“Ena Lamur ant Zot”

“Par sa zot tu pu kone ki zot mo bann disip, si zot ena lamur ant zot.” —ZAN 13:35.

 1. Lor ki kalite eski Zezi ti atir latansyon zis avan li mor?

“BANN ti zanfan.” (Zan 13:33) Se par sa bann parol la ki Zezi ti koz avek so bann disip dan lasware avan so lamor. Dan bann Levanzil avan sa, Zezi zame pa ti’nn servi sa bann parol ankurazan la pu koz avek so bann disip. Purtan, dan sa lanwit spesyal la, pu montre profon lamur ki li ti ena pu so bann disip, li ti servi sa bann parol la. An realite, dan sa lanwit la Zezi ti koz lor lamur apepre 30 fwa. Kifer eski li ti atir latansyon sa kantite la lor sa kalite la?

 2. Kifer eski li byin inportan ki bann Kretyin montre lamur?

² Zezi ti explike kifer lamur enn kalite byin inportan. Li ti dir: “Par sa zot tu pu kone ki zot mo bann disip, si zot ena lamur ant zot.” (Zan 13:35; 15:12, 17) Kan nu enn disip Zezi, sa ena enn rapor direk avek lamur ki nu montre pu nu bann frer. Se pa par enn linz spesyal uswa par bann kutim bizar, ki nu rekonet bann vre Kretyin. Me nu rekonet zot par lamur sinser ki zot montre ant zot. Dan kumansman premye lartik, nu ti mansyonn trwa kondisyon ki enn disip Zezi bizin ranpli. Kan nu ena enn lamur sinser ant numem, nu pe ranpli dezyem kondisyon parmi sa trwa la. Ki pu ed nu pu kontiyn ranpli sa kondisyon la?

“Fer Sa Ankor Plis”

 3. Ki konsey Pol ti done konsernan lamur?

³ Ti ena enn lamur extraordiner parmi bann disip Kris ki ti viv dan premye syek. Zordi usi parey, nu kapav truv sa lamur la parmi bann vre disip Zezi. Lapot Pol ti ekrir bann Kretyin ki ti viv dan premye syek, li ti dir zot: “Konsernan lamur pu bann frer, li pa neseser ki nu ekrir zot lor sa size la, parski Bondye ti deza anseyn zot pu kontan zot kamarad; ek se sa mem ki zot pe fer anver tu bann frer.” Me kan mem sa, Pol ti azute: “Kontiyn fer sa ankor plis.” (1 Tesalonisyin 3:12; 4:9, 10) Nu’si nu bizin pran sa konsey Pol la byin serye ek fer zefor pu montre nu lamur anver sak Kretyin “ankor plis.”

 4. Dapre seki Pol ek Zezi ti dir, anver kisannla nu bizin montre enn latansyon spesyal?

⁴ Lespri Bondye ti gid Pol kan li ti ekrir bann Tesalonisyin sa let la. Dan sa let la, li ti ankuraz bann krwayan pu “konsol bann ki deprime” ek pu “ed bann ki feb.” (1 Tesalonisyin 5:14) Enn lot fwa, li ti rapel bann Kretyin ki, bann “seki for bizin siport febles bann seki feb.” (Romin 15:1) Zezi usi ti donn bann konsey pu ed bann seki feb. Li ti fer kone ki Pyer ti pu abandonn li dan lanwit ki li ti pu arete. Apre ki li ti dir sa, li ti dir Pyer: “Enn fwa ki to’nn returne, ankuraz to bann frer.” Kifer? Parski zot usi zot ti pu abandonn Zezi, donk zot ti pu bizin led. (Lik 22:32; Zan 21:15-17) Akoz sa, Parol Bondye demann nu pu montre nu lamur usi pu bann seki feb lor plan spirityel. Kapav sa bann dimunn la inn perdi kontak avek kongregasyon Kretyin. (Ebre 12:12) Kifer eski nu bizin ena lamur pu zot? Nu gayn enn repons dan de legzanp ki Zezi ti done.

Enn Muton ek enn Pyes Larzan Ki Finn Perdi

5, 6. (a) Ki de ti legzanp Zezi ti rakonte? (b) Ki sa bann legzanp la montre nu lor Zeova?

