Amos
5 “Ekout sa parol ki mo pe dir kont zot la, ki kouma enn sante dey, A pep Izrael:
2 ‘Izrael ki enn vierz, inn tonbe;
Li pa kapav leve ankor.
Inn abandonn li lor so prop later;
Pena personn pou fer li leve.’
3 “Parski ala seki Segner Siprem* Zeova dir:
‘Lavil ki pe al lager avek 1,000 solda, pou res zis 100 solda;
Ek lavil ki pe al lager avek 100 solda, pou res zis 10 solda.
Ala seki pou ariv pep Izrael.’
4 “Parski ala seki Zeova dir ar pep Izrael:
‘Retourn ar mwa ek kontign viv.
Pa al Gilgal ouswa travers frontier pou al Beer-Seba,
Parski vremem Gilgal pou al an exil,
Ek Betel pou detrir net.*
6 Retourn ar Zeova, ek kontign viv,
Sinon li pou eklate kouma enn dife lor bann desandan Zozef,
Li pou bril Betel, ek pa pou ena personn pou tengn sa dife-la.
7 Zot inn fer lazistis vinn labsint,*
Ek zot inn zet ladrwatir anba lor later.
8 Sa Kikenn ki’nn fer konstelasion Kima* ek konstelasion Kesil* la,
Sa Kikenn ki fer gran lonbraz vinn lalimier gramatin,
Sa Kikenn ki fer lizour vinn nwar parey kouma aswar,
Sa Kikenn ki apel delo lamer pou devers zot lor later,
So nom se Zeova.
9 Li pou fer destriksion vinn lor sa kikenn ki for la,
Ek li pou fer destriksion vinn lor bann plas ki bien proteze.
10 Zot ena laenn pou bann ki donn konsey kot laport lavil,
Ek zot deteste bann ki koz laverite.
11 Parski zot demann lwaye* ar sa kikenn ki pov la, pou later ki li servi pou plante,
Ek zot pran kouma tax, lagrin ki li rekolte,
Zot pa pou kontign res dan bann lakaz ki zot inn aranze ar ros ki’nn taye,
Ek zot pa pou bwar divin ki sorti dan bann bon karo rezin ki zot inn plante.
12 Parski mo kone ki kantite fwa zot inn rebele,*
Ek ki kantite zot bann pese gran.
Zot arsel sa kikenn ki drwat la,
Zot pran brayb,*
Ek kot laport lavil zot refiz donn lazistis sa kikenn ki pov la.
13 Akoz sa, bann ki ena bon zizman pou res trankil dan sa lepok-la,
Parski li pou enn lepok kot pou ena maler.
14 Fer seki bon, ek pa fer seki move,
Pou ki zot kapav kontign viv.
Lerla Zeova Bondie Sef bann larme kitfwa pou avek zot,
Parey kouma zot pe dir.
15 Ena laenn pou seki move ek kontan seki bon,
Ki lazistis gagn laviktwar kot laport lavil.
Kitfwa Zeova Bondie Sef bann larme
Pou montre so faver parmi bann ki reste parmi bann desandan Zozef.’
16 “Akoz sa, ala seki Zeova Bondie Sef bann larme, Zeova, dir:
‘Dan tou bann plas piblik pou tann kriye ek plore,
Ek dan tou bann sime zot pou dir, “Ayo, ayo!”
Zot pou apel bann planter pou gard dey
Ek bann ki exper dan plore pou kriye ek plore.’
17 ‘Dan tou bann karo rezin pou tann kriye ek plore,
Parski mo pou pas parmi zot,’ ala seki Zeova dir.
18 ‘Maler pou bann ki pe bien anvi ki zour Zeova vini!
Be, ki sinifikasion zour Zeova pou ena pou zot?
Li pou nwarte ek pa lalimier.
19 Li pou kouma enn zom ki sove devan enn lion ek ki bat ar enn lours,
Ek kan li rant dan so lakaz, kan li met so lame lor miray, enn serpan mord li.
20 Eski zour Zeova li pa pou enn zour nwarte, ek enn zour kot pena lalimier?
Eski li pa pou enn zour som, kot pena klarte?
21 Mo deteste, mo mepriz zot bann fet,
Ek mo pa kontan bann parfin ki ena pandan zot bann rasanbleman sakre.
22 Mem si zot ofer mwa bann sakrifis ki brile ek bann ofrand ki done kouma enn kado,
Sa bann ofrand-la pa pou fer mwa plezir;
Ek mo pa pou aksepte bann zanimo angrese ki zot ofer kouma bann sakrifis lape.
23 Pa fatig mwa avek tapaz to bann sante;
Ek pa les mwa tann lamizik to bann instriman ki ena lakord.
24 Ki lazistis koule kouma delo,
Ek ki ladrwatir kouma enn larivier ki zame aret koule.
25 Eski zot ti amenn pou mwa bann sakrifis ek bann ofrand ki done kouma enn kado
Pou sa 40 an ki zot ti pase dan dezer la, A pep Izrael?