Sapit Onz

‘Kontiyn Rod Rwayom Bondye Avan Tu’

 1. (a) Kifer eski Zezi ti ankuraz bann ki ti pe ekut li pu rod Rwayom avan tu? (b) Ki kestyon eski nu bizin poz numem?

PLIS ki 1,900 an finn pase depi ki Zezi ti fer enn diskur dan Galile kot li ti donn sa konsey la ar bann ki ti pe ekut li: “Kontiyn rod rwayom ek lazistis [Bondye] avan tu.” Me, kifer eski sa konsey la ti enn kitsoz byin-byin inportan? Eski pa plizir syek apre ki Zezi Kris ti pu gayn puvwar dan Rwayom? Wi, me Rwayom Mesi ti pu enn mwayin ki Zeova ti pu servi pu zistifye so drwa ki Li ena pu reyne ek pu realiz so gran proze pu later. Ninport kisannla ki konpran linportans sa bann kitsoz la, pu met Rwayom Bondye an premye dan so lavi. Si sa ti enn kitsoz vre dan premye syek, komye plis li vre zordi, lepok kot Kris finn fini vinn Lerwa! Alor kestyon ki suleve: Eski mo manyer viv montre ki mo pe rod Rwayom Bondye avan tu?—Matye 6:33.

 2. Ki bann kitsoz bann dimunn an zeneral pe rode for-for?

² Avredir zordi plizir milyon dimunn atraver lemond antye pe rod Rwayom avan tu. Zot pe montre ki zot sutenir reyn Rwayom Bondye kan zot fer volonte Bondye vinn sant zot lavi, pwiski zot finn pran langazman avek Li. Lot kote, mazorite bann imin pe interese pu rod bann kitsoz dan lemond. Dimunn galup deryer larzan, deryer dibyin ek bann plezir ki larzan kapav aste. Uswa, zot fer tu zot zefor pu kontiyn zot bann karyer. Par zot fason viv, zot montre ki zot interese ar zotmem, ar bann kitsoz materyel ek ar bann plezir. Si zame zot krwar an Bondye, zot donn Li dezyem plas.—Matye 6:31, 32.

 3. (a) Ki kalite trezor Zezi ti ankuraz so bann disip pu rode, ek kifer? (b) Kifer eski li pa neseser ki nu tro trakas nu pu nu bann bezwin materyel?

³ Me, Zezi ti donn so bann disip sa konsey la: “Aret ramas pu zotmem bann trezor lor later,” pwiski okenn sa bann dibyin la pa pu dir pu tuletan. “Plito,” li ti dir zot, “ramas pu zot bann trezor dan lesyel.” Zot pu fer sa kan zot servi Zeova. Zezi ti ankuraz so bann disip pu gard enn lizye “sinp,” setadir konsantre tu zot latansyon ek zot lenerzi pu fer volonte Bondye. Li finn dir zot: “Zot pa kapav esklav Bondye ek Rises tulede.” Me, ki nu kapav dir lor bann bezwin materyel—manze, linz ek enn plas pu reste? Zezi ti donn sa konsey la: “Aret trakase.” Li ti atir zot latansyon lor bann zwazo—Bondye nuri zot. Li ti ankuraz so bann disip pu tir leson lor bann fler—Bondye abiy zot. Eski bann serviter Zeova ki lor later ek ki ena lintelizans pa vo plis ki bann zwazo uswa bann fler? Alor Zezi ti dir: “Kontiyn rod rwayom ek so lazistis avan tu, ek tu sa bann lezot kitsoz [neseser] la, zot pu gayne apre.” (Mat. 6:19-34) Eski u bann aksyon montre ki u krwar sa?

Pa Les Laverite Rwayom Tufe

 4. Si enn dimunn fixe tro so lespri lor bann kitsoz materyel, ki konsekans sa kapav ena?

⁴ Li bon ki nu konsyan ki nu ena seki neseser pu numem ek pu nu fami lor plan materyel. Me, si enn dimunn fixe tro so lespri lor bann kitsoz materyel, sa kapav ena bann konsekans byin grav. Mem ki Li kapav pretann ki li krwar dan Rwayom Bondye, si dan so leker li met bann lezot kitsoz an premye, laverite Rwayom pu tufe. (Matye 13:18-22) Par egzanp, enn fwa enn zenn dirizan ris ti demann Zezi: “Ki mo bizin fer pu gayn lavi pu tuletan?” Sa misye la ti ena enn bon lavi ek li ti tret lezot byin, me selman li ti tro atase avek so bann dibyin materyel. Li ti difisil pu li abandonn so bann dibyin pu vinn enn disip Kris. Alor, li ti’nn les enn lokazyon pase kot li ti pu kapav gayn privilez pu reyne avek Kris dan lesyel, dan so Rwayom. Akoz sa lerla, Zezi ti dir: “Li pu vremem enn kitsoz difisil pu bann ki ena larzan pu rant dan rwayom Bondye!”—Mark 10:17-23.