⁵ Zezi ti anvi anseyn bann seki ti pe ekut li, seki Zeova panse lor bann dimunn ki’nn abandonn laverite. Pu sa, li ti servi de ti legzanp. Enn parmi sa de legzanp la ti konsern enn berze. Zezi ti dir : “Kisannla parmi zot ki ena san muton, si li’nn perdi enn ladan, pa pu les sa katrovin-diznef la dan dezer pu al rod seki finn perdi la, ziska ki li retruv li? Ek kan li’nn retruv li, li met li lor so zepol ek li byin kontan. Kan li rant lakaz, li invit so bann kamarad ek so bann vwazin, li dir zot, ‘Partaz mo lazwa, parski mo finn retruv mo muton ki ti perdi.’ Mo dir zot, dan mem fason, pu ena plis lazwa dan lesyel pu enn sel peser ki repanti ki pu katrovin-diznef dimunn drwat ki pa bizin repanti.”—Lik 15:4-7.

⁶ Dezyem legzanp la ti konsern enn madam. Zezi ti dir: “Ki madam ki ena dis pyes drakm, si li’nn perdi enn ladan, pa pu alim enn lalanp ek balye so lakaz ek rod li partu ziska ki li retruv li? Ek kan li’nn retruv li, li invit so bann kamarad ek so bann vwazinn ek li dir zot, ‘Partaz mo lazwa, parski mo finn retruv sa pyes drakm ki mo ti perdi la.’ Mo dir zot, dan mem fason, ena lazwa parmi bann anz Bondye kan enn sel peser repanti.”—Lik 15:8-10.

 7. Ki de leson nu aprann dan legzanp enn muton ek enn pyes larzan ki finn perdi?

⁷ Ki nu kapav aprann lor sa de ti legzanp la? Zot montre nu (1) ki santiman nu bizin ena anver bann seki’nn vinn feb ek (2) ki nu bizin fer pu ed zot. Les nu egzaminn sa de pwin la.

Li’nn Perdi me Li Ankor Ena Valer

 8. (a) Kuma eski sa berze la ek sa madam la ti reazir kan zot ti perdi kitsoz? (b) Kan nu get zot reaksyon, ki nu aprann lor fason ki zot ti konsider seki zot ti perdi?

⁸ Dan tulede legzanp, ena enn kitsoz ki ti perdi. Me gete kuma bann propryeter la ti reazir. Berze la pa ti dir: ‘Ki linportans enn muton ena, alor ki mo ankor ena katrovin-diznef ? Mo pa pu bizin sa muton la, mo pu kapav debruye san li.’ Madam la pa ti dir: ‘Kifer mo bizin trakase akoz sa pyes la? Mo satisfe ar sa nef pyes ki reste la.’ Okontrer, berze la ti al rod muton ki ti perdi la, kumadir li ti ena zis sa muton la tusel. Madam la li, kan li ti perdi so pyes larzan, kumadir li pa ti ena lezot pyes ankor. Dan tulede ka, bann kitsoz ki bann propryeter la ti perdi, ti ankor ena valer pu zot. Ki sa montre nu?

 9. Ki nu aprann kan nu get fason ki sa berze la ek sa madam la ti trakase pu seki zot ti perdi?

⁹ Gete ki Zezi ti dir dan tulede ka: “Dan mem fason, pu ena plis lazwa dan lesyel pu enn sel peser ki repanti” ek “mo dir zot, dan mem fason, ena lazwa parmi bann anz Bondye kan enn sel peser repanti.” Donk, fason ki sa berze la ek sa madam la ti trakase pu seki zot ti perdi, montre nu enn tipe, bann santiman ki Zeova ek so bann anz ena. Nu truve ki bann kitsoz ki ti perdi, ti ankor ena valer pu sa berze la ek pu sa madam la. Li parey usi pu bann dimunn ki’nn elwayne ar lorganizasyon Zeova ek ki’nn perdi kontak avek pep Bondye. Zot usi zot ankor ena valer devan lizye Zeova. (Zeremi 31:3) Li posib ki sa bann dimunn la, zot feb lor plan spirityel, me purtan, zot pa bann rebel. Li posib usi ki, mem si zot feb, zot ankor pe swiv inpe bann prinsip Zeova dan zot lavi. (Psom 119:176; Akt 15:29) Donk, parey kuma Zeova inn azir dan lepase, Li pa prese pu “rezet zot devan so figir.”—2 Lerwa 13:23.

