Mishe
Zot pe tap ziz Izrael avek enn baton lor so lazou.
2 Ek twa, A Betleem Efrata,
Twa ki tro tipti pou form parti parmi bann lavil* Zida,
Sa kikenn ki pou vinn sef dan Izrael pou mwa la, pou sorti kot twa,
Sa kikenn ki ti existe depi lontan la, depi bien-bien lontan.
3 Alor Bondie pou abandonn zot
Ziska moman ki sa fam ki bizin gagn ti-baba la fini gagn so ti-baba.
Ek leres so bann frer pou retourn dan pep Izrael.
4 Li pou leve ek li pou pran swin troupo-la gras-a lafors Zeova,
Avek lotorite, li pou azir lor gran nom Zeova so Bondie.
Ek zot pou res an sekirite,
Parski pou rekonet so grander ziska dan bout later.
5 Ek li pou amenn lape.
Si sa Asirien-la anvayir nou pei ek kraz nou bann latour ki bien solid ar so lipie,
Nou pou avoy kont li set berze, wi, wit prins* parmi bann dimounn.
Ek sa sef-la pou sap nou dan lame sa Asirien-la,
Kan li pou anvayir nou pei ek mars lor nou teritwar.
7 Bann ki reste parmi Zakob, zot pou omilie boukou pep,
Parey kouma laroze ki sorti kot Zeova,
Parey kouma gro lapli lor bann plant
Ki pa met zot lespwar dan bann zom,
Ouswa atann kitsoz ar garson bann zom.
8 Bann ki reste parmi Zakob, zot pou parmi bann nasion,
Omilie boukou pep,
Parey kouma enn lion parmi bann zanimo ki dan lafore,
Parey kouma enn zenn lion parmi bann troupo mouton,
Ki pas parmi zot, ki atake, ek desir zot bout-bout;
Ek pena personn pou sap zot.
9 To pou lev to lame lor to bann lennmi,
Ek tou to bann lennmi pou detrir.”
10 Ala seki Zeova dir, “Sa zour-la,
Mo pou touy to bann seval ek detrir to bann kales.
11 Mo pou detrir bann lavil ki dan to pei,
Ek mo pou kraz tou to bann plas ki bien proteze.
12 Mo pou fer twa aret bann sorselri ki to pe fer,*
Ek kot twa nepli pou ena kikenn ki fer mazik.
13 Mo pou detrir to bann zidol skilpte ek to bann kolonn,
Ek to pou nepli prostern devan bann kitsoz ki to’nn fer.
14 Mo pou derasinn to bann poto sakre,*
Ek mo pou detrir net to bann lavil.
15 Dan mo koler, dan mo gran koler, mo pou tir vanzans
Lor bann pep ki pa’nn obeir mwa.”