Mishe

4 Dan bann dernie zour,*

Montagn lakaz Zeova

Pou etabli dan enn fason solid lao bann montagn,

Ek vremem li pou vinn pli ot ki bann kolinn,

Ek bann pep pou mont ver li kouma enn lafoul.

“Vini, anou mont lor montagn Zeova

Ek anou al dan lakaz Bondie Zakob.

Li pou montre nou ki semin nou bizin swiv,

Ek nou pou mars lor so bann semin.”

Parski lalwa* pou sorti dan Sion,

Ek parol Zeova pou sorti dan Zerizalem.

 3 Bondie pou azir kouma enn ziz parmi boukou pep

Ek li pou remet bann kitsoz an-ord* konsernan bann pep ki pwisan ek ki res bien lwin.

Zot pou fer zot lepe vinn bann zouti pou labour later

Ek zot pou fer zot bann lans vinn bann laserp.

Enn pep pa pou lev lepe kont enn lot pep,

Ek zot pou nepli aprann lager.

 4 Sakenn pou asiz* anba so pie rezin ek anba so pie fig,

Ek pa pou ena personn ki pou fer zot per,

Parski Zeova Sef bann larme inn koze.*

 5 Tou bann pep pou mars sakenn lor nom so bondie,

Me nou, nou pou mars lor nom Zeova nou Bondie pou touletan.

 6 Ala seki Zeova dir: “Sa zour-la,

Mo pou rasanble bann* ki ti pe bwate,

Ek mo pou rasanble bann ki’nn disperse

Ansam avek bann ki mo’nn pini.

 7 Parmi bann ki ti pe bwate, mo pou sov bann* ki reste,

Ek mo pou fer bann ki ti’nn avoy lwin vinn enn pep ki pwisan;

Ek Zeova pou dirize kouma lerwa lor zot depi Montagn Sion,

Depi aster-la mem ek pou touletan.

 8 Me twa, A latour ki protez troupo-la,

Kolinn tifi Sion,

Ver twa li pou vini, wi, rwayom ki ti dirize an premie* pou vini,

Rwayom ki pou tifi Zerizalem.

Eski to pena lerwa,

Ouswa eski to konseye inn mor,

Pou ki douler pe trap twa koumadir enn fam ki pe gagn zanfan?

10 Korde ar douler ek plengne, A tifi Sion,

Parey kouma enn fam ki pe gagn zanfan,

Parski aster-la to pou sorti dan lavil ek to pou al res dan lakanpagn.

To pou al ziska Babilonn,

Ek laba pou sap twa;

Laba Zeova pou reaste twa depi lame to bann lennmi.

11 Boukou pep pou rasanble kont twa;

Zot pou dir, ‘Ki li vinn inpir,

Ek les nou lizie trouv seki pou ariv Sion.’

12 Me zot pa konn bann panse Zeova,

Zot pa konpran so proze;*

Parski li pou rasanble zot, parey kouma rasanble enn ranze sereal ki’nn fek koupe dan plas kot bat lagrin sereal.

13 A tifi Sion, leve ek bat lagrin sereal;

Parski mo pou fer to bann korn vinn feray,

Ek mo pou fer to bann sabo vinn kwiv,

Ek to pou kraz net boukou pep.

To pou donn Zeova zot bann profi malonet,

Ek to pou donn vre Segner lor later antie zot bann resours.”