‘Pran Kuraz ek Res For!’

“Pran kuraz! Mo finn gayn viktwar lor lemond.”—ZAN 16:33.

 1. Akoz bann lennmi byin for ki ti res dan Kanaan, ki lankurazman bann Izraelit ti gayne?

BANN Izraelit ti pre pu travers Larivyer Zurdin pu rant dan peyi ki Bondye ti promet zot. Zis letan zot pe al fer sa, Moiz finn dir zot: “Pran kuraz ek res for. Pa gayn per ek pa tranble devan zot. Parski se Zeova to Bondye ki pe mars avek twa.” Apre sa Moiz ti apel Zozye, ek personelman li finn donn li konsey pu pran kuraz. Nu rapel ki Bondye ti swazir Zozye pu amenn bann Izraelit dan Kanaan. (Deteronom 31:6, 7) Plitar Zeova Limem finn ankuraz Zozye. Li finn dir li: “Pran kuraz ek res for . . . Zis pran kuraz ek res byin for.” (Zozye 1:6, 7, 9) Sa bann parol la ti tom byin. Bann Izraelit ti bizin kuraz parski zot ti pu bizin fer fas ar bann lennmi byin-byin for ki ti res lot kote Zurdin.

 2. Dan ki sityasyon nu ete zordi, ek ki nu bizin?

² Azordi, bann vre Kretyin pre pu rant dan nuvo lemond ki Bondye finn promet zot. Ek parey kuma Zozye, zot bizin pran kuraz. (2 Pyer 3:13; Revelasyon 7:14) Me, nu sityasyon pa parey kuma Zozye. Zozye ti lager ar lepe ek pik. Me nu, zame nu pa pu pran bann zarm pu nu lager, parski nu pe amenn enn lager spirityel. (Izai 2:2-4; Efezyin 6:11-17) Anplis, Zozye ti fer buku gran-gran lager apre ki li ti rant dan Kanaan. Me nu, se asterla, avan ki nu rant dan nuvo lemond, ki nu pe bizin amenn bann gran lager. Anu get sertin sityasyon kot nu bizin kuraz.

Kifer Eski Nu Bizin Lite?

 3. Ki Labib dir konsernan nu prinsipal lennmi?

³ Lapot Zan ti ekrir: “Nu kone ki se Bondye ki’nn kre nu, me lemond antye li dan puvwar sa kikenn ki move la.” (1 Zan 5:19) Sa bann parol la montre nu enn rezon prinsipal kifer bann Kretyin bizin lite pu zot res fidel. Kan enn Kretyin res fidel, dan enn sertin fason, sa li enn defet pu Satan. Akoz sa, Satan azir parey kuma “enn lyon ki pe groyne.” Li esey fer bann Kretyin fidel per, ek li esey devor zot. (1 Pyer 5:8) Wi, li fer lager ar bann manb 144,000 ek zot bann konpaynon. (Revelasyon 12:17) Dan sa lager la, li servi bann dimunn, ki zot konsyan uswa non, pu fer seki li anvi. Donk, nu bizin kuraz pu nu kapav tini ferm kont Satan ek so bann azan.

 4. Ki lavertisman Zezi ti done, me ki kalite bann vre Kretyin manifeste?

⁴ Zezi ti kone ki Satan ek so bann azan pu fer buku lopozisyon kont predikasyon bon nuvel. Akoz sa, li ti donn so bann disip sa lavertisman la: “Bann dimunn pu fer zot pas par buku persekisyon ek pu tuy zot, ek tu bann nasyon pu ayir zot akoz mo non.” (Matye 24:9) Sa bann parol la ti realize dan lepok bann premye Kretyin, ek li pe realize zordi usi. Wi, dan nu lepok, sertin Temwin Zeova finn siport bann persekisyon osi dir ki ninport ki persekisyon dan listwar. Me malgre sa, bann vre Kretyin finn gard kuraz devan sa bann presyon la. Zot kone ki ‘tranble devan bann zom, sa li enn pyez,’ ek zot pa ule rant dan sa pyez la.—Proverb 29:25.

5, 6. (a) Sit bann sityasyon kot nu bizin kuraz. (b) Kuma eski bann Kretyin ki fidel reazir kan zot pas par bann leprev?

