Bondié Vrémem Intéressé ar Ou

DANS bann situation désespéré, li tout a fait normal ki nou supplie Bondié pou gagne so l’aide. Après tout, Li ‘grand, Li bien puissant, ek so l’intelligence pena limite.’ (Psaume 147:5) Li tousel kapav aide nou pou résoudre nou bann problèmes. En plus, la Bible invite nou pou ‘ouvert nou léker’ ar Li. (Psaume 62:8) Mais, kifer eski beaucoup dimoune éna l’impression ki Bondié pa reponn zot la-prière? Eski sa veut dire ki Li pa intéressé ar nou?

Au lieu ki vite-vite ou accuse Bondié ki Li pa pé agir, rapelle l’époque kot ou ti encore zenfant. Kan ou bann parents pa ti donne ou tou séki ou ti demandé, eski ou ti accuse zot ki zot pa content ou? Beaucoup zenfants faire sa. Mais kan ou’nn grandi, ou’nn realisé ki bann parents montré zot l’amour dans différent façons. Ou’nn comprend aussi ki c’est pa enn preuve d’amour si bann parents donne zot zenfant tou séki zot envie.

Pareillement, mem si Jéhovah pa touletan exauce nou la prière, sa pa veut dire ki Li pa prend nou compte. En réalité, Bondié montré ki Li intéresse ar nou tou dans beaucoup façons.

“Par Li Nou Éna la Vie”

D’abord, c’est grâce à Bondié ki “nou éna la vie, nou bougé ek nou existé.” (Actes 17:28) Oui, la vie ki Bondié finn donne nou c’est enn preuve ki Li intéressé ar nou!

En plus, Jéhovah donne nou tou séki nou bizin pou nou reste en vie. La Bible dire nou: “Li pé faire l’herbe vert germé pou bann zanimaux, ek bann plantes pou service bann dimoune, pou faire mangé sorti dans la terre.” (Psaume 104:14) À vrai dire, nou Créateur donne nou plus ki séki nou vrémem bizin pou vive. Avec génerosité, Li donne ‘la pluie ek bann bon saisons pou donne nou mangé en abondance ek Li rempli nou léker ar la joie.’—Actes 14:17.

Mais, éna certain ki demann zot: ‘Mais, si Bondié content bann dimoune sa quantité-la, kifer Li permette nou souffert?’ Eski ou konn réponse sa question-la?

Eski Bondié Responsable?

Zordi, souvent c’est bann dimoune mem ki responsable zot propre souffrance. Par exemple, nou konn bien bann danger ki éna kan nou faire bann kitsoz ki kapav faire nou di tort. Malgré sa, bann dimoune commette l’immoralité sexuel; zot abuse l’alcool ek la drogue; zot fumé; zot participe dans bann sport bien-bien dangereux; zot roule trop vite, ek zot faire lézot kitsoz encore. Si zot conduite dangereux faire zot souffert, kisannla ki responsable? Bondié ou-soit sa kikenn ki pé agir sans réfléchi-la? Parole Bondié dire: “Pa faire sa erreur-la: Pa kapav moque Bondié. Séki enn zom semé, c’est sa-mem ki li pou récolté.”—Galates 6:7.

En plus, bien souvent bann dimoune faire di mal zot camarade. Kan enn nation déclare la guerre, Bondié pa responsable pou tou bann souffrance ki sa causé. Kan enn criminel attaque enn dimoune, eski c’est Bondié ki responsable blessure ou-soit la mort sa dimoune-la? Non bien-sûr! Kan enn dictateur faire dominer, li torture ek faire assassine bann dimoune ki li dirigé, eski nou kapav blame Bondié? Li pa logique ki nou accuse Bondié.—Ecclésiaste 8:9.

Mais, ki nou kapav dire concernant bann millions dimoune ki vive dans la misère ek ki pé mort de faim? Eski c’est Bondié ki responsable? Non. La terre donne la nourriture plus ki bizin pou nourri tou dimoune. (Psaume 10:2, 3; 145:16) Zordi éna la famine ek la misère partout lor la terre, parski bann dimoune pa finn konn distribué dans enn façon égale la nourriture ki Bondié donné en abondance. Ek l’égoïsme bann dimoune empêche zot résoudre sa problème-la.

