Leson 5

Ki volonté Bondié pou la terre?

Kifer Jéhovah finn crée la terre? (1, 2)

Kifer la terre pa enn paradi zordi? (3)

Ki pou arrive bann mauvais dimoune? (4)

Dan l’avenir, ki Jésus pou faire pou bann malade? pou bann dimoune agé? pou bann dimoune mort? (5, 6)

Pou ki ou aussi ou kapav gagne enn part dan sa bann benediction-la, ki ou bizin faire? (7)

1. Jéhovah ti crée la terre pou ki bann dimoune kapav profite la vie lor la pou touletan. Li ti oulé ki touletan ena bann dimoune droite ek heureux lor la terre. (Psaume 115:16; Isaïe 45:18) La terre jamais pa pou disparette; li pou existé pou touletan.—Psaume 104:5; Ecclésiaste 1:4.

2. Avant ki Bondié ti crée premier dimoune, Li ti choisir enn ti coin lor la terre ek Li ti faire sa vinn enn joli paradi. Li ti appel sa place-la jardin Éden. Li ti mette Adam ek Ève, premier zom ek premier femme dan sa jardin-la. Bondié ti oulé ki Adam ek Ève gagne beaucoup zenfant ek ki zot rempli la terre. Tigit par tigit, zot ti pou faire la terre entier vinn enn paradi.—Genèse 1:28; 2:8, 15.

3. Adam ek Ève finn faire peché kan zot finn desobeir la loi Bondié par expré. Alors, Jéhovah finn mette zot dehors dan jardin Éden. Ala couma Paradi finn perdi. (Genèse 3:1-6, 23) Mais, Jéhovah pa finn blié so projet pou la terre. Li promette pou faire li vinn enn paradi, kot bann dimoune pou kapav vive pou touletan. Couma eski Li pou faire sa?—Psaume 37:29.

4. Avant ki la terre kapav vinn enn paradi, Bondié bizin tire bann mauvais dimoune. (Psaume 37:38) Sa pou arrivé dan enn la-guerre ki appel Har-Maguédôn, kan Li pou tire tou kitsoz ki mauvais. Apré sa, Satan pou al enfermé pou 1,000 an. Sa vedir ki pa pou reste okenn mauvais dimoune ki pou kapav gate la terre encore. Zis peuple Bondié pou sapé.—Révélation 16:14, 16; 20:1-3.

5. Lerla, Jésus Christ pou dirige la terre couma lé-Roi pendant 1,000 an. (Révélation 20:6) Tigit-tigit, li pou tire peché ki ena dan nou l’esprit ek dan nou lekor. Nou pou vinn parfait pareil couma Adam ek Ève ti été avant ki zot ti faire peché. Lerla, maladie, vieillesse ek la mort pou disparette. Bann dimoune malade pou gueri, ek bann dimoune agé pou retrouve zot jeunesse.—Job 33:25; Isaïe 33:24; Révélation 21:3, 4.

6. Pendant règne mille an Jésus, bann dimoune fidel pou travail pou faire la terre entier vinn enn paradi. (Luc 23:43) Bann million dimoune ki finn mort pou ressuscité pou vive lor la terre. (Actes 24:15) Si zot faire seki Bondié demann zot, zot pou contigne vive lor la terre pou touletan. Sinon, zot pou detruire pou touletan.—Jean 5:28, 29; Révélation 20:11-15.

7. Lerla, projet ki Bondié ti ena pou la terre depuis commencement, pou realisé. Eski ou pa ti pou content gagne sa bann benediction ki pé vini-la? Si oui, ou pou bizin contigne aprann konn Jéhovah ek faire seki Li demann ou. Li pou pli facile pou ou faire sa, si ou assisté bann reunion dan la Salle du Royaume bann Témoins de Jéhovah ki pli pré avek ou.—Isaïe 11:9; Hébreux 10:24, 25.

[Zimage, page 10]

Paradi inn perdi

[Zimage, page 11]

Apré Har-Maguédôn, la terre pou changé ek li pou vinn enn paradi