 5. (a) Avek ki bann kitsoz Pol ti ankuraz Timote kontant li, ek kifer? (b) Kuma eski Satan servi “lamur pu larzan” kuma enn pyez ki rwinn bann dimunn?

⁵ Plizir lane plitar, lapot Pol ti ekrir Timote ki sa lepok la, ti dan lavil Efez, enn sant komersyal byin ris. Pol ti rapel li: “Nu pa finn amenn nanyin dan lemond, ni nu pu amenn kitsoz ar nu. Alor, si nu ena manze ek linz, nu pu kontant nu ar sa mem.” Li bon si enn kikenn travay pu gayn “manze ek linz” pu limem ek pu so fami. Me, Pol finn met nu an gard: “Bann ki byin deside pu vinn ris tom dan tantasyon, dan enn pyez ek dan buku bann dezir ki pena valer ek ki fer zot ditor, ki plonz bann dimunn dan destriksyon ek dan larwinn.” Satan malin. Pu kumanse, li kapav tant enn dimunn par bann ti kitsoz. Apre, li kumans fer plis presyon, kitfwa dimunn la retruv li devan enn promosyon dan travay uswa enn travay ki pli byin peye, me ki selman pu pran letan ki li ti abitye rezerve pu bann kitsoz spirityel. Si nu pa fer byin atansyon, “lamur pu larzan” kapav tuf bann kitsoz pli inportan an rapor avek Rwayom. Pol ti explike seki arive lerla: “Bann ki finn rod gayn sa lamur la finn al lwin ar lafwa ek zot finn fer zotmem buku ditor.”—1 Timote 6:7-10.

 6. (a) Pu pa rant dan pyez materyalis, ki nu bizin fer? (b) Malgre ki sityasyon lemond dan pins, ki konfyans nu kapav ena?

⁶ Avek enn vre lamur pu so frer Kretyin, Pol ti donn Timote sa konsey la: “Sove devan sa bann kitsoz la” ek “konbat sa bon lager pu lafwa la.” (1 Timote 6:11, 12) Nu pu bizin fer enn bel zefor si nu pale les nu anporte par manyer viv materyalis sa lemond otur nu la. Me, si nu fer bann zefor an akor avek nu lafwa, Zeova pa pu abandonn nu. Mem ki kantite lavi li ser ek ki pli ale ena problem somaz, Zeova pu veye ki nu gayn bann kitsoz ki nu bizin vremem. Pol ti ekrir: “Ki dan zot manyer viv pena lamur pu larzan, me kontant zot ar seki zot ena asterla. Parski [Bondye] finn dir: ‘Zame mo pa pu kit twa ni zame mo pu abandonn twa.’ Pu ki avek bon kuraz nu kapav dir: ‘Zeova Li mo led; mo pa pu per. Ki dimunn kapav fer mwa?’” (Ebre 13:5, 6) Lerwa David li, li ti ekrir: “Mo ti enn zenn zan, mo finn mem vinn vye, ek purtan mo pa finn truv enn kikenn drwat abandone net, ni so desandans rod dipin.”—Psom 37:25.

Bann Premye Disip Donn Legzanp

 7. Ki bann linstriksyon ki Zezi ti donn so bann disip konsernan predikasyon, ek kifer eski sa bann linstriksyon la ti byin adapte?

⁷ Apre ki Zezi ti’nn donn so bann disip enn bon formasyon, li ti avoy zot dan Izrael pu pres labonn nuvel ek pu dir: “Rwayom dan lesyel finn koste.” Sa ti enn mesaz ki ti vremem kapte latansyon bann dimunn! Zezi Kris, Lerwa Mesi, ti parmi zot. Pwiski bann zapot ti pe donn zotmem afon dan servis Bondye, Zezi ti ankuraz zot pu ena konfyans ki Zeova ti pu pran zot kont. Alor, li ti dir: “Pa sarye nanyin pu zot vwayaz, ni baton, ni sak manze, ni dipin, ni pyes larzan; pa bizin zot amenn enn dezyem linz. Me, dan ninport ki lakaz zot rantre, res la mem ek apre zot kapav ale.” (Matye 10:5-10; Lik 9:1-6) Zeova ti pu fer enn manyer ki zot gayn seki zot ti bizin atraver bann lezot Izraelit, ki ti ena labitid resevwar bann etranze.

