Zeova Pran U Kont

“Zet tu zot traka lor [Bondye], parski Li pran zot kont.”—1 PYER 5:7.

 1. Dan ki fason inportan eski Zeova ek Satan zot byin diferan?

ZEOVA ek Satan zot byin diferan. Satan rezet tu dimunn ki atire par Zeova. Enn liv ki aksepte par buku dimunn koz lor sa diferans la. Konsernan bann travay ki Satan fer ek ki mansyone dan liv Zob, Encyclopædia Britannica (1970) dir: ‘Travay Satan se pu al partu lor later pu veye seki bann dimunn pe fer pu li kapav zis akiz zot. So travay li lekontrer avek travay Bondye parski “lizye Bondye” li, li al partu lor later pu donn lafors tu bon dimunn. (II Kron. xvi, 9). Satan tuletan dut mobil bann dimunn. Dapre li bann dimunn fer seki bon selman par lintere. Bondye inn permet li teste si sa vre, me dapre limit ki Li, Li’nn fixe.’ Wi, vremem ena enn gran diferans ant Bondye ek Satan!—Zob 1:6-12; 2:1-7.

2, 3. (a) Kuma eski nu konpran sinifikasyon mo “Dyab” par seki’nn ariv Zob? (b) Kuma eski Labib montre ki Satan pe kontiyn akiz bann serviter Bondye ki lor later?

² An grek, mo ki servi pu “Dyab” vedir “kikenn ki fer bann fos lakizasyon,” “kikenn ki koz manti lor enn lot dimunn pu gat so repitasyon.” Liv Zob montre lakizasyon ki Satan ti fer lor Zob, ki ti enn serviter fidel Zeova. Li ti pretann ki Zob ador Zeova zis par lintere, li ti dir: “Eski pu naryin ki Zob ena lakrint pu Bondye?” (Zob 1:9) Kan nu lir liv Zob nu truve ki malgre tu so bann problem, Zob ti vinn ankor pli pros avek Zeova. (Zob 10:9, 12; 12:9, 10; 19:25; 27:5; 28:28) Apre so leprev, Zob ti dir Bondye: “Par seki lezot finn dir, mo’nn tann koz lor twa, me asterla mo prop lizye finn truv twa.”—Zob 42:5.

³ Eski Satan inn aret akiz bann fidel serviter Bondye depi lepok Zob? Non. Nu pe viv lepok lafin. Liv Revelasyon montre ki dan nu lepok , Satan pe kontinye akiz bann frer Zezi, setadir bann Kretyin ki’nn swazire pu al viv dan lesyel. Li pe usi akiz bann lezot Kretyin fidel ki travay ansam avek bannla. (2 Timote 3:12; Revelasyon 12:10, 17) Donk, antan ki bann vre Kretyin, nu byin bizin sumet nu ar Zeova ki pran nu kont. Nu bizin usi servi Li avek enn profon lamur ek lerla, nu pu montre ki lakizasyon Satan fos. Se kan nu fer tusala ki nu pu fer leker Zeova kontan.—Proverb 27:11.

Zeova Rod Bann Fason pu Ed Nu

4, 5. (a) Kontrerman ar Satan, ki Zeova Li, Li rode lor later? (b) Si nu anvi gayn faver Zeova ki nu bizin fer?

⁴ Satan pe promne partu lor later pu rod akiz enn kikenn ek pu devor li. (Zob 1:7, 9; 1 Pyer 5:8) Parkont Zeova Li, Li rod ed tu seki bizin so lafors. Profet Anani ti dir Lerwa Aza: “Lizye Zeova promne partu lor later pu donn lafors bann seki pe servi Li avek tu zot leker.” (2 Kronik 16:9) Wi, Satan egzaminn bann dimunn avek buku laenn, me Zeova Li, Li pran zot kont avek buku lamur. Enn gran diferans, pavre?