⁵ Apart persekisyon, ena bann lezot sityasyon difisil kot nu bizin kuraz. Pu sertin proklamater, koz ar bann dimunn ki zot pa kone lor bon nuvel, sa li enn kitsoz ki byin difisil. Bann zanfan ki al lekol, zot usi zot konn bann sityasyon difisil ki teste zot kuraz. Par egzanp, sertin finn bizin kuraz kan zot finn gayn lord pu resit enn serman pu montre zot fidelite anver zot peyi uswa pu salye pavyon nasyonal. Me pwiski sa ena enn rapor avek larelizyon, sa bann zanfan la finn azir avek kuraz ek zot finn fer Bondye plezir. Zot bon kondwit finn amenn enn gran lazwa.

⁶ Nu bizin kuraz kan nu bann lennmi servi radyo, televizyon ek lagazet pu fann bann fos linformasyon lor bann serviter Bondye. Uswa zot fer bann lalwa pu sey anpes nu pu pratik vre relizyon. (Psom 94:20) Par egzanp, kuma eski nu bizin reazir kan lagazet, radyo, uswa televizyon deform bann linformasyon uswa dir bann mansonz lor bann Temwin Zeova? Eski nu bizin gayn sok kan nu tann sa bann kitsoz la? Non. Nu kone ki sa bann kitsoz la bizin arive. (Psom 109:2) Ek nu pa soke ki sertin dimunn krwar dan sa bann mansonz ek sa bann linformasyon ki finn deforme la. Kifer? Se parski Labib dir nu ki “enn kikenn ki pena lexperyans, li pu krwar tu seki dimunn dir li.” (Proverb 14:15) Me, bann Kretyin ki fidel refiz krwar tu seki bann dimunn dir lor zot bann frer. Ek zot pa les bann fos linformasyon fer zot mank bann reynion, diminye zot partisipasyon dan predikasyon, uswa fer zot lafwa vinn feb. Okontrer, zot ‘sey prezant zotmem kuma bann minis Bondye . . . atraver laglwar ek dezoner, atraver bon rapor ek move rapor; kuma bann ki anbet lezot [dapre zot bann lennmi], me ki purtan dir laverite.’—2 Korintyin 6:4, 8.

 7. Ki bann kestyon profon nu kapav poz numem?

⁷ Kan Pol ti ekrir Timote, li ti dir li: “Bondye pa finn donn nu enn lespri lakrint, me Li finn donn nu lafors . . . Donk pa gayn onte pu koz lor nu Senyer.” (2 Timote 1:7, 8; Mark 8:38) Apre ki nu’nn lir sa bann parol la, nu kapav demann numem: ‘Eski mo gayn onte akoz mo bann krwayans relizye, uswa eski mo ena kuraz? Dan mo travay (uswa dan lekol), eski mo fer lezot kone ki mo enn Temwin Zeova, uswa mo sey kasyet sa? Eski mo onte parski mo diferan avek lezot, uswa eski mo fyer pu montre mwa diferan akoz mo relasyon avek Zeova?’ Si enn kikenn per pu pres bon nuvel, uswa li per parski li ena bann krwayans ki diferan ar lezot, ki li kapav fer? Li bizin rapel konsey ki Zeova ti donn Zozye: “Pran kuraz ek res for.” Fode zame nu bliye ki se pa seki nu bann koleg travay uswa seki nu bann kamarad lekol panse, ki pli inportan. Me seki pli inportan, se seki Zeova ek Zezi Kris, zot, zot panse lor nu.—Galat 1:10.

Kuma Nu Kapav Gayn Kuraz

8, 9. (a) Kuma eski kuraz bann premye Kretyin ti teste, dan enn lokazyon? (b) Kuma eski Pyer ek Zan ti reazir kan bann sef Zwif ti menas zot, ek ki lexperyans zotmem ek zot bann frer finn fer?

⁸ Me, kuma eski nu kapav gayn sa kuraz ki kapav ed nu pu nu res fidel dan lepok difisil kot nu pe viv la? Kuma eski bann premye Kretyin ti gayn kuraz? Anu get seki ti arive kan bann sef pret ek bann ansyin dan Zerizalem ti dir Pyer ek Zan aret servi non Zezi kan zot prese. Bann disip pa ti aksepte. Lerla, bann sef pret ek bann ansyin finn menas zot, ek apre finn les zot ale. Tutswit apre sa, bann zapot finn al zwenn zot bann frer, ek zot tu finn priye ansam. Zot finn dir: “Zeova, pran kont zot bann menas, ek permet ki to bann esklav kontiyn koz to parol avek kuraz.” (Akt 4:13-29) Zeova finn reponn zot, ek Li finn donn zot lafors grasa so lespri sin. Zot finn “ranpli Zerizalem” avek zot lanseynman. Dayer, se seki bann sef Zwif finn konfirme plitar.—Akt 5:28.

