Oze
6 “Vini, ek anou retourn ar Zeova,
Parski li’nn desir nou bout-bout, me li pou geri nou.
Li’nn tap nou, me li pou met enn bandaz lor nou bann dimal.
2 Li pou redonn nou lavi* apre de zour.
Lor trwaziem zour li pou lev nou,
Ek nou pou viv devan li.
3 Nou pou kone, nou pou fer tou pou rod konn Zeova.
Parey kouma nou sir ki soley pou leve, nou sir ki li pou arive;
Li pou vinn kot nou kouma enn gro lapli,
Kouma lapli pandan sezon printan kot later bien aroze.”
4 “Ki mo pou fer avek twa, Efraim?
Ki mo pou fer avek twa, Zida?
Parski zot lamour fidel li parey kouma bann niaz dan gramatin,
Parey kouma laroze ki disparet vit.
5 Ala kifer mo pou servi bann profet pou touy zot;*
Mo pou touy zot avek bann parol ki sorti dan mo labous.
Ek bann zizman ki zot pou gagne pou briye parey kouma lalimier.
6 Parski se lamour fidel* ki mo kontan, pa bann sakrifis,
Ek mo kontan ki bann dimounn ena konesans lor Bondie, olie ki zot fer bann sakrifis ki brile.
7 Me zot, parey kouma bann sinp zom, zot pa’nn respekte mo lalians.
Laba zot inn trayir mwa.
8 Galaad li enn lavil kot ena bann dimounn ki fer bann move kitsoz,
Li kouver avek bann lanprint lipie ki ranpli ar disan.
9 Bann pret zot parey kouma bann bandi ki pe kasiet pou atak enn zom.
Zot touy bann dimounn lor sime pre kot Sikem,
Parski zot konportman fer gagn onte.
10 Mo’nn trouv enn kitsoz degoutan parmi pep Izrael.
Laba, Efraim pe kontign fer prostitision;
Izrael inn fer limem vinn inpir.
11 Anplis, A Zida, inn fixe enn moman pou rekolte twa,
Kan pou re-rasanble mo pep ki’nn al an exil.”