⁵ Zeova pa kuma enn espyon ki vey nu pu dekuver tu nu ti fot ek nu defo. Enn ekrivin liv Psom ti ekrir: “Si to ti get zis bann erer, O Ya, O Zeova, kisannla ti pu kapav debut devan twa?” (Psom 130:3) Nu konn repons la: personn. (Eklezyast 7:20) Si nu apros ar Zeova avek tu nu leker, so lizye pu lor nu. Li pa pu vey nu, pu kondann nu, me li pu get bann zefor ki nu fer. Si nu priye Li pu ed nu ek pu pardonn nu, Li pu reponn nu lapriyer. Lapot Pyer ti ekrir: “Lizye Zeova lor bann dimunn ki drwat ek so zorey tann zot siplikasyon; me figir Zeova turne kont bann dimunn ki fer move kitsoz.”—1 Pyer 3:12.

 6. Kuma seki’nn ariv David li an mem tan enn sulazman ek enn warning pu nu?

⁶ David ti inparfe ek li ti fer enn pese byin grav. (2 Samyel 12:7-9) Me par lapriyer, li ti devid so leker ar Zeova ek li ti apros ar Li. (Psom 51:1-12, tit) Zeova ti ekut so lapriyer ek Li ti pardonn li, mem si David ti bizin pey bann move konsekans so pese. (2 Samyel 12:10-14) Seki nu aprann la donn nu enn sulazman. Me an mem tan se enn warning. Se enn sulazman kan nu kone ki Zeova pre pu pardonn nu pese si vremem nu regret seki nu’nn fer. Me sa fer nu reflesi lor bann konsekans grav ki nu kapav gayne kan nu fer pese. (Galat 6:7-9) Si nu anvi apros nu ar Zeova, nu bizin res pli lwin ki nu kapav ar ninport ki kitsoz ki Li pa kontan.—Psom 97:10.

Zeova Atir So Bann Serviter ver Li

 7. Ki kalite dimunn ki Zeova gete ek kuma eski Li atir zot ver Li?

⁷ David ti ekrir dan enn so bann psom: “Zeova gran, purtan Li truv enn kikenn ki konn abes li; me enn kikenn ki vantar, Zeova konn li zis de lwin.” (Psom 138:6) Enn lot psom dir parey: “Kisannla kuma Zeova nu Bondye, ki res lao? Li abes Li pu get lesyel ek later, Li elev sa ti dimunn la ek Li tir li dan lapusyer.” (Psom 113:5-7) Wi, nu gran Kreater abes Li pu get anba lor later. So lizye truv kikenn “ki konn abes li”, “sa ti dimunn la,” dimunn ki pe ‘pleyne akoz tu bann move kitsoz ki ena.’ (Ezekyel 9:4) Li servi So Garson pu atir sa kalite dimunn la ver Li. Kan Zezi ti lor later, li ti dir: “Personn pa kapav vinn ver mwa si mo Papa, ki’nn avoy mwa, pa atir li . . . Personn pa kapav vinn ver mwa, si mo Papa pa permet li vini.”—Zan 6:44, 65.

8, 9. (a) Kifer eski nu tu nu bizin aksepte Zezi? (b) Kifer eski sakrifis Zezi se enn laranzman extraordiner?

⁸ Tu dimunn bizin aksepte Zezi ek ena lafwa dan so sakrifis. Kifer? Se parski zot bann peser ek zot inn deturne ar Bondye. (Zan 3:36) Zot bizin refer lape avek Bondye. (2 Korintyin 5:20) Bondye pa’nn atann ki bann dimunn peser sipliy Li pu fer laranzman pu rekonsilye avek Li. Lapot Pol ti ekrir: ‘Bondye finn pruve ki kantite Li kontan nu parski Kris finn mor pu nu alor ki nu ti ankor bann dimunn ki fer pese. . . . Donk, kan nu ti ankor bann lennmi Bondye, Li ti rekonsilye nu avek Li atraver lamor so Garson. Asterla ki nu’nn rekonsilye avek Li, nu pli sir ankor ki Li pu sov nu.’—Romin 5:8, 10.