⁹ Anu egzaminn inpe seki finn pase dan sa lokazyon la. Kan bann sef Zwif ti menas bann disip, zot pa ti aret prese akoz sa. Okontrer, zot ti priye pu gayn kuraz pu zot kontiyn prese. Apre sa, zot ti azir an akor avek zot lapriyer. Ek Zeova finn sutenir zot par so lespri sin. Ki sa lexperyans la montre nu? Sa montre nu ki seki Pol ti ekrir dan Filipyin 4:13 plizir lane apre, dan enn diferan sityasyon, li aplik pu bann Kretyin kan zot gayn persekisyon. Li ti dir: “Pu tu kitsoz mo ena kuraz grasa sa Kikenn ki donn mwa lafors la.”

10. Kuma eski legzanp Zeremi kapav ed bann ki timid?

¹⁰ Me, sipoze ki enn kikenn li timid, eski malgre sa li kapav servi Zeova avek kuraz mem kan li gayn persekisyon? Wi, byinsir! Rapel kuma Zeremi ti reazir kan Zeova ti swazir li pu vinn enn profet. Sa zenn garson la ti dir Zeova: “Mo ankor zenn.” Sa repons la fer nu konpran ki li pa ti santi li kalifye. Purtan, Zeova ti ankuraz li. Li ti dir li: “Pa dir ki ‘Mo ankor zenn.’ Me to bizin al ver tu bann dimunn kot mo pu avoy twa ek to bizin dir zot tu seki mo pu donn twa lord pu dir. Pa gayn per, parski ‘mo avek twa pu sap twa.’ ” (Zeremi 1:6-10) Zeremi ti ena konfyans an Zeova. Rezilta: Grasa lafors Zeova, li finn kapav vink so laper pu prese. Ek, dan Izrael, li finn vinn enn temwin ki ena buku kuraz.

11. Ki kitsoz ki ed bann Kretyin dan nu lepok pu ena kuraz parey kuma Zeremi?

¹¹ Dan nu lepok, bann manb 144,000 lor later finn gayn mem misyon ki Zeremi. Grasa sutyin bann manb “gran laful,” zot kontiyn anons seki Zeova ena lintansyon pu fer. Zot fer sa, mem si bann dimunn pa montre okenn lintere, sikann zot uswa persekit zot. (Revelasyon 7:9; Zan 10:16) Zot gayn kuraz grasa bann parol ki Zeova ti dir Zeremi: “Pa gayn per.” Zame zot bliye ki se Bondye ki finn donn zot sa misyon la, ek ki se so mesaz ki zot pe prese.—2 Korintyin 2:17.

Bann Legzanp Kuraz Ki Nu Bizin Imite

12. Ki bon legzanp kuraz Zezi finn lese, ek kuma eski li ti ankuraz so bann disip?

¹² Ki kitsoz ki kapav ed nu pu gayn ankor plis kuraz? Se kan nu medit lor legzanp bann serviter ki finn azir avek kuraz, parey kuma Zeremi. (Psom 77:12) Par egzanp, kan nu egzaminn minister Zezi, nu admir kuraz ki li ti ena kan Satan ti tant li. Nu inpresyone par kuraz ki li ti ena kan li ti fer fas ar lopozisyon bann sef Zwif. (Lik 4:1-13; 20:19-47) Grasa lafors Zeova, Zezi ti telman for, ki nanyin pa ti kapav fer li tonbe. Ek enn tipe avan li mor, li ti dir so bann disip: “Dan lemond, zot pu gayn sufrans, me pran kuraz! Mo finn gayn viktwar lor lemond.” (Zan 16:33; 17:16) Si bann disip Zezi ti swiv so legzanp, zot usi zot ti pu bann vinker. (1 Zan 2:6; Revelasyon 2:7, 11, 17, 26) Me zot ti pu bizin “pran kuraz.”

13. Ki lankurazman Pol ti donn bann Filipyin?

¹³ Detrwa lane apre lamor Zezi, Pol ek Silas ti anprizone dan lavil Filip. Plitar, Pol ti ankuraz sa kongregasyon la pu kontiyn ‘tini ferm dan mem lespri, ek ki zot lite ansam kuma enn sel pu lafwa dan bon nuvel, ek ki zot bizin pa per zot bann lennmi.’ Pu donn zot kuraz pu fer sa, Pol ti dir zot: “Sa [bann persekisyon] montre bannla [bann lennmi] ki zot pe al ver destriksyon, tandiki pu zot se enn siyn Bondye, ki Li pu delivre zot. Parski se zot ki finn gayn sa privilez la pu Kris, pa zis pu ki zot ena lafwa ar li, me usi pu sufer pu li.”—Filipyin 1:27-29.