 8. (a) Enn tipe zis avan so lamor, kifer eski Zezi ti donn bann nuvo linstriksyon konsernan predikasyon? (b) Me ki kitsoz ti pu bizin res tuzur an premye dan lavi bann disip Zezi?

⁸ Me plitar, zis avan so lamor, Zezi ti averti so bann zapot ki dan lavenir zot ti pu travay dan bann sirkonstans ki ti pu sanze. Pwiski lotorite mem ti pu kont zot travay, kitfwa buku an Izrael ti pu nepli dispoze kuma avan pu akeyir zot. Anplis, zot ti pu bizin usi amenn mesaz Rwayom dan bann nasyon ki pa Zwif. Alor la, zot ti pu bizin pran avek zot “enn portmone” ek “enn sak manze.” Me mem sa, zot ti pu bizin kontiyn rod Rwayom Zeova ek so lazistis avan tu ek gard konfyans ki Zeova ti pu beni bann zefor ki zot ti pu fer pu gayn manze ek linz ki zot ti bizin.—Lik 22:35-37.

 9. Kuma eski Pol ti met Rwayom an premye dan so lavi an mem tan ki li ti pran swin so bann bezwin materyel, ek ki konsey li ti done lor sa size la?

⁹ Lapot Pol ti enn bon legzanp enn kikenn ki ti swiv konsey Zezi. Pol ti fer so minister vinn kitsoz pli inportan dan so lavi. (Akt 20:24, 25) Kan li ti al dan enn rezyon pu prese, li ti mem travay pu gayn so bann kitsoz materyel, li ti pe kud latant. Li pa ti atann ki lezot okip li. (Akt 18:1-4; 1 Tesalonisyin 2:9) Me, kan ena ti resevwar li ek ti ofer li kado pu montre zot lamur pu li, li ti aksepte avek rekonesans. (Akt 16:15, 34; Filipyin 4:15-17) Pol pa ti ankuraz bann Kretyin pu negliz zot responsabilite familyal pu zot kapav prese, me li ti plito ankuraz zot pu truv lekilib dan zot bann diferan responsabilite. Li ti konsey zot pu travay, pu kontan zot fami, ek pu partaz avek lezot. (Efezyin 4:28; 2 Tesalonisyin 3:7-12) Li ti ankuraz zot pu fer Bondye konfyans olye ki zot kont lor bann dibyin materyel. Li ti usi ankuraz zot pu servi zot lavi enn fason ki montre ki zot ti vremem konpran ki kitsoz ki ti pli inportan. An akor avek bann lanseynman Zezi, sa ti vedir rod Rwayom Bondye ek so lazistis avan tu.—Filipyin 1:9-11.

Gard Rwayom Premye dan U Lavi

10. Ki vedir ‘rod Rwayom avan tu’?

¹⁰ Ki kantite eski nu pres labonn nuvel lor Rwayom Bondye personelman avek lezot? Sa depann, an parti, lor nu sityasyon ek profonder nu rekonesans. Mazinn sa byin: Zezi pa ti dir, ‘Rod Rwayom kan zot pena nanyin pu fer.’ Etandone ki li ti konn linportans Rwayom, Zezi ti fer konn volonte so Papa kan li ti dir: “Kontinye rod rwayom.” (Lik 12:31) Mem ki laplipar parmi nu bizin travay pu pran swin nu bezwin ek bezwin nu fami, si nu ena lafwa, nu lavi pu turn otur travay Rwayom ki Bondye finn donn nu. An mem tan, nu pu pran kont nu bann responsabilite familyal.—1 Timote 5:8.

11. (a) Ki legzanp Zezi ti done pu montre ki tu bann dimunn pa kapav fer mem kantite pu proklam mesaz Rwayom? (b) Ki bann fakter ki zwe enn rol lor kantite ki enn kikenn kapav fer?

¹¹ Sertin parmi nu kapav pas plis letan ki lezot pu pres labonn nuvel lor Rwayom. Me dan legzanp lor bann diferan kalite later ki Zezi ti done, li ti montre ki tu bann ki zot leker kuma bon later pu raport frwi. Ki kantite? Sityasyon tu dimunn pa parey. Laz, lasante, ek responsabilite familyal, tusala zwe enn rol. Me, si vremem nu apresye valer labonn nuvel lor Rwayom, nu kapav fer buku.—Matye 13:23.

