ESKI TO TI KONE?

Bann dimounn ti servi bann moulin pou kraz sereal ek ti fer sa vinn lafarinn pou fer dipin. Dan laplipar lakaz, toulezour bann madam ouswa bann servant ti servi enn moulin koumsa. Dan lepase, bann dimounn ti abitie ar son ki moulin fer kan kraz sereal.​—Exod 11:5; Zeremi 25:10.

Bann desin ek bann stati ki’nn dekouver dan ansien Lezip fer nou konpran kouma bann dimounn ti servi sa bann moulin-la. Enn dimounn ti met lagrin sereal lor enn ros plat ki resanble enn ros kari me ki ena enn kourb. Li ti azenou ek li ti servi enn pli tipti ros pou kraz sereal. Dapre enn liv, sa ti ros-la ti pez ant kat ek nef liv (2 ek 4 kg). Si ti servi sa kouma enn zarm, sa ti kapav touy dimounn.​—Ziz 9:50-54.

Kraz lagrin sereal ti telman inportan pou bien-et enn fami ki enn lalwa dan Labib ti interdi pran angaz enn moulin ki kraz sereal. Nou lir dan Deteronom 24:6: “Personn pa gagn drwa pran angaz enn moulin ki kraz sereal ouswa so parti ki lao, parski koumadir li pe pran angaz seki permet enn dimounn viv.”

Labib dir ki Zezi “bien pre ar leker so Papa.” (Zan 1:​18, NW.) Sa lexpresion-la montre ki Zezi ena enn relasion intim avek Bondie ek ki li ena So faver. Sa lexpresion-la ena enn rapor avek koutim ki bann Zwif ti swiv pandan bann repa.

Dan lepok Zezi, bann Zwif ti alonze lor bann divan ki ti ena otour latab. Pandan repa, sak dimounn so latet ti tourn dan direksion latab, so lipie ek so lekor ti alonze deryer ek ar so koud gos li ti apiy lor enn kousin. Sa pozision-la ti permet li servi so lame drwat. Bann dimounn ki ti pe manze a-tab ti alonze lor zot kote gos, sakenn akote so kamarad. Dapre enn liv, “latet enn dimounn ti pre ar lestoma sa dimounn ki ti pe alonze deryer li la. Koumsa, ti kapav dir ki dimounn-la ti pe ‘alonze bien pre ar leker’ lot-la.”

Kan enn kikenn ti alonze bien pre ar leker enn sef fami ouswa ar sa kikenn ki’nn invit li la, ti konsider sa kouma enn loner spesial ouswa enn privilez. Akoz sa, kan Zezi ti selebre dernie Pak, se lapot Zan, “disip ki Zezi ti kontan” la ki ti alonze pre ar Zezi. Koumsa, Zan ti kapav “koste so latet ar lestoma Zezi” pou poz li enn kestion.​—⁠Zan 13:​23-25, NW; Zan 21:20.