14. Ki lefe, kuraz ki Pol finn manifeste, finn ena lor so bann frer dan Rom?

¹⁴ Kan Pol ti ekrir kongregasyon Filip, ankor enn fwa li ti dan prizon, me sa fwa la li ti dan Rom. Me mem si li ti dan prizon, li ti kontiyn pres avek kuraz. Ki rezilta li finn gayne? Li finn ekrir: “Tu bann gard Pretoryenn ek tu lezot ankor, ti kone ki mo dan prizon pu Kris, ek kan zot finn truv mwa dan prizon, laplipar bann frer finn gayn konfyans an Senyer, ek deplizanpli zot pe gayn kuraz pu anons parol Bondye san ki zot per.”—Filipyin 1:13, 14.

15. Kot sa nu truv bann bon legzanp bann dimunn ki ti ena lafwa, ki kapav fer nu vinn pli for ek donn nu plis kuraz pu servi Zeova?

¹⁵ Legzanp Pol ankuraz nu. Nu ena usi bon legzanp bann Kretyin dan nu lepok, ki finn siport bann persekisyon dan bann peyi ki dirize par enn diktater uswa par bann sef relizye. Sa bann legzanp la ankuraz nu. Dan nu bann magazinn Latur Degard ek Réveillez-vous ! ek dan L’Annuaire des Témoins de Jéhovah, nu kapav lir lavi sa bann dimunn la. Amezir nu lir sa, rapel ki sa bann dimunn la se bann dimunn ordiner, parey kuma nu. Me kan zot finn pas dan bann sityasyon difisil, Zeova finn donn zot lafors ki depas lafors normal. Ek se kumsa ki zot finn kapav siporte. Nu kapav sir ki Li pu fer parey pu nu’si, si nu dan bann sityasyon kot nu bizin so led.

Nu Kuraz Fer Zeova Plezir ek Donn Li Laglwar

16, 17. Kuma eski nu kapav vinn enn kikenn ki ena kuraz?

¹⁶ Kan enn Kretyin tini ferm pu laverite ek pu lazistis, li montre ki li ena kuraz. Kan enn Kretyin tini ferm mem si li gayn per, sa montre ankor plis ki li ena kuraz. Wi, ninport ki Kretyin, mem ki kalite personalite li ena, mem si li ena enn karakter ki for, uswa non, kapav montre ki li ena kuraz. Me ki pu pus li pu fer sa? Li pu reysi, si vremem li anvi fer volonte Zeova ek li byin deside pu res fidel. Fode usi ki li tuletan kont lor Bondye ek tuletan rapel seki Zeova finn fer dan lepase pu sutenir enn kantite serviter parey kuma li. Anplis, nu pu pli motive ankor pu pa bes lebra, kan nu realize ki nu kuraz dan bann sityasyon difisil fer Zeova plezir ek fer Li gayn laglwar. Parski nu kontan Zeova avek tu nu leker, nu byin deside pu siport bann kritik uswa bann kitsoz ki pli pir.—1 Zan 2:5; 4:18.

¹⁷ Fode zame nu bliye ki, si nu sufer akoz nu lafwa, se pa parski nu’nn fer enn kitsoz ki move. (1 Pyer 3:17) Nu konn bann sufrans parski nu pe sutenir reyn Zeova. Nu sufer usi parski nu fer seki bon ek parski nu pa fer parti dan lemond. Get seki lapot Pyer finn ekrir lor la. Li ti dir: “Si, kan u fer seki bon ek u sufer, u siport sa, sa li enn kitsoz ki byin bon devan lizye Bondye.” Li ti dir usi: “Bann ki sufer akoz volonte Bondye, bizin kontiyne met zot lavi dan lamin enn Kreater ki fidel, alor ki zot kontiyn fer seki bon.” (1 Pyer 2:20; 4:19) Wi, kan nu ena lafwa, sa fer Zeova plezir ek sa fer Li gayn laglwar. Se enn bon rezon pu nu pran kuraz, pa vre?

