LESON 45

Ki Savedir Gard Nou Netralite?

Version Inprime

Zezi ti dir ki fode pa ki so bann disip form parti dan lemond. (Zan 15:19) Li ti pe rod dir ki nou bizin gard nou netralite, setadir ki nou pa pran parti dan bann zafer politik ouswa dan bann lager. Me nou bizin rekonet, ki li pa touletan fasil pou fer sa. Bann dimounn kapav boufonn nou akoz sa. Kouma nou kapav gard nou netralite ek res fidel anver Zeova?

1. Ki latitid bann vre Kretien bizin ena anver bann gouvernman?

Bann Kretien respekte bann gouvernman parski Zezi ti dir “rann Sezar seki pou Sezar.” Savedir ki nou obeir bann lalwa ki ena dan nou pei, kouma par exanp pey tax. (Mark 12:17) Labib ansegn nou ki bann gouvernman pe dirize zis parski Zeova pe permet zot fer sa. (Romin 13:1) Alor nou rekonet ki bann gouvernman ena mwins lotorite ki Bondie. Nou kont lor Bondie ek so Rwayom ki dan lesiel pou regle bann problem ki ena dan lemond.

2. Kouma nou kapav montre ki nou gard nou netralite?

Parey kouma Zezi, nou pa pran par dan bann zafer politik. Kan bann dimounn ti trouv Zezi fer enn mirak ek ti esey fer li vinn zot lerwa, li ti refize. (Zan 6:15) Kifer? Parski kouma li ti dir plitar: “Mo Rwayom pa lor later.” (Zan 18:36) Parski nou bann disip Zezi, nou montre ki nou gard nou netralite dan diferan fason. Par exanp, nou pa partisip dan bann lager. (Lir Mishe 4:3.) Nou respekte bann sinbol nasional, kouma par exanp pavion, me nou pa ador zot. (1 Zan 5:21) Ek nou pa pou soutenir ouswa al kont okenn parti politik ouswa ninport ki kandida. Kan nou fer bann kitsoz koumsa, nou montre ki nou fidel anver gouvernman Bondie, setadir Rwayom Bondie.

ANOU GET INPE PLIS

Get sertin sitiasion kot li kapav difisil pou gard nou netralite, ek gete kouma ou kapav pran bann desizion ki fer Zeova plezir.

Enn misie pe gard so netralite. Li pa pe ekout de kandida politik ki rival ek ki pe koz ar lafoul.

3. Bann vre Kretien gard zot netralite

Zezi ek so bann disip finn donn nou lexanp dan sa domenn-la. Lir Romin 13:1, 5-7 ek 1 Pier 2:13, 14. Apre sa, zwe VIDEO-la ek get sa bann kestion-la ansam:

VIDEO: Bann Vre Kretien Gard Zot Netralite—1^e Parti (4:28)

Kifer nou bizin respekte bann gouvernman?
Dan ki diferan fason, nou kapav montre ki nou soumet ar bann gouvernman?

Kan ena enn lager, sertin pei dir ki zot pa pran okenn parti, me selman apre, zot montre ki zot soutenir toulede kote. Me ki vedir vremem gard nou netralite? Lir Zan 17:16. Apre sa, zwe VIDEO-la ek get sa kestion-la ansam:

VIDEO: Bann Vre Kretien Gard Zot Netralite—2^em Parti (3:11)

Ki vedir gard nou netralite?

Me ki nou pou fer si bann lotorite demann nou pou fer enn kitsoz ki al kont bann lalwa Bondie? Lir Zistwar Bann Apot 5:28, 29. Apre sa, zwe VIDEO-la ek get sa bann kestion-la ansam:

VIDEO: Bann Vre Kretien Gard Zot Netralite—3^em Parti (1:18)

Si seki bann gouvernman demann nou al kont bann lalwa Bondie, kisannla nou bizin obeir?
Sit sertin sitiasion kot enn Kretien pa pou obeir bann lalwa gouvernman.

4. Montre ki ou pa pran okenn parti dan ou bann aksion ek ou bann panse

Lir 1 Zan 5:21. Apre sa, zwe VIDEO-la ek get sa bann kestion-la ansam:

VIDEO: Kifer Bann Vre Kretien Bizin Ena Kouraz—Pou Gard Zot Netralite (2:49)

Dan video-la, kifer Ayenge ti desid pou pa rant dan enn parti politik ouswa partisip dan bann seremoni nasional, kouma par exanp salie drapo?
Eski ou panse ki li’nn pran enn bon desizion?

Eski ena lezot sitiasion ankor kot li kapav difisil pou gard nou netralite? Zwe VIDEO-la ek apre sa, get sa bann kestion-la ansam:

VIDEO: Bann Leson dan Latour Degard —Gard To Netralite dan enn Lemond Divize (5:16)

Kouma nou kapav gard nou netralite konsernan enn levennman sportif internasional?
Kouma nou kapav gard nou netralite mem kan seki bann politisien deside konsern nou personelman?
Kouma bann linformasion ouswa bann dimounn ki nou frekante kapav ena enn lefe lor nou netralite?

Zimaz: 1. Enn group dimounn ki ankoler pe trap bann pankart ek pe proteste. 2. Pandan enn levennman sportif, enn misie pe kriye avek lazwa avek enn gran pavion dan so lame. 3. Enn zelev pe sant lim nasional. 4. Enn solda pe tini enn fizi dan so lame. 5. De politisien pe fer enn deba. 6. Enn madam pe met so papie vot dan bwat. — Dan ki sitiasion enn Kretien bizin gard so netralite dan seki li fer ek seki li panse?

SERTIN KAPAV DEMANDE: “Kifer to pa salie drapo ouswa sant lim nasional?”

Ki ou ti pou reponn?

SEKI NOU’NN APRANN

Bann Kretien fer zefor pou pa pran parti dan bann zafer politik, ki li dan seki zot dir, fer, ouswa panse.

Eski Ou Rapel?

Ki latitid nou bizin ena anver bann gouvernman?
Kifer nou bizin pa pran parti dan bann zafer politik?
Sit diferan sitiasion kot li kapav difisil pou gard nou netralite.

Dat ki’nn fini sa leson-la:

Mo Lobzektif

Reflesi lor enn sitiasion kot li kapav difisil pou mo gard mo netralite, ek reflesi lor seki mo pou dir ek fer.

Lezot lobzektif:

Mo bann lezot lobzektif

DEKOUVER

Ki sakrifis kitfwa nou pou bizin fer pou gard nou netralite?

Zame Zeova Pa’nn Les Nou Tonbe (3:14)

Kouma bann fami kapav prepar zot alavans pou bann sitiasion kot kitfwa li pou difisil pou zot pa pran okenn parti?

Gard Nou Netralite dan Bann Levennman Piblik (4:25)

Kifer defann so pei se pa pli gran loner ki enn dimounn kapav ena?

“Pou Bondie Tou Kiksoz Posib” (5:19)

Gete kouma nou kapav gard nou netralite kan nou pran bann desizion konsernan nou travay.

“Sakenn pou sarié so prop charge” (Latour Degard, 1^e Avril 2006)