Ezekiel

18 Ek Zeova ti koz ar mwa ankor enn fwa ek ti dir: 2 “Ki sa proverb ki zot dir dan pei Izrael la vedir, ‘Bann papa inn manz rezin eg, me se ledan bann garson ki grinse’?

3 “‘Parey kouma mo vivan,’ ala seki Segner Siprem Zeova* dir, ‘zot pou nepli dir sa proverb-la dan Izrael. 4 Gete! Tou bann lavi*—zot pou mwa. Lavi papa-la, kouma lavi garson-la—zot pou mwa. Dimounn* ki fer pese, limem ki pou mor.

5 “‘Fer koumadir enn zom li drwat ek li fer seki zis ek drwat. 6 Li pa manz bann sakrifis ki’nn fer pou bann zidol lor bann montagn; li pa met so lespwar dan bann zidol degoutan* ki ena dan pep Izrael; li pa dormi ar madam so prosin ouswa gagn relasion avek enn madam ki pe gagn so peryod; 7 li pa maltret personn, me li retourn sa dimounn ki dwa li la seki li ti done kouma garanti; li pa kokin personn, me li donn so prop manze sa dimounn ki fin la ek li kouver sa dimounn ki touni la avek enn linz; 8 li pa prete pou gagn lintere ouswa pou fer profi, me li anpes limem azir dan enn fason inzis; li aplik vre lazistis kan bizin ziz ant de dimounn; 9 ek li kontign swiv mo bann lord ek aplik mo bann desizion legal pou ki li azir dan enn fason ki fidel. Enn zom koumsa, li drwat ek vremem li pou kontign viv,’ ala seki Segner Siprem Zeova dir.

10 “‘Me fer koumadir li vinn papa enn garson ki enn voler ouswa ki enn kriminel* ouswa ki fer enn parmi sa bann kitsoz-la, 11 (mem si papa-la pa’nn fer nanye parmi sa bann kitsoz-la)—li manz bann sakrifis ki’nn fer pou bann zidol lor bann montagn, li dormi ar madam so prosin, 12 li maltret bann ki mizer ek bann ki pov, li kokin, li pa rann seki enn dimounn inn donn li kouma garanti, li met so lespwar dan bann zidol degoutan, li ena bann pratik detestab, 13 li prete pou fer profi ek li pran lintere—alor sa garson-la pa pou kontign viv. Akoz tou sa bann kitsoz detestab ki li’nn fer la, vremem pou touy li. Limem li pou responsab so lamor.*

14 “‘Me fer koumadir enn papa ena enn garson ki trouv tou bann pese ki so papa inn fer, ek mem si li trouv tousala, li pa fer sa bann kitsoz-la. 15 Li pa manz bann sakrifis ki’nn fer pou bann zidol lor bann montagn; li pa met so lespwar dan bann zidol degoutan ki ena dan pep Izrael; li pa dormi ar madam so prosin; 16 li pa maltret personn; li rann seki enn dimounn inn donn li kouma garanti; li pa kokin nanye; li donn so prop manze sa dimounn ki fin la ek li kouver sa dimounn ki touni la avek enn linz; 17 li anpes limem fer dominer ar bann pov; li pa prete pou fer profi ouswa pou gagn lintere; ek li aplik mo bann desizion legal ek swiv mo bann lord. Enn zom koumsa pa pou mor akoz erer so papa. Vremem li pou kontign viv. 18 Me parski so papa inn fer frod, li’nn kokin so frer, ek li’nn fer seki pa bon parmi so pep, li pou mor pou so erer.

19 “‘Me zot pou dir: “Kifer garson-la pa koupab pou erer so papa?” Parski garson-la inn fer seki zis ek drwat, li’nn swiv tou mo bann lord ek li’nn aplik zot, vremem li pou kontign viv. 20 Dimounn* ki fer pese limem ki pou mor. Enn garson pa pou koupab pou erer so papa, ek enn papa pa pou koupab pou erer so garson. Kan enn dimounn ki drwat azir dan enn fason drwat, pou met sa zis lor so kont, ek kan enn move dimounn azir dan enn move fason, pou met sa zis lor so kont.

21 “‘Aster si enn move dimounn detourn li ar tou bann pese ki li’nn fer ek ki li swiv mo bann lord ek fer seki zis ek drwat, vremem li pou kontign viv. Li pa pou mor. 22 Pa pou fer li peye pou* okenn erer ki li’nn fer. Li pou kontign viv parski li’nn fer seki drwat.’

23 “‘Eski sa fer mwa plezir kan enn move dimounn mor?’ ala seki Segner Siprem Zeova dir. ‘Eski mo pa prefer ki li sanz so fason viv ek ki li kontign viv?’

24 “‘Me kan enn dimounn ki drwat aret fer seki drwat ek fer seki move,* ek fer tou bann kitsoz detestab ki bann move dimounn fer, eski li pou viv? Pa pou rapel okenn bann aksion drwat ki li’nn fer. Akoz li infidel ek akoz pese ki li’nn fer, li pou mor.

25 “‘Me zot pou dir: “Zeova so fason azir li inzis.” A pep Izrael, ekoute silteple! Eski se mo fason azir ki inzis? Eski se pa zot bann fason azir ki inzis?

26 “‘Kan enn dimounn ki drwat aret fer seki drwat ek fer seki move ek ki li mor akoz sa, li pou mor akoz so move aksion.

27 “‘Ek kan enn move dimounn detourn li ar bann move kitsoz ki li’nn fer ek koumans fer seki zis ek drwat, li pou sov so prop lavi.* 28 Kan li rann li kont ek ki li detourn li ar tou bann erer ki li’nn fer, vremem li pou kontign viv. Li pa pou mor.

29 “‘Me pep Izrael pou dir: “Zeova so fason azir li inzis.” A pep Izrael, eski vremem se mo bann fason azir ki inzis? Eski se pa zot bann fason azir ki inzis?’

30 “‘Alor, A pep Izrael, mo pou ziz sakenn parmi zot dapre zot fason viv,’ ala seki Segner Siprem Zeova dir. ‘Detourn zot, wi, detourn zot net ar tou zot bann erer, pou ki sa bann erer-la pa vinn enn obstak* ki fer zot vinn koupab. 31 Debaras zot ar tou bann erer ki zot inn fer ek devlop* enn nouvo leker ek enn nouvo leta-d-espri, parski kifer zot bizin mor, A pep Izrael?’

32 “‘Sa pa fer mwa plezir kan enn kikenn mor,’ ala seki Segner Siprem Zeova dir. ‘Alor aret fer seki move ek viv.’”