Sa zom ki finn change le monde-la

Plusieurs milliard dimoune finn vive ek finn mort lor sa la terre-la. La plupart pa finn laisse okenn l’empreinte pou ki bann dimoune rappel zot apré. Mais selman, ena certain ki finn ena enn grand l’influence lor l’Histoire—ek kitfois mem lor ou la vie toulé-jour.

OU LEVÉ gramatin ek ou commence prepare ou pou al travail. En mem temps ki ou pé prepare ou, ou allume la lumiere. Ou trap enn livre ou-soit enn journal pou lire dan bus. Ou rappel ki ou bizin prend enn antibiotik ki pé aide ou lutte kont enn infection. Ou la journée inn fek commencé ek deja ou’nn tire bann bienfait ar l’influence ki certain zom celebre finn ena.

Michael Faraday Né en 1791, sa anglais ki ti etudié physik-la, ti invente moteur electrik ek dynamo. So l’invention ti aide bann dimoune pou gagne courant.

Cai Lun Li ti enn fonctionnaire dan la cour imperiale la Chine. Li ti developpe bann etape pou fabrik papier vers 105 nou lepok ek sa finn permette pou produire papier en grand quantité.

Johannes Gutenberg Vers 1450, sa inventeur allemand-la, ti faire premier machine pou imprimé avek bann caractere ki kapav bougé. Grace a sa machine-la, li pa ti coute cher pou imprimé, ek sa ti permette bann dimoune gagne bann l’information ki touche enn quantité sujet bien different.

Alexander Fleming En 1928, sa écossais ki ti faire bann recherche-la ti decouvert enn substance antibiotik ki li ti appel pénicilline. Azordi beaucoup dimoune servi bann antibiotik pou traite bann infection ki gagné par bann bacterie.

Pena doute, ki bann decouverte ek bann l’invention ki deux-trois zom inn faire finn permette bann milliard dimoune profite certain l’avantage ek ena enn pli bon la santé.

Mais selman, ena enn zom ki different ar tou sa bann lezot zom-la. Bann dimoune pa konn li couma enn kikenn ki’nn faire enn invention scientifik ou-soit enn decouverte medical. Sa zom-la ti sorti dan enn famille modeste ek sa faire preské 2,000 an depuis ki li’nn mort. Mais, li’nn laisse derriere li enn message bien puissant ki donne bann dimoune l’espoir ek reconfort. Kan nou guette l’effet ki so message finn ena lor la vie bann dimoune, beaucoup pou d’accord ki vrai-mem sa zom-la finn change le monde.

Sa zom-la, c’est Jésus Christ. Ki message li ti preché? Ek ki l’effet sa message-la kapav ena lor ou la vie?