L’influence Jésus partout dan le monde

TRADUCTEUR la Bible Edgar Goodspeed inn ecrire: “Dan deux heure-temps Jésus ti kapav dire tou sa bann parole ki bann Evangile dire li’nn raconté, en privé ek en public-la. Pourtant sa tigit ki li’nn dire-la ti tellement touche bann dimoune ki nou kapav dire sans exageré ki personne pa finn influence le monde sa quantité-la.”

Kan Jésus Christ ti termine so travail lor la terre en 33 n.l., li ti ena au moins 120 disciple. (Actes 1:15) Zordi, plus ki deux milliard dimoune dire ki zot chrétien. Bann centaine million lezot reconette ki Jésus enn prophete. So bann l’enseignement finn ena vrai-mem enn l’influence extraordinaire lor bann dimoune.

Mem bann chef religieux ki pa chrétien inn reconette sa l’influence-la. Par exemple, rabbin Hyman Enelow inn ecrire: “Dan l’histoire la religion, Jésus inn vinn personnage ki dimoune pli koné, lor ki dimoune pli etudié ek kikenn ki finn ena plus l’influence.” Enelow inn aussi dire: “Kisannla kapav estime vrai-mem l’influence ki Jésus finn ena? L’amour ki li’nn inspiré, consolation ki li’nn donné, di-bien ki li’nn faire lezot, l’espoir ek la joie ki li’nn ré-donné—personne pa’nn faire couma li dan sa bann domaine-la. Parmi bann dimoune pli important ek bann bon dimoune ki’nn vive lor la terre, personne pa’nn attire ek influence dimoune sa qualité-la. Li’nn vinn personnage pli interessant dan l’Histoire.” Dirigeant hindou Mohandas K. Gandhi ti dire: “Mo pa konn personne ki finn faire autant ki Jésus pou bann dimoune. En realité pena nanyin mal avek religion chrétien.” Mais, li ajouté: “Problem-la, c’est avek zot, bann chrétien. Zot pa mem kapav vive en accord avek zot bann prop l’enseignement.”

Depuis bien longtemps, bann religion soi-disant chrétien pa vive en accord avek bann l’enseignement Jésus. Cecil John Cadoux, enn historien religion chrétien, ti dire ki “sa certain laisser-aller ki finn ena doucement-doucement lor plan moral dan l’Eglise-la,” finn attire “l’attention bann chef religieux depuis . . . 140 apré Jésus Christ.” Li ti aussi dire: “Sa niveau moral bien strict ki ti existé dan commencement-la inn tellement baissé ki sa inn amenn zot pou faire pareil couma lé-monde.”

Situation inn pli deterioré dan quatrieme siecle, kan l’empereur romain Constantin inn accepté religion chrétien. Cadoux ti ecrire: “Bann historien inn remark, ek parfois mem zot inn regrette, sa grand concession ki l’Eglise inn faire kan li’nn faire sa l’alliance-la avek Constantin.” Pendant bann centaine l’année ki’nn suive, bann ki dire ki zot chrétien inn faire enn quantité kitsoz ki faire honté ek ki deshonore nom Christ.

Alors, bann question ki nou bizin pose-nou, c’est: Ki Jésus ti enseigné vrai-mem? Ek ki l’influence so bann l’enseignement bizin ena lor nou?

[Zimage, page 3]

“Mo pa konn personne ki’nn faire autant ki Jésus pou bann dimoune.”—Mohandas K. Gandhi

[Zimage, page 3]

“Personne pa finn autant influence le monde.”—Edgar Goodspeed

[Remerciement photo]

Culver Pictures