10, 11. (a) Ki santiman nu anvi ena pu bann ki finn aret frekant kongregasyon? (b) Dapre de legzanp ki Zezi ti done, kuma eski nu kapav montre ki nu interes nu ar zot?

¹⁰ Parey kuma Zeova ek Zezi, nu’si nu byin trakase pu bann dimunn ki feb lor plan spirityel ek ki’nn aret frekant kongregasyon. (Ezekyel 34:16; Lik 19:10) Pu nu, enn dimunn ki feb lor plan spirityel, li parey kuma enn muton ki’nn perdi. Nu pa konsider li kuma enn ka dezespere, kumadir inn fini pu li ek nepli kapav fer nanyin pu ed li. Nu pena sa rezonnman la: ‘Kifer nu bizin trakase pu enn kikenn ki feb? Kongregasyon pe mars byin san li.’ Okontrer, parey kuma Zeova, nu konsider bann seki finn elwayne ar kongregasyon, me ki anvi returne, kuma bann dimunn ki ena valer.

¹¹ Alor, kuma eski nu kapav montre ki nu interese ar sa bann dimunn la? Dan sa de legzanp ki Zezi ti done la, nu aprann ki nu kapav montre sa (1) kan nu fer kitsoz, (2) kan nu azir avek bonte, ek (3) kan nu fer bann gran zefor. Les nu get sa trwa pwin la enn par enn.

Fer Kitsoz

12. Kan nu lir ki berze la, li’nn “al rod [so muton] ki finn perdi,” ki sa montre nu lor so latitid?

¹² Dan premye legzanp, Zezi dir ki berze la pu “al rod [so muton] ki finn perdi.” Berze la byin deside pu fer kitsoz ek li fer enn gran zefor pu retruv muton la. Li pa per difikilte uswa danze ki li pu gayne, ni mem long distans ki li pu bizin fer. Okontrer, berze la persiste rode “ziska ki li retruv li.”—Lik 15:4.

13. Kuma eski dan lepase, bann serviter fidel ti ed bann seki ti feb, ek kuma eski nu kapav imit sa bann legzanp ki sorti dan Labib la?

¹³ Li parey kan nu ed enn dimunn ki bizin lankurazman. Suvan se sa kikenn ki pli for la ki bizin deside pu fer kitsoz. Bann serviter fidel ki ti viv dan lepase, ti konpran sa. Par egzanp, Yonatann, garson Sail, ti remarke ki so bon kamarad David, ti bizin lankurazman. Li ti “leve ek li ti al zwenn David dan lavil Ores, pu li kapav ankuraz li dan so servis pu Bondye ek fer li regayn lafors pu azir.” (1 Samyel 23:15, 16) Plizir syek apre, Guverner Neemya ti truv sertin parmi so bann frer Zwif ki ti dekuraze. Li usi, “deswit li ti leve” ek li ti ankuraz zot pu ‘rapel Zeova.’ (Neemya 4:14) Nu’si zordi, nu pu anvi ‘leve,’ setadir fer kitsoz pu ankuraz bann seki feb. Me kisannla dan kongregasyon ki bizin fer sa?

14. Kisannla dan kongregasyon ki bizin ed bann seki feb?

¹⁴ Bann ansyin dan kongregasyon ena responsabilite pu “ankuraz bann seki feb . . . ek pu fer zenu ki pe tranble, vinn ferm.” Zot pu “dir bann seki ena traka dan zot leker: ‘Vinn for. Pa bizin zot per.’ ” (Izai 35:3, 4; 1 Pyer 5:1, 2) Pol ti donn konsey pu “ankuraz bann dimunn ki deprime” ek pu “ed bann ki feb.” Me selman, remarke ki li pa ti donn sa konsey la zis bann ansyin, me tu seki ti dan “kongregasyon bann Tesalonisyin.” (1 Tesalonisyin 1:1; 5:14) Donk, tu Kretyin ena responsabilite pu ed bann seki feb. Parey kuma sa berze dan legzanp Zezi la, sak Kretyin bizin santi li puse pu “al rod [sa muton] ki finn perdi la.” Byinsir, nu pu fer sa pli byin, si nu korper avek bann ansyin. Eski u kapav fer kitsoz pu ed enn kikenn ki feb dan u kongregasyon?