⁹ Li byin vre ki Bondye pe rekonsilye bann dimunn avek Li. Lapot Zan ti montre sa laverite la kan li ti ekrir: “Par sa nu finn truv lamur Bondye: se kan Li’nn avoy dan lemond so sel Garson ki Li’nn kre direk, pu ki nu kapav gayn lavi par li. Donk, lamur dan sa ka la, se pa ki nu’nn kontan Bondye, me Li ki’nn kontan nu ek Li’nn donn so Garson kuma enn sakrifis pu kuver nu bann pese.” (1 Zan 4:9, 10) Se pa bann dimunn ki’nn fer premye pa, me Bondye. Eski u pa atire par enn Bondye ki’nn montre sa kantite lamur la pu nu, bann dimunn ki pa ti zis “peser,” me ki ti usi so bann “lennmi”?—Zan 3:16.

Nu Bizin Rod Zeova

10, 11. (a) Ki nu bizin fer pu rod Zeova? (b) Kuma eski nu bizin konsider lemond Satan?

¹⁰ Byinsir Zeova pa fors nu pu servi Li. Nu bizin “rod Li ek truv Li vremem, parski an realite Li pa lwin avek sakenn parmi nu.” (Akt 17:27) Nu bizin rekonet ki Zeova ena drwa pu demann nu sumet ar Li. Disip Zak ti ekrir: “Sumet zot ar Bondye; me reziste kont Dyab, li pu sove, li pu al lwin ar zot. Vinn pros ar Bondye ek Li pu vinn pros ar zot. Netway zot lamin zot ki fer pese, ek fer zot leker vinn prop, zot bann ki pa kapav pran desizyon.” (Zak 4:7, 8) Nu bizin pa ezite pu tini ferm kont Dyab ek res ferm dan nu servis pu Zeova.

¹¹ Sa vedir ki nu bizin pran nu distans avek move lemond Satan. Zak ti usi ekrir: “Eski zot pa kone ki si nu kamarad avek lemond nu pu vinn lennmi ar Bondye? Donk, ninport kisannla ki anvi vinn kamarad ar lemond pe fer limem vinn lennmi ar Bondye.” (Zak 4:4) Lekontrer li usi vre, si nu anvi vinn bann kamarad Zeova, nu bizin atann ki lemond Satan pu deteste nu.—Zan 15:19; 1 Zan 3:13.

12. (a) Ki bann parol ankurazan eski David finn ekrir? (b) Ki warning eski Zeova ti done par profet Azarya?

¹² Lemond Satan pu fer nu gayn bann problem. Dan sa moman la, nu bizin priye Zeova, demann Li so led. Plizir fwa David ti truve kuma Zeova ti delivre li. Li ti ekrir sa bann parol byin ankurazan la: “Zeova pre avek tu seki sipliy Li, tu seki sipliy Li avek laverite. Li pu realiz dezir bann seki ena lakrint pu Li. Li pu ekute kan zot pu kriye Li pu ed zot, ek Li pu sov zot. Zeova pu protez tu seki kontan Li, me Li pu detrir bann seki move.” (Psom 145:18-20) Sa Psom la montre ki Zeova kapav sov nu kan nu gayn bann problem personel. Li montre usi ki Zeova pu sov so pep antan ki enn grup pandan peryod “gran detres.” (Revelasyon 7:14) Zeova pu res pre ar nu si nu res pre ar Li. Profet Azarya, ki ti gide par “lespri Bondye,” ti dir enn kitsoz ki vre ek ki aplike tuletan: “Zeova Li avek zot tank ki zot montre ki zot avek Li. Si zot rod Li, Li pu les zot truv Li, me si zot kit Li, Li pu kit zot.”—2 Kronik 15:1, 2.

