Ezekiel

9 Apre sa, li ti kriye dan mo zorey ek ti dir avek enn lavwa bien for: “Rasanble bann ki pou pini sa lavil-la, sakenn avek so zarm destriksion dan so lame!”

2 Mo ti trouv sis zom ki ti pe sorti dan direksion laport lao ki fer fas ar Lenor, sakenn avek so zarm pou kraze dan so lame; ek ti ena enn zom parmi zot ki ti ena enn linz an lin lor li, ek ti ena enn resipian lank ki enn sekreter servi ki ti atase lor so lerin. Zot ti rantre ek zot ti debout akote lotel an kwiv.

3 Lerla laglwar Bondie Izrael ti monte depi plas kot li ti ete, lao bann seribin, ek ti al kot lantre laport lakaz-la, ek li ti koumans kriye sa zom ki ti ena enn linz an lin lor li la ek ki ti ena kot so lerin resipian lank ki enn sekreter servi. 4 Zeova ti dir li: “Pas partou dan lavil, partou dan Zerizalem, ek met enn mark lor fron bann zom ki pe pous bann soupir ek ki pe plengne akoz tou bann kitsoz detestab ki pe fer dan lavil.”

5 Ek mo ti tann li dir ar lezot: “Pas partou dan lavil deryer li ek atak bann dimounn. Fode pa ki zot les zot lizie sagrin, ek fode pa ki zot ena okenn konpasion. 6 Zot bizin touy tou bann vie zom, bann zenom, bann vierz, bann ti zanfan, ek bann madam. Me pa al pre ar okenn zom lor ki ena sa mark-la. Zot bizin koumans par mo tanp.” Alor zot ti koumans ar bann ansien ki ti devan lakaz-la. 7 Apre sa, li ti dir zot: “Dezonor lakaz-la ek ranpli bann lakour avek bann kadav. Ale!” Alor zot ti ale ek zot ti touy bann dimounn dan lavil-la.

8 Pandan ki zot ti pe touy bann dimounn-la, zis mo tousel ti reste, ek mo ti tom azenou ziska ki mo fron tous later ek mo ti kriye: “Ayo, Segner Siprem* Zeova! Eski kan to pou devers to gran koler lor Zerizalem, to pou detrir tou bann ki reste dan Izrael?”

9 Alor li ti dir mwa: “Pese lepep Izrael ek Zida bien-bien gran. Pei-la ranpli ar disan ki’nn koule, ek lavil-la ranpli ar koripsion. Parski zot dir, ‘Zeova inn kit pei-la, ek Zeova pa pe trouve.’ 10 Me mwa, mo lizie pa pou sagrin; ni mo pou montre konpasion. Mo pou amenn lor zot latet bann konsekans zot fason viv.”

11 Lerla mo ti trouv sa zom ki ti ena enn linz an lin lor li ek ki ti ena enn resipian lank lor so lerin la vini ek dir: “Mo’nn fer exakteman seki to’nn donn mwa lord pou fer.”