Oze
8 “Met enn korn kot to labous!
Enn kikenn pe vini parey kouma enn leg kont lakaz Zeova,
Parski zot pa’nn respekte mo lalians ek zot inn dezobeir mo lalwa.
2 Zot kriye ver mwa ek dir, ‘Mo Bondie, nou, Izrael, nou konn twa!’
3 Izrael inn rezet seki bon.
Ki enn lennmi galoup deryer li.
4 Zot inn etabli bann lerwa, me san demann mwa.
Zot inn etabli bann prins, me mo pa ti aksepte zot.
Avek zot larzan ek zot lor, zot inn fer bann zidol,
Pou zot prop destriksion.
5 Inn rezet to ti bef, A Samari.
Mo koler inn anflame kont zot.
Komie letan ankor zot pa pou reisi pirifie zotmem?*
6 Parski se Izrael ki’nn fer sa ti bef-la.
Se enn artizan ki’nn fer sa, pa Bondie;
Pou fer ti bef Samari vinn lapousier.
7 Parski se divan ki zot pe seme,
Ek se enn tanpet divan ki zot pou rekolte.
Okenn tiz pa donn bann lagrin ki’nn pare;*
Seki reisi bourzone pa donn lafarinn.
Si reisi gagn kitsoz, se bann etranze ki pou aval sa.
8 Pou aval Izrael.
Aster-la li pou parmi bann pep,
Parey kouma enn resipian ki personn pa’le.
9 Parski zot inn monte pou al Lasiri, parey kouma enn bourik sovaz ki tousel.
Efraim inn pey bann prostitie pou gagn relasion avek li.
10 Mem si sa bann prostitie ki zot inn peye la sorti parmi bann pep,
Aster-la mo pou rasanble zot;
Zot pou koumans soufer akoz fardo ki lerwa ek bann prins inn fors zot pou sarye.
11 Parski Efraim inn fer boukou lotel ek inn fer pese.
Zot servi zot bann lotel pou fer pese.
12 Mo ti ekrir boukou lalwa* pou li,
Me ti konsider sa kouma enn kitsoz bizar.
13 Zot donn mwa bann ofrand an kado, ek zot manz laviann,
Me Zeova pa kontan sa bann lofrand-la.
Aster-la li pou rapel zot erer ek pou pini zot pou bann pese ki zot inn fer.
Ankor enn fwa zot inn tourn zot ver* Lezip.
14 Izrael inn bliye sa Kikenn Ki’nn Fer li la ek inn konstrir bann tanp,
Ek Zida inn miltipliye so bann lavil ki bien proteze.
Me mo pou avoy dife dan so bann lavil,
Ek li pou bril bann latour ki dan sak lavil.”