Ezekiel

38 Zeova ti koz ar mwa ankor enn fwa ek ti dir: 2 “Garson enn zom, vir to figir kont Gog ki sorti pei Magog, gran sef* Meshek ek Toubal, ek profetiz kont li. 3 Dir, ‘Ala seki Segner Siprem* Zeova dir: “Aster-la mo pou azir kont twa, A Gog, gran sef* Meshek ek Toubal. 4 Mo pou fer twa fer demi-tour ek mo pou met bann krose dan to lamaswar, ek mo pou fer twa sorti avek tou to larme, to bann seval ek to bann kavalie, zot tou bien abiye, enn gran larme avek bann gran boukliye ek bann ti boukliye,* zot tou avek zot lepe dan zot lame; 5 Pers, Letiopi, ek Pout avek zot, zot tou avek bann ti boukliye ek bann elmet; 6 Gomer ek tou so latroup solda, bann desandan Togarma ki sorti dan bann rezion pli retire dan Lenor, ansam avek tou so latroup solda—ena boukou pep avek twa.

7 “‘“To bizin pare, prepar twa, twa ek tou to bann larme ki’nn rasanble avek twa, ek to pou vinn zot komandan.*

8 “‘“Pou pran twa kont* apre plizir zour. Dan bann dernie lane,* to pou anvayir sa pei ki so bann abitan inn retourne apre bann masak ki’nn ena akoz lepe. Inn rasanble bann abitan sa pei-la depi plizir pep lor bann montagn Izrael, ki pandan lontan ti’nn res abandone. Inn tir bann abitan sa pei-la parmi bann pep pou fer zot retourne, ek zot tou pe viv an sekirite. 9 To pou vinn kont zot kouma enn tanpet, ek to pou kouver pei-la parey kouma bann niaz, twa ek tou to latroup solda ek boukou pep avek twa.”’

10 “Ala seki Segner Siprem Zeova dir: ‘Sa zour-la, bann panse pou vinn dan to lespri, ek to pou manigans enn plan ki move. 11 To pou dir: “Mo pou anvayir sa pei kot ena bann vilaz ki pena okenn proteksion la. Mo pou atak bann ki pe viv an sekirite, dan trankilite, zot tou ki pe viv dan bann vilaz ki pa proteze par bann miray, bann bar ouswa bann laport.” 12 To lobzektif se pou pran boukou dibien ek pou fer piyaz, pou atak bann plas ki ti abandone kot aster bann dimounn reste, ek pou atak enn pep ki’nn rasanble depi bann nasion, ki pe ramas bann rises ek bann dibien, bann ki pe viv dan sant later.

13 “‘Saba ek Dedann, bann marsan Tarsis ek tou so bann gerye* pou dir twa: “Eski to pe anvayir pei-la pou pran boukou dibien? Eski to’nn rasanble to bann larme pou pran larzan ek lor, pou pran bann rises ek bann dibien, ek pou pran enn gran kantite kitsoz?”’

14 “Alor profetize, garson enn zom, ek dir Gog, ‘Ala seki Segner Siprem Zeova dir: “Eski to pa pou remarke zour ki mo pep Izrael pou res an sekirite? 15 To pou sorti dan to plas, dan bann rezion pli retire dan Lenor, twa ek boukou pep avek twa, zot tou ki pe mont bann seval, enn gran lasanble, enn gran larme. 16 Parey kouma bann niaz ki pe kouver pei-la, to pou atak mo pep Izrael. Dan bann dernie zour,* mo pou fer twa atak mo pei pou ki bann nasion kapav konn mwa kan mo pou servi twa pou sanktifie mwa devan zot lizie, A Gog.”’

17 “Ala seki Segner Siprem Zeova dir: ‘Eski se pa lor tomem ki mo ti koze depi lontan atraver mo bann serviter bann profet Izrael, ki pandan boukou lane ti profetize ki ti pou fer twa atak bann Izraelit?’

18 “‘Sa zour-la, zour ki Gog pou anvayir pei Izrael,’ ala seki Segner Siprem Zeova dir, ‘mo gran koler pou eklate. 19 Dan mo koler, dan mo gran koler, mo pou koze; ek sa zour-la pou ena enn gran tranbleman-de-ter dan pei Izrael. 20 Akoz mwa, bann pwason dan lamer, bann zwazo dan lesiel, bann zanimo sovaz dan bwa, tou bann reptil ki ranpe lor later, ek tou bann imin ki ena lor later pou tranble, ek bann montagn pou devire, ek bann falez pou tonbe, ek tou bann miray pou grene.’

21 “‘Mo pou fer enn lepe vinn kont li lor tou mo bann montagn,’ ala seki Segner Siprem Zeova dir. ‘Sak zom pou pran lepe kont so frer. 22 Mo pou amenn mo zizman kont li: Mo pou avoy enn lepidemi ek mo pou fer boukou disan koule; ek mo pou avoy enn lapli toransiel, lagrel, dife ek souf lor li, lor so bann latroup solda, ek lor boukou pep ki avek li. 23 Ek vremem mo pou montre mo grander, mo pou sanktifie momem ek mo pou fer boukou nasion konn mwa; ek zot pou bizin kone ki momem Zeova.’