Azir Avek Bonte

15. Kifer berze la finn azir kuma li ti fer?

¹⁵ Ki berze la fer kan li retruv finalman so muton? “Li met li lor so zepol.” (Lik 15:5) Se enn detay ki byin tus nu ek ki montre buku kitsoz! Pandan plizir zur ek nwit, muton la ti’nn kapav perdi dan bann landrwa ki li pa ti kone. Li ti mem kapav menase par bann lyon ki ti swiv li. (Zob 38:39, 40) Se sir ki li ti usi feb parski li pa ti ena nanyin pu manze. Donk, li tro frazil pu reysi return dan park muton par li tusel. Avek tu bann difikilte ki li ti pu gayne lor semin retur, li pa ti pu kapav returne par so prop lafors. Alor seki berze la fer, li bese, avek bonte li lev muton la ek sarye li atraver tu bann difikilte ki li ti pu kapav zwenn ek li return li dan trupo. Kuma eski nu’si, nu kapav imit latansyon ki sa berze la finn montre?

16. Kifer eski nu bizin imit bonte ki berze la ti montre anver muton ki ti perdi?

¹⁶ Li posib ki enn dimunn ki’nn perdi kontak avek kongregasyon, li fatige lor plan spirityel. Li parey kuma enn muton ki’nn separe ar so berze. Li usi, li kapav, kumadir inn perdi dan sa lemond la, san kone ki pu fer. Kan enn muton pa dan park, li pena okenn proteksyon. Parey usi pu enn kikenn ki pa dan kongregasyon, li plis expoze ar bann latak Satan. Satan, “pe marse partu kuma enn lyon ki pe groyne, ek li pe rod enn kikenn pu devore.” (1 Pyer 5:8) Anplis, sa dimunn la li feb parski li mank manze spirityel. Donk, san okenn led, li pu tro feb pu li kapav fer fas ar bann difikilte ki li pu gayne kan li desid pu return dan kongregasyon. Alor, kumadir nu bizin bese, lev dimunn ki feb la avek bonte ek sarye li pu reamenn li dan trupo. (Galat 6:2) Kuma eski nu kapav fer sa?

17. Kuma eski nu kapav imit lapot Pol kan nu vizit enn kikenn ki feb?

¹⁷ Lapot Pol ti dir: “Si enn kikenn feb, eski mo pa partaz so febles?” (2 Korintyin 11:29, The New English Bible; 1 Korintyin 9:22) Pol ti konpran sityasyon bann dimunn, bann feb usi ek li ti konn met li dan zot plas. Nu’si nu anvi ena mem santiman pu bann dimunn ki feb. Kan nu vizit enn Kretyin ki feb lor plan spirityel, redonn li lasirans ki li ena valer devan lizye Zeova. Dir li usi ki bann frer ek ser mank li buku dan kongregasyon. (1 Tesalonisyin 2:17) Fer li kone ki zot pre pu ed li ek zot anvi vinn pu li “enn frer dan bann moman difisil.” (Proverb 17:17; Psom 34:18) Nu bann parol sinser pu kapav, tigit-tigit, lev li avek bonte ziska ki li kapav return dan kongregasyon. Ki nu kapav fer apre? Legzanp konsernan sa madam la ek pyes larzan ki li ti perdi, ed nu pu kone ki nu bizin fer.

Fer Bann Gran Zefor

18. (a) Kifer eski madam dan sa legzanp la, pa ti perdi lespwar? (b) Ki bann gran zefor madam la ti fer ek ki rezilta li’nn gayne?

¹⁸ Madam ki’nn perdi so pyes larzan la kone ki li pa pu fasil pu regayn li, me li kone ki li ena enn lespwar. Si larzan la ti’nn tom dan enn gran tuf uswa dan enn lak profon kot ena labu, madam la ti pu sirman panse ki zame li pu regayn so pyes larzan. Me purtan, parski li kone ki pyes la bizin parla dan so lakaz, ek ki li pu posib pu regayn li, li kumans fer bann gran zefor pu rod partu. (Lik 15:8) Dabor, li alim enn lalanp pu ekler so lakaz kot fer nwar. Apre, li balye so sali ek li espere ki li pu tann enn ti son. Finalman, li rod partu, dan tu ti kwin ek dan tu ti fant ki ena, ziska ki lekleraz lalanp la tap lor enn pyes larzan ki pe briye. Madam la inn rekonpanse pu bann gran zefor ki li’nn fer.