12. Lor ki bon lobzektif spirityel bann zenn sirtu ankuraze pu reflesi?

¹² Li bon ki nu ena bann lobzektif ki pu ed nu pu partisip plis dan nu minister pu Rwayom. Bann zenn bizin reflesi serye-serye lor bon legzanp zenn Kretyin Timote, ki ti byin devwe dan so minister. (Filipyin 2:19-22) Ki kapav ena pli bon pu zot apart fer servis aplintan kan zot fini lekol? Bann ki pli aze usi kapav tir profi si zot fixe bann bon lobzektif spirityel.

13. (a) Kisannla ki deside seki nu kapav fer personelman dan servis Rwayom? (b) Si vremem nu rod Rwayom avan tu, ki nu pu pruve?

¹³ Olye ki nu kritik bann ki nu panse ti kapav fer plis, nu bizin plito les nu lafwa pus nu pu amelyor numem, pu ki nu kapav servi Bondye plin-plin, dapre seki nu prop sityasyon permet. (Romin 14:10-12; Galat 6:4, 5) Parey kuma legzanp Zob finn montre, Satan pretann ki nu pli atase ar nu bann dibyin materyel, ar nu prop konfor, ek ar nu byinet ek ki nu servi Bondye zis par enn lintere personel. Me, si vremem nu pe rod Rwayom avan tu, abe nu pe fer nu par pu pruve ki Dyab vremem enn gran manter. Nu pe montre klerman ki servis Bondye, sa mem ki vinn premye dan nu lavi. Lerla, par seki nu dir ek nu fer, nu montre nu profon lamur pu Zeova, nu montre ki nu sutenir fidelman so suverennte ek nu montre nu lamur pu nu prosin.—Zob 1:9-11; 2:4, 5; Proverb 27:11.

14. (a) Kifer eski nu tir profi kan nu ena enn program pu partisip dan minister? (b) Ziska ki pwin buku Temwin pe partisip dan minister?

¹⁴ Enn program kapav ed nu pu fer plis. Zeova mem ena enn “letan fixe” pu realiz so volonte. (Egzod 9:5; Mark 1:15) Si posib, li bon ki nu rezerv enn uswa de lokazyon fix par semenn pu partisip dan minister. Plizir santenn milye Temwin Zeova atraver lemond antye fer pyonye oxilyer, zot pas apepre dezertan par zur pu pres labonn nuvel. Plizir santenn milye lezot temwin servi kuma pyonye permanan, ek zot pas apepre dezertan-edmi par zur pu anons mesaz Rwayom. Bann pyonye spesyal ek misyoner pas plis letan ankor dan servis Rwayom. Nu kapav rod usi bann lokazyon pu partaz nu lesperans Rwayom enn fason okazyonel avek ninport kisannla ki ekut nu. (Zan 4:7-15) Nu bizin ena dezir pu partisip afon dan sa travay la dapre nu sityasyon, parski Zezi ti anonse: “Sa bonn nuvel lor rwayom la pu prese partu kot dimunn reste lor later kuma enn temwaynaz pu bann nasyon; ek lerla lafin pu vini.”—Matye 24:14; Efezyin 5:15-17.

15. An rapor avek nu minister, kifer eski u panse konsey ki ena dan 1 Korintyin 15:58 li aplik ar nu?

¹⁵ Kuma enn sel fami partu lor later, dan ninport ki peyi zot viv, bann Temwin Zeova pe partisip dan sa privilez servis la. Zot aplik ar zotmem sa konsey Labib inspire par Bondye la: “Vinn ferm ek solid, ena tuzur buku pu fer dan travay Senyer, parski zot kone ki zot lapenn pa pu dan vid devan Senyer.”—1 Korintyin 15:58.

Kestyon Revizyon

• Kan Zezi ti dir ‘rod Rwayom avan tu,’ dapre li, ki kitsoz ki bizin vinn an dezyem?

• Kuma eski nu bizin konsider responsabilite pu pran numem ek nu fami kont lor plan materyel? Ki led Bondye donn nu?

• Dan ki bann diferan faset servis Rwayom nu kapav partisipe?

[Zimaz paz 107]

Dan tu peyi, zordi bann Temwin Zeova pe pres labonn nuvel, avan ki lafin vini