek mo pou apez mo koler. Mwa, Zeova, mo’nn koze.”
18 Ek Zeova ti koz ar mwa ankor enn fwa ek ti dir: 19 “Me twa, garson enn zom, tras de sime pou ki lepe lerwa Babilonn vini. Toule-de pou sorti dan mem pei, ek bizin met enn pano* kot sime-la divize pou al dan de lavil diferan. 20 To bizin tras enn sime pou ki lepe-la vinn kont Raba ki pou bann Amonit, ek enn lot sime pou ki lepe-la vinn kont Zerizalem ki bien proteze, dan Zida. 21 Parski lerwa Babilonn aret dan lakrwaze, kot sa de sime-la diviz an-de, pou kone ki pou arive dan lavenir. Li sakouy bann fles. Li rod led ar so bann zidol* ek li examinn lefwa. 22 Prediksion ki li gagne dan so lame drwat konsernan lavenir montre Zerizalem, pou ki plas bann masinn* pou detrir, pou ki donn lord pou fer enn masak, pou ki fer enn kri lager, pou ki plas bann masinn* pou defons bann laport, pou ki mont enn laranp pou atake, pou ki aranz enn miray pou anserkle li. 23 Me li pou paret kouma bann fos prediksion dan lizie bann* ki ti’nn fer serman avek zot. Me li rapel ki zot koupab ek li pou pran zot kouma prizonie.
24 “Alor ala seki Segner Siprem Zeova dir: ‘Zot inn fer bann dimounn rapel ki zot koupab kan zot inn devwal zot bann fot ek kan zot inn fer lezot trouv zot bann pese dan tou zot seki zot inn fer. Aster ki’nn rapel zot, se avek lafors* ki pou pran zot.’
25 “Me to zour inn arive, A move sef dan Izrael ki’nn blese amor, ler inn arive pou to dernie pinision. 26 Ala seki Segner Siprem Zeova dir: ‘Tir tok-la,* ek tir kouronn-la. Bann kitsoz pou sanze. Donn loner sa kikenn ki pli anba la, ek abes sa kikenn ki pli lao la. 27 Enn larwinn, enn larwinn, enn larwinn, samem ki mo pou fer li vini. Ek li pa pou vinn pou personn ziska ki sa kikenn ki ena drwa legal la vini, ek mo pou donn li sa.’
28 “Ek twa, garson enn zom, profetize ek dir, ‘Ala seki Segner Siprem Zeova dir konsernan bann Amonit ek konsernan zot bann insilt.’ Dir, ‘Enn lepe! Inn tir enn lepe pou fer enn masak; inn poli li pou devore ek pou eklere kouma zekler. 29 Malgre bann fos vizion ek bann fos prediksion lor twa, pou anpil twa lor bann ki’nn touye,* bann move dimounn ki zot zour inn arive, ki zot ler inn arive pou zot dernie pinision. 30 Remet lepe-la dan so fouro. Mo pou ziz twa dan plas kot finn kree twa, dan pei kot to sorti. 31 Mo pou devers mo gran koler lor twa. Mo pou soufle lor twa dife mo koler, ek mo pou livre twa dan lame bann zom ki violan, bann artizan destriksion. 32 Pou servi twa pou ki dife res alime; pou vers to disan dan pei-la, ek pou nepli rapel twa, parski mwa, Zeova, mo’nn koze.’”