Pu Nu, Zeova Bizin enn Kikenn Ki Reel

13. Kuma eski nu kapav montre ki Zeova Li enn kikenn ki reel pu nu?

¹³ Lapot Pol ti ekrir ki Moiz “ti kontiyn tini ferm, kumadir li ti truv sa Kikenn ki invizib la.” (Ebre 11:27) Byinsir zame Moiz inn truv Zeova. (Egzod 33:20) Me Zeova ti telman reel pu Moiz ki kumadir li ti truv Li. Li ti parey pu Zob usi. Apre bann problem ki li ti gayne, lafwa ki li ti ena ti fer li truv Zeova enn fason pli kler. Li ti truve ki Zeova permet ki so bann fidel serviter gayn bann problem, me selman zame Li pa abandonn zot. (Zob 42:5) Labib dir ki Enok ek Noe ti ‘mars avek Bondye.’ Zot ti fer sa kan zot ti fer Bondye plezir ek kan zot ti obeir Li. (Zenez 5:22-24; 6:9, 22; Ebre 11:5, 7) Si Zeova Li enn kikenn ki reel pu nu, parey kuma Li ti ete pu Enok, Noe, Zob ek Moiz, nu pu “pran Li kont” dan tu seki nu fer, ek lerla, Li pu “fer [nu] semin vinn drwat.”—Proverb 3:5, 6.

14. Ki vedir res “atase” ar Zeova?

¹⁴ Zis avan ki bann Izraelit ti pre pu rant dan peyi ki Bondye ti promet zot, Moiz ti donn zot enn konsey: “Se Zeova to Bondye ki to bizin swiv, ek to bizin ena lakrint pu Li, ek to bizin gard so bann komannman, se so lavwa ki to bizin ekute, ek se Li ki to bizin servi, ek to bizin res atase avek Li.” (Deteronom 13:4) Zot ti bizin swiv Zeova, ena lakrint pu Li, obeir Li, ek res atase ar Li. Konsernan sa mo “atase” la, enn spesyalis dan letid Labib dir ki “an ebre sa mo la vedir ena enn relasyon byin pros ek personel” avek enn kikenn. Enn ekrivin Psom dir: “Se bann dimunn ki ena lakrint pu Zeova ki vinn so bann kamarad.” (Psom 25:14) Nu’si nu kapav ena sa relasyon pros la avek Zeova si vremem Li enn kikenn ki reel pu nu. Si nu byin kontan Li nu pa pu fer nanyin ki pu fer Li sagrin.—Psom 19:9-14.

Eski U Santi ki Zeova Pran U Kont?

15, 16. (a) Kuma eski Psom 34 montre ki Zeova pran nu kont? (b) Ki nu bizin fer si li difisil pu nu rapel bann bon kitsoz ki Zeova inn fer pu nu?

¹⁵ Ena enn lot pyez ki Satan servi zordi. Li anvi nu bliye ki nu Bondye Zeova tuletan pran kont so bann serviter fidel. Kan Lerwa David ti dan enn sityasyon byin danzere, li ti truve kuma lamin Zeova ti protez li. Enn fwa li ti oblize fer sanblan ki li fu devan Akis, Lerwa Gat. Lerla Li ti konpoz enn sante, enn zoli psom kot li ti exprim so lafwa. Li ti dir: “Anu donn Zeova laglwar ek ansam avek mwa, anu donn loner so non. Mo ti priye Zeova, ek Li ti reponn mwa, ek Li ti tir tu mo traka. Anz Zeova pe vey lor bann ki ena lakrint pu Li, ek Li delivre zot. Gute ek gete zot tu, kuma Zeova bon; enn dimunn for ki fer Li konfyans, pu ere. Zeova pre ar bann dimunn ki ena enn gran sagrin dan zot leker ek Li sov bann ki demoralize. Enn dimunn drwat konn buku maler, me Zeova pu delivre li ar tusala.”—Psom 34:3, 4, 7, 8, 18, 19; 1 Samyel 21:10-15.

¹⁶ Eski u sir ki Zeova kapav protez u? Eski u rann u kont ki so bann anz kapav protez u? Eski u’nn deza gute ek truve ki Zeova Li bon? Kan eski dernye fwa u’nn santi ki Zeova ti montre Li bon anver u? Sey mazine. Eski se kan u ti dan predikasyon, kan u ti pe al fer dernye lakaz ek u ti santi u telman fatige ki u pa ti pu kapav kontiyne? Kapav lerla mem ki u ti gayn enn bon konversasyon. Eski u’nn panse pu remersye Zeova parski Li’nn donn u lafors ki u ti bizin? Eski u’nn panse pu remersye Li parski Li’nn beni u? (2 Korintyin 4:7) Parkont, li kapav difisil pu rapel sertin bon kitsoz ki Zeova finn fer pu u. Kitfwa u pu bizin pans seki ti arive enn semenn, uswa enn mwa avan, uswa lane dernyer uswa plis avan ankor. Si se u ka, kifer u pa fer plis zefor pu vinn pli pros ar Zeova ek gete kuma Li gid u? Lapot Pyer ti donn sa konsey la bann Kretyin: “Abes zot . . anba puvwar Bondye. . . Zet tu zot traka lor Li parski Li pran zot kont.” (1 Pyer 5:6, 7) Wi, u mem u pa pu krwar ki kantite Li pran u kont!—Psom 73:28.

