Ezekiel

5 “Me twa, garson enn zom, pran enn lepe ki bien fite ek servi li kouma razwar enn kwafer. Raz to latet ek to labarb, ek apre sa pran enn balans pou pez seve-la ek pwal-la, ek diviz zot. 2 Kan bann zour kot inn anserkle lavil inn fini, to pou bril enn tier ladan dan lavil. Apre sa, to pou pran ankor enn tier ek to pou tap li avek lepe-la toutotour lavil,* ek to pou fann dernie tier-la dan divan ek mo pou tir enn lepe ek mo pou pourswiv zot.

3 “To bizin osi pran de-trwa brin ladan ek anvlop zot dan bann pli* to linz. 4 Ek pran ankor inpe ladan, zet zot dan dife ek bril zot. Sa dife-la pou fane partou dan pep Izrael.

5 “Ala seki Segner Siprem* Zeova dir: ‘Sa se Zerizalem. Mo’nn met li omilie bann nasion, avek bann pei toutotour li. 6 Me li ti rebel kont mo bann desizion legal ek mo bann lord, li ti fer bann pli move kitsoz ki bann nasion ek bann pei ki toutotour li. Parski zot inn rezet mo bann desizion legal, ek zot pa’nn swiv mo bann lord.’

7 “Alor, ala seki Segner Siprem Zeova dir: ‘Zot ti fer pli pir ki bann nasion otour zot ek zot pa ti swiv mo bann lord ouswa aplik mo bann desizion legal; okontrer, zot ti swiv bann desizion legal bann nasion ki ti otour zot. 8 Akoz sa, ala seki Segner Siprem Zeova dir: “A lavil, aster-la mo pou azir kont twa, ek se mwa ki pou amenn zizman lor twa devan lizie bann nasion. 9 Mo pou fer kot twa seki zame mo pa’nn fer avan, ek bann kitsoz ki zame mo pa pou refer ankor, akoz tou to bann pratik degoutan.

10 “‘“Alor bann papa ki parmi zot pou manz zot bann garson, ek bann garson pou manz zot papa, ek mo pou amenn zizman lor twa ek mo pou dispers tou bann ki reste dan tou direksion.”’*

11 “Segner Siprem Zeova dir, ‘Alor parey kouma mo vivan, parski se mo tanp ki to’nn fer vinn inpir avek tou to bann zidol degoutan ek avek tou to bann pratik detestab, mwa osi mo pou rezet* twa; mo lizie pa pou sagrin ek mo pa pou montre okenn konpasion. 12 Enn tier to bann abitan pou mor akoz lepidemi* ouswa detrir akoz lafaminn. Enn lot tier pou tonbe toutotour twa akoz lepe. Ek mo pou dispers dernie tier-la dan tou direksion,* ek mo pou tir enn lepe pou pourswiv zot. 13 Lerla mo koler pou fini, ek mo gran koler kont zot pou kalme, ek mo pou satisfe. Ek kan mo pou’nn fini amenn mo gran koler lor zot, zot pou bizin kone ki mwa, Zeova, mo’nn koz avek zot parski mo exiz enn latasman zis pou mo tousel.

14 “‘Mo pou fer twa vinn enn plas ki’nn detrir net ek enn kitsoz ki fer gagn onte parmi bann nasion ki ena otour ek devan lizie tou bann dimounn ki pas par la. 15 To pou vinn enn kitsoz ki fer gagn onte ek ki lezot meprize, enn lexanp ki servi kouma enn lavertisman, ek enn kitsoz orib pou bann nasion otour twa, kan dan mo gran koler mo pou amenn zizman lor twa avek bann pinision bien sever. Mwa, Zeova, mo’nn koze.

16 “‘Mo pou avoy lor zot enn lafaminn ki pou kouma bann fles mortel ki pou detrir zot. Bann fles ki mo pou avoye pou fini zot net. Mo pou fer lafaminn-la vinn pli pir pou zot kan mo pou koup zot bann rezerv manze.* 17 Mo pou avoy lafaminn ek bann zanimo sovaz ki feros lor zot, ek sa bann kitsoz-la pou touy zot bann zanfan. To pou fini net akoz bann lepidemi ek bann masak kot boukou disan pou koule, ek mo pou amenn enn lepe kont twa. Mwa, Zeova, mo’nn koze.’”