Ezekiel
28 Zeova ti koz ar mwa ankor enn fwa ek ti dir: 2 “Garson enn zom, dir dirizan Tir, ‘Ala seki Segner Siprem* Zeova dir:
“Parski to leker inn ranpli ar lorgey, to pe kontign dir, ‘Mo enn bondie.
Mo asiz lor tronn enn bondie omilie lamer.’
Me to zis enn zom, pa enn bondie,
Mem si dan to leker to santi ki to enn bondie.
3 Gete! To panse to pli saz ki Daniel,
Ek ki pena okenn sekre ki kasiet devan twa!
4 To’nn vinn ris gras-a to sazes ek to bon zizman,
Ek to pe kontign ramas lor ek larzan dan plas kot to gard to bann trezor.
5 To’nn vinn bien ris gras-a to talan pou fer komers,
Ek deplizanpli, to leker inn ranpli avek lorgey akoz to rises.”’
6 “‘Alor ala seki Segner Siprem Zeova dir:
“Parski dan to leker to santi ki to enn bondie,
7 Mo pou fer bann etranze azir kont twa, sa nasion ki pli kriel parmi bann nasion-la,
Ek zot pou tir zot lepe pou detrir tou bann zoli kitsoz ki to’nn gagne gras-a to sazes
Ek zot pou fer twa perdi to laglwar.
8 Zot pou fer twa desann dan trou,*
Ek to pou mor dan enn fason violan anplin milie lamer.
9 Eski to pou kontign dir, ‘Mo enn bondie,’ ar sa kikenn ki pe touy twa la?
To pou zis enn sinp zom, pa enn bondie, dan lame bann ki pou dezonor twa.”’
10 ‘To pou konn lamor ki bann ki pa sirkonsi gagne dan lame bann etranze,
Parski mwa mo’nn koze,’ ala seki Segner Siprem Zeova dir.”
11 Ek Zeova ti koz ar mwa ankor enn fwa ek ti dir: 12 “Garson enn zom, sant enn sante dey konsernan lerwa Tir, ek dir li, ‘Ala seki Segner Siprem Zeova dir:
“To ti enn model ki ti parfe,*
Ranpli ar sazes ek ki ti ena enn bote parfe.
13 To ti dan Eden, zardin Bondie.
To ti dekore avek tou bann pier presie
—Ribi, topaz, ek zasp; krizolit, onix, ek zad; safir, tirkwaz, ek emrod;
Ek zot bann montir ek sipor ti an-or.
Ti prepar zot zour ki ti kree twa.
14 Mo ti etabli twa ek swazir twa kouma seribin ki donn proteksion.
To ti lor Bondie so montagn ki sin, ek to ti mars omilie bann ros ki pe brile.
15 To fason viv ti san defo depi zour ki ti kree twa
Ziska ki to ti koumans fer seki inzis.
16 Akoz to ti fer boukou komers,
To ti koumans ranpli avek laviolans, ek to ti koumans fer pese.
Alor parski to’nn vinn inpir, mo pou met twa deor depi montagn Bondie ek detrir twa,
A seribin ki donn proteksion, mo pou tir twa parmi sa bann ros dife la.
17 To leker ti koumans ranpli ar lorgey akoz to bote.
To laglwar inn gat to sazes.
Mo pou zet twa anba.
Mo pou fer twa vinn enn spektak devan bann lerwa.
18 Akoz to bann pese grav ek to komers malonet, to’nn dezonor to bann tanp.
Mo pou fer enn dife eklate parmi zot, ek li pou bril twa net.
Mo pou fer twa vinn lasann lor later devan tou bann ki pe get twa.
19 Tou bann ki konn twa parmi bann pep pou fixe twa ek pou etone.
To lafin pou arive enn sel kout ek li pou terib,
Ek to pou aret existe pou touletan.”’”
20 Ek Zeova ti koz ar mwa ankor enn fwa ek ti dir: 21 “Garson enn zom, vir to figir ver Sidon, ek profetiz kont li. 22 To bizin dir, ‘Ala seki Segner Siprem Zeova dir:
“Aster-la, A Sidon, mo pou azir kont twa ek mo pou gagn laglwar kot twa;
Ek bann dimounn pou bizin kone ki momem Zeova kan mo pou amenn zizman lor li ek kan mo pou sanktifie gras-a li.
23 Mo pou avoy lepidemi lor li ek disan pou koule dan so bann semin.
Boukou pou mor kot li kan lepe pou vinn kont li dan tou direksion;
Ek zot pou bizin kone ki momem Zeova.
24 “‘“Lerla pep Izrael pou nepli antoure ar bann pikan ki bles zot ek ki fer zot soufer, ar bann nasion ki mepriz zot; ek bann dimounn pou bizin kone ki momem Segner Siprem Zeova.”’
25 “‘Ala seki Segner Siprem Zeova dir: “Kan mo rasanble pep Izrael parmi bann pep kot zot ti disperse, pou sanktifie mwa parmi zot devan lizie bann nasion. Ek zot pou res dan zot pei ki mo ti donn mo serviter Zakob. 26 Zot pou res ladan an sekirite ek pou aranz bann lakaz ek plant bann karo rezin, ek zot pou viv an sekirite kan mo pou amenn zizman lor tou bann ki otour zot ki mepriz zot; ek zot pou bizin kone ki momem Zeova zot Bondie.”’”