Izai

32 Gete! Enn lerwa pou regne pou lazistis,

Ek bann prins pou dirize dan enn fason ki drwat.

 2 Ek sakenn bizin kouma enn plas kot kapav al kasiet* kont divan,

Enn proteksion* kont gro lapli,

Parey kouma bann ti larivier dan enn pei kot pena delo,

Parey kouma lonbraz enn extra gro ros lor enn later ki sek.

 3 Lerla, lizie bann ki trouve pou nepli kole,

Ek zorey bann ki tande pou ekout bien.

 4 Leker bann dimounn ki azir vit pou pran letan pou reflesi lor konesans,

Ek lalang bann ki gaga pou koz bien ek dan enn fason kler.

 5 Pou nepli apel sa kikenn ki pena sazes la zenere,

Ek pou nepli apel enn dimounn ki pena okenn prinsip, enn dimounn ki sorti dan enn gran fami;

 6 Parski sa kikenn ki pena sazes la pou koz ninport,

Ek so leker pou manigans bann kitsoz ki fer ditor,

Pou ankouraz dimounn pou rebel kont Bondie* ek pou koz manti lor Zeova,

Pou fer sa kikenn ki fin la ale san manze,

Ek pou anpes sa kikenn ki swaf la gagn enn kitsoz pou bwar.

 7 Bann metod ki enn dimounn ki pena okenn prinsip servi, pa bon;

Li ankouraz enn konportman ki fer onte

Pou fini net sa kikenn ki pe soufer la avek bann foste,

Mem kan sa kikenn ki pov la dir seki vre.

 8 Me sa kikenn ki zenere* la kontan pou done,

Ek li kontign fer zefor pou montre li zenere.

10 Dan inpe plis ki enn an, zot ki pa kas latet ar nanye pou tranble ar laper,

Parski pa pou’nn ramas okenn frwi kan pou ariv lafin rekolt rezin.

Tir tou zot linz lor zot,

Ek met bann latwal sak otour zot laans.

12 Bat zot lestoma ek plore

Pou bann zoli karo ek bann karo rezin ki raporte.

13 Parski later mo pep pou kouver ar bann touf pikan;

Zot pou kouver tou bann lakaz kot ena lazwa,

Wi, lavil ki touletan dan lazwa.

14 Parski inn bliye bann latour ki solid;

Inn abandonn lavil kot ena tapaz.

Ofel ek latour kot veye* pou vinn enn terin ki’nn abandone,

Bann bourik sovaz pou trouv zot boner laba,

Ek li pou enn patiraz pou bann troupo,

15 Li pou koumsa ziska ki devers lespri lor nou depi lao,

Ek ki dezer vinn enn verze,

Ek ki konsider verze-la kouma enn lafore.

16 Lerla lazistis pou res dan dezer,

Ek ladrwatir pou res dan verze.

17 Vre ladrwatir pou amenn lape,

Ek vre ladrwatir pou fer gagn enn trankilite ek enn sekirite ki dire.

18 Mo pep pou res dan enn landrwa kot touletan ena lape,

Dan bann lakaz kot ena sekirite ek dan bann plas ki trankil.

19 Me lagrel pou detrir lafore-la net,

Ek lavil-la pou aplati net.

20 Ere zot ki sem bann lagrin partou kot ena delo,

Ki larg* zot toro ek zot bourik.”