Bon Berze ek Bann Lanklo

Zezi pe kontign ansegne dan Zide. Asterla, li atir latansion bann dimounn lor bann kitsoz ki bann Zwif konn bien: bann mouton ek bann lanklo. Me li pe koz dan enn fason sinbolik. Kitfwa sa fer zot rapel sa bann parol David la: “Lesegner [“Zeova,” NW] limem mo berze; akoz sa mo pa mank nannye. Li amenn mwa repoze dan patiraz lerb tann.” (Psom 23:1, 2) Dan enn lot psom, David ti invit nasion Izrael: “Anou adore ek prosterne; anou azenou devan Zeova nou Kreater. Parski Li nou Bondie, ek nou bann dimounn ki dan so patiraz.” (Psom 95:6, 7, NW.) Depi ki bann Izraelit anba Lalwa, souvan ti konpar zot ar enn troupo mouton.

Sa bann ‘mouton-la’ ti dan enn “lanklo” parski zot ti ne anba lalians Lalwa Mozaik. Lalwa ti kouma enn baraz ki ti protez zot kont linflians move pratik bann dimounn ki pa ti anba Lalwa. Selman, sertin Izraelit ti maltret troupo Bondie. Zezi dir: “Vremem laverite mo dir zot, seki pa rant dan park [“lanklo,” NW] mouton par laport me li sot miray, li enn voler, li enn bandi. Me seki pas par laport, limem berze bann mouton.”​—Zan 10:1, 2.

Kan zot tann sa, kitfwa bann dimounn pe pans bann zom ki ti pretann ki zot Lemesi, ouswa Kris. Sa bann zom-la kouma bann voler ek bann bandi. Fode pa ki bann dimounn swiv sa bann inposter-la. Zot bizin plito swiv “berze bann mouton.” Konsernan sa berze-la, Zezi dir:

“Gardien [“laport,” NW] park ouver laport pou li: bann mouton tann lavwa berze letan li kriy sakenn par so nom e li fer zot sorti. Kan li finn amenn tou so mouton deor, li mars devan zot, bannla swiv li, parski zot konn so lavwa. Zot pa pou swiv enn etranze; kan zot tann lavwa enn etranze zot sove parski zot pa konn lavwa lezot dimoun.”​—Zan 10:3-5.

Inpe letan avan, Zan Batis, parey kouma enn gardien laport, ti idantifie Zezi kouma sa kikenn ki bann mouton sinbolik la ti bizin swiv. Ek sertin mouton, dan Galile ek dan Zide, ti rekonet lavwa Zezi. Kotsa li pou ‘amenn zot’? Ek ki zot pou gagne kan zot swiv li? Sertin ki’nn tann sa lexanp-la sirman pe poz zot sa bann kestion-la parski “zot pa ti konpran nanye lor seki li ti pe dir.”​—Zan 10:6.

Zezi explik zot: “Vremem laverite mo dir zot, momem laport bann mouton. Tou bann seki finn vinn avan mwa [“dan mo plas,” NW], bann voler, bann bandi e bann mouton pa finn ekout zot. Momem laport; seki pas par mwa, mo pou sov li, li pou kapav rantre sorti . . . e pou touzour ena patiraz pou li.”​—Zan 10:7-9.

Li kler ki Zezi pe donn enn nouvo lansegnman. Bann dimounn ki pe ekout li kone ki li pa laport lalians Lalwa, ki existe depi bann santenn lane. Alor, li bizin pe koz lor enn lot lanklo kot bann mouton ki li pe ‘amene’ pou rantre. Ki zot pou gagne?

Zezi donn bann lezot lexplikasion lor so rol, ek li dir: “Mo finn vini pou zot (bann mouton) gagn lavi, e pouki zot gagn li anabondans. Momem bon berze; enn bon berze expoz [“donn,” NW] so lavi pou so bann mouton.” (Zan 10:10, 11) Inpe letan avan, Zezi ti rasir so bann disip kan li ti dir: “Pa gagn per, ti troupo, parski Bondie kontan pou donn zot . . . Rwayom.” (Lik 12:32) Wi, se bann ki form parti “ti troupo” ki Zezi pou amenn dan enn nouvo lanklo, pou ki zot kapav “gagn lavi, e . . . gagn li anabondans.” Se vremem enn benediksion pou form parti sa troupo-la!

Zezi donn bann lezot explikasion. Li dir: “Mo ena lezot mouton ankor me zot pa dan sa park [“lanklo,” NW] la . . . mo bizin al rod zot osi e zot pou ekout mo lavwa. Lerla pou ena enn sel troupo ek enn sel berze.” (Zan 10:16) Sa bann ‘lezot mouton-la,’ zot pa dan “sa park la.” Alor, sa bann mouton-la zot dan enn lot lanklo ki diferan ar “ti troupo” ki pou gagn Rwayom. Sa de lanklo-la se de lesperans bien diferan. Me kanmem sa, bann mouton ki dan toulede lanklo gagn bann benediksion gras-a sakrifis Zezi. Zezi dir: “Akoz samem mo papa kontan mwa parski mo expoz [“donn,” NW] mo lavi.”​—Zan 10:17.

Boukou dimounn dan lafoul dir: “Ena enn demon lor li, li fou.” Me lezot vremem interese ar seki li pe dir ek zot dispoze pou swiv Bon Berze. Zot dir: “Sa bann parol la pa kapav sorti ar enn dimoun ki ena demon lor li; eski demon kapav ouver lizie aveg?” (Zan 10:20, 21) Sirman zot pe koz lor mirak ki Zezi ti fer kan li ti geri enn zom ki ti ne aveg.