Ezekiel

39 “Ek twa, garson enn zom, profetiz kont Gog, ek dir li, “Ala seki Segner Siprem* Zeova dir: “Mo pou azir kont twa, Gog, gran sef* Meshek ek Toubal. 2 Mo pou fer twa fer demi-tour, mo pou diriz twa ek mo pou fer twa sorti depi bann rezion pli retire dan Lenor ek mo pou amenn twa lor bann montagn Izrael. 3 Mo pou tap to lark pou ki li tonbe depi to lame gos ek mo pou fer to bann fles tonbe depi to lame drwat. 4 To pou mor lor bann montagn Izrael, twa ek tou to bann latroup solda ek bann pep ki pou avek twa. Mo pou fer tou sort kalite zwazo rapas ek bann zanimo sovaz ki dan bwa manz twa.”’

5 “‘To pou mor lor laplenn, parski mwa mo’nn koze,’ ala seki Segner Siprem Zeova dir.

6 “‘Ek mo pou avoy enn dife kont Magog ek kont bann ki pe viv an sekirite lor bann zil, ek zot pou bizin kone ki momem Zeova. 7 Mo pou fer konn mo nom ki sin parmi mo pep Izrael, ek mo pa pou permet ki dezonor mo nom ki sin ankor; ek bann nasion pou bizin kone ki momem Zeova, sa Kikenn Ki Sin dan Izrael la.’

8 “‘Wi, sa pou arive, ek sa pou realize,’ ala seki Segner Siprem Zeova dir. ‘Se lor sa zour lamem ki mo’nn koze. 9 Bann abitan ki res dan bann lavil Izrael pou sorti ek pou fer dife avek sa bann zarm-la—bann ti boukliye* ek bann gran boukliye, bann lark ek bann fles, bann baton pou lager* ek bann lans. Ek zot pou servi tousala pou alim dife pandan set an. 10 Zot pa pou bizin pran dibwa dan bwa ouswa ramas dibwa pou fer dife dan bann lafore parski zot pou servi sa bann zarm-la pou alim dife.’

“‘Zot pou pran dibien bann ki ti pran zot bann dibien ek zot pou depouy bann ki ti depouy zot,’ ala seki Segner Siprem Zeova dir.

11 “‘Sa zour-la mo pou donn Gog enn tom, isi dan Izrael, dan vale bann ki vwayaz dan kote Les lamer, ek sa vale-la pou blok semin pou bann ki pe pas par sa sime-la. Se laba ki zot pou anter Gog ek tou so bann lafoul dimounn, ek zot pou apel sa vale-la Vale Amonn-Gog.* 12 Lepep Izrael pou pas set mwa pou anter zot pou ki pirifie pei-la. 13 Tou bann dimounn dan pei-la pou travay pou anter zot, ek sa pou donn zot laglwar zour ki mo pou glorifie momem,’ ala seki Segner Siprem Zeova dir.

14 “‘Pou etabli bann zom ki pou kontign pas atraver pei-la ek pou anter bann kadav ki reste lor later, pou pirifie pei-la. Zot pou kontign rode pandan set mwa. 15 Kan bann ki pas atraver pei-la trouv lezo enn dimounn, zot pou met enn mark akote li. Lerla bann ki ti etabli pou antere, pou anter li dan Vale Amonn-Gog. 16 Ek laba pou ena osi enn lavil ki apel Amona.* Ek zot pou pirifie pei-la.’

17 “Me twa, garson enn zom, ala seki Segner Siprem Zeova dir: ‘Dir tou sort kalite zwazo ek tou bann zanimo sovaz ki dan bwa, “Rasanble ansam ek vini. Rasanble toutotour mo sakrifis ki mo pe prepare pou zot, enn gran sakrifis lor bann montagn Izrael. Zot pou manz laser ek bwar disan. 18 Zot pou manz laser bann ki for ek bwar disan bann sef lor later—bann mouton mal, bann agno, bann bouk, ek bann toro—tou bann zanimo ki’nn angrese ki sorti Basann. 19 Zot pou manz lagres ziska ki zot nepli kapav ek zot pou bwar disan ziska ki zot sou ar sa sakrifis ki mo’nn prepare pou zot la.”’

20 “‘Lor mo latab zot vant pou ranpli avek bann seval, bann kondikter kales, bann ki for ek tou sort kalite gerye,’ ala seki Segner Siprem Zeova dir.

21 “‘Mo pou montre mo laglwar parmi bann nasion, ek tou bann nasion pou trouv zizman ki mo’nn amene ek pwisans* ki mo’nn montre parmi zot. 22 Apartir sa zour-la, lepep Izrael pou bizin kone ki momem Zeova zot Bondie. 23 Ek bann nasion pou bizin kone ki lepep Izrael ti al an exil akoz zot prop erer, parski zot ti infidel anver mwa. Alor mo ti kasiet mo figir devan zot ek mo ti livre zot dan lame zot bann lennmi, ek zot tou ti mor avek lepe. 24 Mo ti azir avek zot dapre bann kitsoz inpir ki zot inn fer ek dapre zot bann fot, ek mo ti kasiet mo figir devan zot.’

25 “Alor ala seki Segner Siprem Zeova dir: ‘Mo pou fer bann desandan Zakob ki ti prizonie retourne ek mo pou montre mizerikord* anver lepep Izrael an-antie; ek avek devouman mo pou defann* mo nom ki sin. 26 Apre ki’nn imilie zot akoz tou bann kitsoz infidel ki zot inn fer anver mwa, zot pou res an sekirite dan zot pei, ek pa pou ena personn ki pou fer zot per. 27 Kan mo pou tir zot parmi bann pep pou reamenn zot ek kan mo pou rasanble zot ansam depi bann pei zot bann lennmi, mo pou osi sanktifie mwa parmi zot devan lizie boukou nasion.’

28 “‘Zot pou bizin kone ki momem Zeova zot Bondie kan mo pou avoy zot an exil parmi bann nasion ek ki apre sa, mo pou rasanble zot ek fer zot retourn dan zot pei, san kit personn par deryer. 29 Mo pou nepli kasiet mo figir devan zot, parski mo pou devers mo lespri sin lor lepep Izrael,’ ala seki Segner Siprem Zeova dir.”