Deziem Let Zan

1 Mwa, enn ansien,* pou sa madam ki Bondie inn swazir la ek pou so bann zanfan, ki mo vremem kontan, ek pa zis mwa me osi tou bann ki finn aprann pou konn laverite, 2 akoz laverite ki res dan nou ek ki pou avek nou pou touletan. 3 Avek nou pou ena bonte extraordiner,* mizerikord,* ek lape ki sorti kot Bondie nou Papa ek kot Zezi Kris, Garson nou Papa, avek laverite ek lamour.

4 Mo extra kontan parski mo’nn trouv sertin parmi to bann zanfan pe mars dan laverite, parey kouma nou finn gagn lord avek nou Papa. 5 Alor aster-la madam, mo pe demann twa ki nou kontan sakenn nou kamarad. (Mo pa pe ekrir zot enn nouvo komannman, me enn ki nou ti ena depi koumansman.) 6 Ala seki vedir lamour: ki nou kontign mars dapre so bann komannman. Ala komannman-la, parey kouma zot finn tande depi koumansman: zot bizin kontign mars dan lamour. 7 Parski boukou dimounn ki anbet lezot inn aparet dan lemond, bann ki pa aksepte ki Zezi Kris inn vinn lor later kouma enn imin. Enn dimounn ki fer sa li anbet lezot ek li enn antikris.

8 Fer atansion ar zotmem, pou ki zot pa perdi bann kitsoz ki nou finn travay dir pou prodir, me pou ki zot kapav gagn enn rekonpans ki konple. 9 Tou dimounn ki depas limit ek pa res dan lansegnman Lekris li pa dan linite avek Bondie. Enn dimounn ki res dan sa lansegnman-la, li enn dimounn ki dan linite avek Papa-la ek Garson-la toule-de. 10 Si enn dimounn vinn kot zot ek li pa amenn sa lansegnman-la, pa akeyir li dan zot lakaz ek pa dir li bonzour. 11 Parski enn kikenn ki dir li bonzour pe partisip dan so bann move aksion.

12 Mem si mo ena boukou kitsoz pou ekrir zot, mo pa anvi fer sa avek papie ek lank, me mo espere vinn get zot ek koz avek zot fas-a-fas, pou ki zot lazwa vinn konple.

13 Bann zanfan to ser, sa kikenn ki Bondie inn swazir la, fer twa konpliman.