Kifer Li Bon Etidie Labib?

Eski ou’nn deza poz oumem sa bann kestion-la? Si wi, ou pa tousel. Partou lor later, bann dimounn pe poz zotmem bann kestion ki pli inportan dan lavi. Eski ou kapav gagn repons sa bann kestion-la?

Plizir milyon dimounn pou dir: “Wi!” Kifer? Parski zot inn satisfe ar bann repons ki zot inn gagne dan Labib. Eski ou ti pou kontan kone seki Labib dir? Alor, kitfwa ou ti pou kontan gagn enn letid Labib gratis ki bann Temwin Zeova propoze.a

Souvan kan demann bann dimounn pou etidie Labib, sertin dir: “Mo tro okipe.” “Tro difisil pou mwa sa.” “Mo pa’le pran okenn langazman.” Me ena ki trouv sa dan enn lot fason. Zot kontan kan zot gagn lokazion pou aprann seki Labib ansegne. Anou get de-trwa lexanp:

• “Mo ti al legliz Katolik ek Protestan, tanp bann Sik, monaster bann Boudis, ek mo ti etidie larelizion dan liniversite. Pourtan, mo pa ti gagn repons mo bann kestion konsernan Bondie. Apre sa, enn Temwin Zeova ti tap mo laport. Mo ti telman inpresione par so bann repons baze lor Labib ki mo ti aksepte enn letid Labib.”​—Gill, Angleterre.

• “Mo ti ena boukou kestion lor lavi, me mo pa ti satisfe ar bann repons ki mo paster ti donn mwa. Selman, enn Temwin Zeova ti servi zis Labib pou reponn mo bann kestion. Kan li ti demann mwa si mo ti anvi aprann plis, mo ti extra kontan ek mo ti aksepte.”​—Koffi, Bénin.

• “Mo ti anvi kone ki arive kan enn dimounn mor. Mo ti krwar ki bann mor kapav fer ditor bann vivan, ek mo ti anvi kone ki Labib dir lor la. Alor mo ti koumans etidie Labib avek enn kamarad ki ti Temwin.”​—José, Brésil.

• “Mo ti pe esey lir Labib me mo pa ti pe konpran. Apre sa, bann Temwin Zeova ti vinn kot mwa ek ti explik mwa plizir profesi Labib dan enn fason kler. Mo ti anvi kone ki bann lezot kitsoz ankor mo ti kapav aprann.”​—Dennize, Mexique.

• “Mo ti demann momem si Bondie vremem gagn mo traka. Alor mo ti deside pou priye sa Bondie ki Labib koze la. So landemin, bann Temwin ti tap mo laport ek mo ti aksepte enn letid Labib.”​—Anju, Népal.

Sa bann lexperyans-la rapel nou seki Zezi ti dir: “Ere bann ki rekonet ki zot pov lor plan spiritiel.” (Matie 5:3, NW.) Vremem, bann dimounn inn ne avek dezir pou konn Bondie. Ek se zis Bondie tousel ki kapav konble sa bezwin-la. Li fer sa atraver so Parol Labib.

Alor, ki ete enn letid Labib? Kouma ou kapav tir profi ar sa? Prosin lartik pou reponn sa bann kestion-la.