Mishe
7 Maler lor mwa! parski mo parey kouma enn kikenn ki
Apre ki’nn rekolte bann frwi lete
Ek ki’nn ramas bann dernie rezin apre rekolt,
Pa trouv okenn grap rezin pou manze,
Ni okenn premie fig ki mo ti extra anvi manze.
2 Sa kikenn ki fidel la inn disparet depi lor later;
Parmi bann zom pena personn ki drwat.
Zot tou pe atann enn lokazion pou vers disan.
Sakenn pe lasas so prop frer avek enn file.
3 Zot lame inn vinn exper pou fer seki move;
Prins-la pe rod gagn bann kitsoz,
Ziz-la pe demann enn rekonpans,
Sa kikenn ki inportan la pe fer konn so bann dezir,
Ek zot pe travay ansam* pou fer seki pa bon.
4 Sa kikenn ki pli bon parmi zot la parey kouma bann pikan,
Sa kikenn ki pli drwat parmi zot la pli pir ki enn baraz pikan.
Zour zot bann gardien ek zour kot zot bizin rann kont pou vini.
Lerla zot pou panike.
5 Pa fie lor to kamarad,
Pa met to konfians dan to bon kamarad.
Fer atansion seki to dir ar sa kikenn ki pe dormi dan to lebra la.
6 Parski enn garson pe mepriz so papa,
Enn tifi pe rebel kont so mama,
Ek enn belfi pe rebel kont so belmer;
Bann lennmi enn zom se bann zom ki dan so lakaz.
7 Me mwa, mo pou kontign atann pou gete seki Zeova pou fer.
Mo pou atann avek pasians sa Bondie ki pou sap mwa la.
Mo Bondie pou tann mwa.
8 A mo lennmi,* pa kontan parski mo pe konn maler.
Mem si mo’nn tonbe, mo pou leve;
Mem si mo res dan nwarte, Zeova pou mo lalimier.
9 Mo pou siport koler Zeova
—Parski mo’nn fer pese kont li—
Ziska ki li defann mo case ek fer mwa gagn lazistis.
Li pou amenn mwa dan lalimier;
Mo pou trouv so lazistis.
10 Mo lennmi osi pou trouve,
Ek laont pou kouver li, li ki ti dir mwa:
“Kot Zeova to Bondie ete?”
Mo lizie pou trouv li.
Lerla pou mars lor li parey kouma mars dan labou lor bann semin.
11 Sa zour-la pou enn zour kot pou aranz to bann miray ros;
Sa zour-la, pou agrandi to bann frontier.*
12 Sa zour-la zot pou vinn kot twa
Depi Lasiri ek bann lavil ki dan Lezip,
Depi Lezip ziska Larivier;*
Depi enn lamer ziska enn lot lamer ek depi enn montagn ziska enn lot montagn.
13 Ek pei-la pou vinn enn dezer akoz so bann abitan,
Akoz seki zot inn fer.*
14 Pran swin to pep avek to baton, sa troupo ki to leritaz la,
Li ki ti pe res tousel dan enn lafore la—omilie enn verze.
Ki zot manze dan Basann ek Galaad, parey kouma dan lepok lontan.
15 “Parey kouma dan lepok kot to ti sorti dan pei Lezip,
Mo pou montre twa* bann kitsoz extraordiner.
16 Bann pep pou trouve ek zot pou gagn onte, mem si zot bien pwisan.
Zot pou met zot lame lor zot labous;
Zot zorey pou vinn sourd.
17 Zot pou manz lapousier parey kouma bann serpan;
Parey kouma bann reptil ki lor later, zot pou tranble letan zot pou sorti dan zot bann fortres.
Zot pou vinn ver Zeova nou Bondie dan enn gran lafreyer,
Ek zot pou per twa.”
18 Eski ena enn Bondie ki parey kouma twa,
Ki pardonn bann erer ek ki pas lor pese bann ki reste parmi so leritaz?
Li pa pou kontign res ankoler pou touletan,
Parski li bien kontan lamour fidel.
19 Ankor enn fwa, li pou montre mizerikord anver nou; li pou gagn laviktwar lor* nou bann erer.
To pou zet tou zot bann pese dan profonder lamer.
20 To pou montre fidelite anver Zakob,
Lamour fidel anver Abraam,
Parey kouma to ti fer serman ar nou bann anset depi lepok lontan.