Ezekiel

34 Zeova ti koz ar mwa ankor enn fwa ek ti dir: 2 “Garson enn zom, profetiz kont bann berze Izrael. Profetize ek dir bann berze-la, ‘Ala seki Segner Siprem* Zeova dir: “Maler lor bann berze Izrael, ki’nn nouri zotmem! Eski se pa troupo-la ki bann berze bizin nouri? 3 Zot manz lagres-la, zot abiy zotmem ar lalenn-la, ek zot touy sa zanimo ki pli gra la, me zot pa nouri troupo-la. 4 Zot pa’nn ed sa mouton ki feb la pou regagn lafors, ouswa geri seki ti malad la, ouswa met enn bandaz lor seki ti blese la, ouswa re-amenn bann ki ti al lwin, ouswa rod seki ti perdi la; okontrer, zot ti dominn lor bann-la dan enn fason dir ek kriel. 5 Alor bann-la ti disperse parski pa ti ena okenn berze; zot ti disperse ek bann zanimo sovaz ki ena dan bwa ti manz zot. 6 Mo bann mouton ti perdi lor tou bann montagn ek lor tou bann kolinn ki ot; mo bann mouton ti disperse partou lor later, ek personn pa ti pe rod zot ouswa fer zefor pou al rod zot.

7 “‘“Alor zot, bann berze, ekout seki Zeova dir: 8 ‘“Parey kouma mo vivan,” ala seki Segner Siprem Zeova dir, “mo bann mouton inn vinn bann prwa, setadir manze pou tou bann zanimo sovaz ki ena dan bwa, parski pa ti ena okenn berze, ek mo bann berze pa ti rod mo bann mouton; okontrer, zot ti kontign nouri zotmem ek zot pa ti nouri mo bann mouton,”’ 9 alor zot, bann berze, ekout seki Zeova dir. 10 Ala seki Segner Siprem Zeova dir: ‘Mo pou azir kont bann berze, ek mo pou demann zot bann kont pou mo bann mouton,* ek mo pou demann zot pou aret nouri* mo bann mouton, ek bann berze-la pou nepli nouri zotmem. Mo pou sap mo bann mouton depi zot labous, ek zot pou nepli kapav manz bann-la.’”

11 “‘Parski ala seki Segner Siprem Zeova dir: “Ala mo la, ek momem mo pou rod mo bann mouton, ek mo pou pran zot swin. 12 Mo pou pran swin mo bann mouton parey kouma enn berze ki’nn retrouv so bann mouton ki ti’nn disperse ek ki pe nouri zot. Mo pou sap zot depi tou bann plas kot zot ti’nn disperse sa zour ki ti ena niaz ek ki ti fer bien nwar la. 13 Mo pou fer zot sorti parmi bann pep ek rasanble zot depi bann pei, ek mo pou amenn zot dan zot pei ek nouri zot lor bann montagn Izrael, pre ar bann larivier ek pre ar tou bann plas kot bann dimounn reste dan pei-la. 14 Mo pou nouri zot dan enn bon patiraz, ek plas kot zot pou manz lerb pou lor bann montagn Izrael ki ot. Zot pou alonze laba, dan enn plas kot ena boukou lerb pou manze, ek zot pou manz dan bann pli bon patiraz ki ena lor bann montagn Izrael.”

15 “‘“Momem mo pou nouri mo bann mouton, ek momem mo pou fer zot alonze,” ala seki Segner Siprem Zeova dir. 16 “Mo pou rod seki’nn perdi la, mo pou re-amenn seki’nn al lwin la, mo pou met enn bandaz lor seki’nn blese la, ek mo pou ed seki feb la pou regagn lafors; me seki gra la ek seki for la mo pou detrir li. Mo pou nouri sannla-la avek bann zizman.”

17 “‘Me zot, mo bann mouton, ala seki Segner Siprem Zeova dir: “Mo pre pou ziz ant enn mouton ek enn lot, ant bann mouton mal ek bann bouk. 18 Eski li pa ase pou zot ki zot inn manz dan bann pli bon patiraz ki ena? Eski zot bizin osi kraz-kraz leres zot bann patiraz avek zot lapat? Ek apre ki zot inn bwar delo pli kler ki ena, eski zot bizin sal delo-la kan zot pil-pil dan delo-la avek zot lapat? 19 Eski aster mo bann mouton bizin manz dan patiraz ki zot inn kraz-kraze avek zot lapat ek bwar delo ki zot inn sali kan zot inn pil-pil dan delo-la avek zot lapat?”

20 “‘Alor, ala seki Segner Siprem Zeova dir zot: “Ala mo la, ek momem mo pou ziz ant enn mouton ki gra ek enn mouton ki meg, 21 parski zot ti kontign pous tou bann ki malad avek zot lekor, ek zot ti kontign pous bann-la avek zot bann korn ziska ki zot inn dispers bann-la bien lwin. 22 Ek mo pou sap mo bann mouton, ek zot pou nepli bann prwa; ek mo pou ziz ant enn mouton ek enn mouton. 23 Mo pou etabli enn berze lor zot, mo serviter David, ek li pou nouri zot. Limem li pou nouri zot ek li pou vinn zot berze. 24 Ek mwa, Zeova, mo pou vinn zot Bondie, ek mo serviter David pou vinn enn sef parmi zot. Mwa, Zeova, mo’nn koze.

25 “‘“Ek mo pou fer enn lalians lape avek zot, ek mo pou tir bann zanimo sovaz ki danzere dan pei-la, pou ki zot kapav viv an sekirite dan dezer ek dormi dan bann lafore. 26 Mo pou fer zot ek landrwa ki otour mo kolinn vinn enn benediksion, ek mo pou fer lapli tonbe dan bon moman. Bann benediksion pou tonbe parey kouma lapli. 27 Bann pie dan pei-la pou raport zot frwi ek later pou raporte, ek zot pou viv an sekirite dan pei-la. Ek zot pou bizin kone ki momem Zeova kan mo pou kas bann bar zot zoug* ek sap zot dan lame bann ki’nn fer zot vinn bann esklav. 28 Zot pou nepli bann prwa pou bann nasion, bann zanimo sovaz ki ena lor later pa pou devor zot, ek zot pou viv an sekirite, ek pa pou ena personn ki pou fer zot per.

29 “‘“Mo pou donn zot enn plantasion ki pou vinn popiler,* ek zot pou nepli mor akoz lafaminn dan pei-la, ek bann nasion pou nepli imilie zot. 30 ‘Lerla zot pou bizin kone ki mwa, Zeova zot Bondie, mo avek zot ek ki zot, pep Izrael, zot mo pep,’ ala seki Segner Siprem Zeova dir.”’

31 “‘Me zot, mo bann mouton, bann mouton ki mo pran swin, zot zis bann zom, ek mwa mo zot Bondie,’ ala seki Segner Siprem Zeova dir.”