Eski Bondié Li enn personne réel?

Bann reponse ki souvent nou tendé:

◼ “Li partout, dan tou kitsoz Li couma di vent.”

◼ “Li enn intelligence ki pa kapav decrire. Enn la force ki nou pa kapav donne okenn forme precis.”

Ki Jésus ti dire?

◼ “Dan lakaz mo Papa ena beaucoup place pou resté.” (Jean 14:2) Jésus ti dire dan enn fason symbolik ki Bondié ena enn lakaz, ou-soit enn place kot Li resté.

◼ “Mo’nn sorti kot le Pere ek mo’nn vinn dan le monde. En plus, mo pé quitte le monde ek mo pé al kot le Pere.” (Jean 16:28) Pou Jésus, Bondié li enn personne bien réel ek ki reste dan enn place precis.

JAMAIS Jésus inn decrire Bondié couma enn la force ki pena okenn forme. Au contraire, li ti koz avek Bondié ek li ti prié Li. Li ti souvent appel Jéhovah so Papa ki dan le ciel, bann parole ki montré relation bien proche ki li ti ena avek Bondié.—Jean 8:19, 38, 54.

C’est vrai ki “okenn zom jamais pa finn trouve Bondié” ek “Bondié Li enn l’Esprit.” (Jean 1:18; 4:24) Mais sa pa vedir ki Li pena okenn lekor ou-soit Li pena okenn forme. La Bible dire nou: “Si ena enn lekor physik, ena aussi enn lekor spirituel.” (1 Corinthiens 15:44) Alors, eski Jéhovah ena enn lekor spirituel?

Oui. Kan Jésus ti ressuscité, li “ti rente . . . dan le ciel-mem pou parette asterla pou nou devant Bondié en personne.” (Hébreux 9:24) Sa aprann nou deux kitsoz important lor Bondié. Premierement, Li ena enn place kot Li resté. Deuxiemement, Li enn Personne, pa zis enn la force puissant ek intelligent ki present partout.

Mais alors, couma eski Bondié ena pouvoir pou dirige tou kitsoz partout? Bondié kapav envoye so l’esprit saint, ou-soit so la force ki agir n’importe ki place dan l’univers. Pareil couma enn papa servi so la main pou console ou-soit pou soutenir so bann zenfant, Bondié servi so l’esprit saint pou realise so projet.—Psaume 104:30; 139:7.

Parski Bondié Li enn personne, li ena aussi enn personnalité. Ena bann kitsoz ki Li content ek bann kitsoz ki Li pa content—Li ena bann sentiment. La Bible dire ki li content so bann serviteur, Li trouve la joie dan bann travail ki Li faire, Li detesté l’idolatrie, ek Li chagrin kan Li trouve mechanceté. (Genèse 6:6; Deutéronome 16:22; 1 Rois 10:9; Psaume 104:31) Dan 1 Timothée 1:11, appel li “Bondié heureux.” Alors sa pa etonne nou ki Jésus ti dire ki nou kapav aprann content sa Bondié-la avek tou nou leker!—Marc 12:30.a

[Note]

[L’encadré lor page 5]

Pareil couma enn papa servi so la main, Bondié servi so l’esprit saint pou realise so projet