Kan Nu Koz Avek Bann Dimunn Ki Ena Lotorite dan Guvernman

18, 19. Kan nu tini ferm avek kuraz devan enn ziz, an realite ki mesaz nu pe transmet li?

¹⁸ Kan Zezi ti dir so bann disip ki zot pu gayn persekisyon, li ti dir usi: “[Bann zom] pu aret zot ek pu amenn zot devan lakur, ek zot pu gayn kut fwet dan bann sinagog. Wi, akoz mwa, bann dimunn pu amenn zot devan bann guverner ek bann lerwa, sa pu enn temwaynaz pu sa bann dimunn la ek pu bann nasyon.” (Matye 10:17, 18) Nu pu bizin kuraz si zame nu bizin pas devan enn ziz uswa enn dirizan, akoz bann fos akizasyon ki lezot finn mete lor nu. Me, nu kapav servi sa bann sityasyon difisil la pu fer enn kitsoz ki byin inportan. Ki kitsoz? Se pu rann temwanyaz sa bann dimunn la. Kan nu fer sa, se kumadir nu pe transmet sa bann dimunn ki pe ziz nu la, bann parol Zeova ki truv dan 2em Psom: “Asterla, zot bann lerwa, servi zot lintelizans, ek aksepte koreksyon, zot bann ziz lor later. Servi Zeova avek lakrint.” (Psom 2:10, 11) Suvan, kan bann Temwin Zeova finn pas devan lakur akoz bann fos akizasyon, bann ziz finn sutenir lide ki tu dimunn bizin ena liberte pu pratik relizyon ki zot anvi. Ek nu byin apresye seki zot finn fer. Me, sertin ziz finn les zot inflyanse par bann lennmi. Pu sa bann ziz la, Labib dir: “Aksepte koreksyon.”

¹⁹ Bann ziz bizin realize ki Lalwa Bondye Zeova sa mem lalwa pli siperyer ki ena. Zot bizin rapel ki tu dimunn, parmi ena usi bann ziz, bizin rann kont devan Bondye Zeova ek Zezi Kris. (Romin 14:10) Mem si enn ziz rann enn zizman dan nu faver uswa non, nu, nu ena tu rezon pu pran kuraz. Kifer? Se parski Zeova sutenir nu. Labib dir: ‘Ere tu bann ki rod proteksyon ar Zeova.’—Psom 2:12.

20. Kifer eski nu kapav ere si nu’nn fer fas ar persekisyon ek bann fos linformasyon?

²⁰ Dan so Diskur lor Montayn, Zezi ti dir: “Santi zot ere kan dimunn kritik zot, persekit zot ek kan bannla koz manti lor zot ek dir tu sort kalite move kitsoz lor zot, akoz mwa. Rezwir zot ek santi zot ere, parski zot ena enn gran rekonpans dan lesyel, parski kumsa mem bannla ti persekit bann profet ki ti viv avan zot.” (Matye 5:11, 12) Byinsir, persekisyon se pa enn kitsoz ki agreab. Me kan nu tini ferm malgre bann persekisyon, kuma bann fos linformasyon ki televizyon, radyo ek bann lagazet fane, sa li enn bon rezon pu nu rezwir. Kifer? Parski kan nu fer sa, nu montre ki nu pe fer Zeova plezir, ek nu pu gayn enn rekonpans. Kan nu tini ferm avek kuraz, nu montre ki nu ena enn vre lafwa, ek sa donn nu lasirans ki nu ena faver Bondye. Wi, nu montre ki nu ena enn konfyans total an Zeova. Sa kalite konfyans la li byin inportan pu enn Kretyin. Se seki prosin lartik pu montre nu.

Ki U Finn Aprann?

• Sit bann sityasyon kot nu bizin montre kuraz zordi.

• Kuma eski nu kapav gayn kuraz?

• Sit sertin bon legzanp kuraz.

• Kifer eski nu bizin ena enn dezir pu azir avek kuraz?

[Zimaz lor paz 22]

Simone Arnold (asterla Liebster) dan l’Allemagne, Widdas Madona dan Malawi, ek Lydia ek Olesksii Kurdas dan l’Ukraine, finn ena kuraz ek zot finn reziste kont sa kikenn ki move la

[Zimaz lor paz 23]

Nu pa onte akoz bon nuvel

[Zimaz lor paz 24]

Kuraz ki Pol ti ena dan prizon finn fer buku dimunn konn bon nuvel

[Zimaz lor paz 25]

Si, avek kuraz, nu explik nu pozisyon ar enn ziz, nu pe donn li enn mesaz byin inportan