19. Kuma eski bann zefor ki sa madam la ti fer pu rod so pyes larzan, sa kapav ed nu kan nu ed bann seki feb?

¹⁹ Sa detay dan sa legzanp la rapel nu ki li pa inposib pu nu, pu swiv lord ki Labib done, setadir pu ed enn Kretyin ki feb. Me, an mem tan, nu realize ki nu ena zefor pu fer. Apre tu, lapot Pol ti dir bann ansyin ki ti res dan lavil Efez: “Se kan zot travay dir kumsa ki zot bizin ed bann feb.” (Akt 20:35a) Rapel byin ki madam la pa’nn gayn so pyes zis kan detanzantan li’nn zet enn ti kudey anler-anler, dan so lakaz. Non, si li’nn reysi, se parski li’nn kontiyn fer zefor pu rod li “ziska ki li retruv li.” Se parey pu nu, kan nu fer zefor pu ed enn kikenn ki feb lor plan spirityel, nu bizin fer li dan enn fason serye ek dan enn lintansyon presi. Ki nu kapav fer?

20. Ki kapav fer pu ed bann seki feb?

²⁰ Kuma eski nu kapav ed enn kikenn ki feb pu devlop lafwa ek rekonesans? Kapav seki li bizin, se fer enn letid Labib personel avek li, dan enn liv ki adapte ar so sityasyon. An realite, kan nu kondir enn letid Labib avek enn kikenn ki feb, sa permet nu pu ed li dan enn fason regilye, ek afon. Sirman sirveyan servis pu pli kone kisannla ki kapav donn sa led la. Li kapav donn enn lide ki bann size kapav etidye ek ki liv ki pu ed plis sa dimunn la. Madam ki dan legzanp la servi bann bon zuti pu rod so pyes larzan. Donk, zordi usi nu ena bann mwayin ki ed nu ranpli responsabilite ki Bondye inn donn nu setadir, ed bann seki feb lor plan spirityel. Parmi sa bann mwayin la, ena de nuvo liv ki pu ed nu buku dan nu zefor. Sa de liv la se Ador Sel Vre Bondye ek Approchez-vous de Jéhovah.a

21. Kuma eski kan nu ed bann seki feb, sa amenn bann benediksyon pu nu tu?

²¹ Kan nu ed bann seki feb, sa amenn bann benediksyon pu nu tu. Kikenn kipe gayn sa led la, li ena lazwa pu retruv linite avek bann vre kamarad. Numem, nu pu ena enn profon lazwa, lazwa ki nu gayne selman kan nu done. (Lik 15:6, 9; Akt 20:35b) Dan kongregasyon ena enn bon latmosfer parski sakenn ena enn lintere ranpli ar lamur pu lezot. Me pli inportan ankor, se ki nu bann bon Berze, Zeova ek Zezi gayn laglwar. Kifer? Parski zot bann serviter realiz zot dezir pu ed bann seki feb. (Psom 72:12-14; Matye 11:28-30; 1 Korintyin 11:1; Efezyin 5:1) Donk, nu ena bann bon rezon pu kontiyn ‘ena lamur ant numem,’ pa vre?

[Not anba paz]

Eski U Kapav Explike?

• Kifer eski li inportan ki sakenn parmi nu montre nu lamur?

• Kifer eski nu bizin montre nu lamur usi anver bann seki feb?

• Ki nu aprann dan legzanp ki koz lor enn muton ek enn pyes larzan ki finn perdi?

• Ki bann kitsoz pratik nu kapav fer pu ed enn kikenn ki feb?

[Zimaz lor paz 24]

Pu ed bann seki feb, nu fer kitsoz , nu azir avek bonte ek nu fer bann gran zefor

[Zimaz lor paz 25]

Kan nu ed bann seki feb, sa amenn bann benediksyon pu nu tu