Kontiyn Rod Zeova

17. Pu nu kontiyn rod Zeova, ki nu bizin fer?

¹⁷ Nu bizin kontiyn gard bann bon relasyon avek Zeova. Kan Zezi ti priye so Papa, li ti dir: “Lavi pu tuletan vedir aprann konn twa, sel vre Bondye ek Zezi Kris, sa kikenn ki to’nn avoye la.” (Zan 17:3) Nu bizin kontiyn fer zefor pu gayn enn konesans lor Zeova ek lor so Garson. Nu bizin priye ek gayn led lespri sin pu nu kapav konpran bann “kitsoz profon konsernan Bondye.” (1 Korintyin 2:10; Lik 11:13) Nu bizin usi les nu dirize par “esklav fidel ki ena bon zizman.” Sa esklav la nuri nu avek manze spirityel ki li done “dan ler ki bizin.” (Matye 24:45) Par mwayin sa esklav la, Zeova konsey nu pu lir so Parol tulezur. Li konsey nu usi pu asiste reynion regilyerman, ek pu pres labonn nuvel lor rwayom Bondye, avek tu nu leker. (Matye 24:14) Kan nu fer sa, nu pu kontiyn rod Zeova, nu Bondye ki pran nu kont.

18, 19. (a) Ki nu bizin byin deside pu fer? (b) Si nu tini byin ferm kont Dyab ek si nu kontiyn rod Zeova, ki benediksyon nu pu gayne?

¹⁸ Satan pe fer tu seki li kapav pu persekit bann serviter Bondye. Li pe fer nu gayn tu sort kalite lopozisyon ek presyon ki sorti dan tu kote. Li pe sey fer nu perdi nu lape ek detrir bon repitasyon ki nu ena devan Bondye. Li pale ki nu kontiyn rod bann dimunn sinser, ek ki nu ed zot pu sutenir drwa ki Zeova ena pu reyne. Me nu bizin byin deside pu nu res fidel ar Zeova. Nu bizin ena konfyans ki Li pu delivre nu ar Satan. Nu bizin les Parol Bondye gid nu ek res byin aktif dan so lorganizasyon. Lerla, nu kapav sir ki Bondye pu tuzur la pu ed nu.—Izai 41:8-13.

¹⁹ Alor, nu tu, nu bizin res ferm kont Satan ek so bann pyez. Nu bizin tuletan rod Zeova parski Li pu ‘fer nu vinn ferm ek for.’ (1 Pyer 5:8-11) Lerla, nu pu kontiyn ‘gard lamur ki Bondye’ ena pu nu. Nu pu ‘atann ki nu Senyer Zezi Kris manifeste so pitye anver nu ek donn nu lavi pu tuletan.’—Zid 21.

Kuma Eski U Pu Reponn

• Ki sa mo “Dyab” la vedir, ek kuma eski Satan finn montre ki li vremem enn Dyab?

• Ki diferans ena ant fason ki Zeova ek Satan get bann dimunn?

• Kifer eski enn dimunn bizin aksepte sakrifis Zezi kan li apros li avek Zeova?

• Ki vedir res “atase” ar Zeova, ek kuma eski nu kapav kontiyn rod Li?

[Zimaz lor paz 15]

Malgre tu bann difikilte ki Zob ti gayne, li’nn arive konpran ki Zeova ti pran li kont

[Zimaz lor paz 16, 17]

Kan nu lir Labib tulezur, nu asiste reynion regilyerman ek nu byin partisipe dan predikasyon, sa rapel nu ki Zeova pran nu kont