Raison Principal

Mais, kisannla ki responsable kan enn dimoune tombe malade ou-soit kan li mort à cause la vieillesse? Eski ou pou étoné pou aprann ki Bondié pa responsable pou sa bann kitsoz la aussi? Bondié pa ti crée bann dimoune pou vinn vieux ek pou mort.

Kan Bondié ti met premier couple humain, Adam ek Ève dans jardin d’Eden, Li ti donne zot possibilité pou vive pou touletan dans enn paradis lor la terre. Mais, Li ti bien envie ki la terre rempli avec bann dimoune ki pou apprécié séki zot finn gagné. Donc, zot la vie futur ti basé lor enn condition. Adam ek Ève ti pou vive dans sa Paradis-la, à condition ki zot soumette zot ar zot Créateur ki content zot.—Genèse 2:17; 3:2, 3, 17-23.

Mais malheureusement, Adam ek Ève inn rebellé. Ève finn choisir pou écoute Satan le Diable, ki ti koz menti ar li. En gros, Satan ti dire li ki Bondié ti pé prive li enn kitsoz ki bon. Donc, Ève inn commence manifesté enn l’esprit d’indépendance ek li’nn rod ‘vinn pareil couma Bondié, ek konn séki bon ek séki mové.’ Adam aussi finn rebellé pareil couma li.—Genèse 3:5, 6.

Par zot rébellion, Adam ek Eve finn montré ki zot pa digne pou vive pou touletan. Zot finn konn bann conséquences amère à cause zot péché. Doucement-doucement, zot finn perdi zot la force ek zot vigueur, ek à la fin zot finn trouve la mort. (Genèse 5:5) Mais, zot rébellion finn amène bann conséquences encore plus grave. Zordi, nou encore pé souffert à cause péché Adam ek Ève. L’apotre Paul ti écrire: “Par enn seul zom, péché finn rentre dans le monde ek péché finn amène la mort, ek depuis sa tou dimoune konn la mort parski zot tou faire péché.” (Romains 5:12) Oui, à cause rébellion Adam ek Ève, péché ek la mort finn fané couma la gangrène parmi la race humaine en entier.

Plus Grand Preuve Ki Bondié Intéressé ar Nou

Mais, eski sa veut dire ki création Bondié, c’est-à-dire bann humains ti’nn fini condamné complètement? Non, ek c’est séki amène nou ar plus grand preuve ki Bondié intéresse ar nou. Mem si sa finn coûte Li beaucoup, Bondié finn prend bann disposition pou sauve l’humanité ar péché ek la mort. Prix ki Li’nn payé c’est la vie parfait Jésus, ki Li’nn donné volontairemement pou nou. (Romains 3:24) À cause sa-mem l’apotre Jean ti écrire: “Bondié finn tellement content le monde ki Li finn donne so seul Garçon ki Li finn crée directement, pou ki tou séki éna la foi en li pa pou détruire, mais pou gagne la vie pou touletan.” (Jean 3:16) Grâce à sa acte d’amour-la, nou kapav régagne l’espoir pou vive pou touletan. Paul ti écrire bann Romains: “Par enn seul acte de justification tou bann dimoune inn déclaré juste pou gagne la vie.”—Romains 5:18.

Nou kapav sûr ki kan pou arrive l’heure ki Bondié finn fixé, pa pou éna ni souffrance ni la mort lor la Terre en entier. Au contraire, bann conditions ki ti prophétisé dans livre Révélation pou dominé lor la terre : “Guetté! La tente Bondié avec bann dimoune, ek Li pou reste avec zot, ek zot pou vinn so peuple. Ek Bondié Li-mem pou avec zot. Lerla, Li pou essuie tou larmes dans zot lizié, ek la mort népli pou existé. Népli pou ena deuil, ploré, ek douleur. Bann kitsoz avant finn disparaite.” (Révélation 21:3, 4) Kitfois ou kapav demann ou ‘Mais, mo pa pou vive sa quantité le temps-la pou trouve sa.’ Mais, li tout à fait possible ki ou pou trouve sa réalisé. Ek mem si ou mort, Bondié kapav ressuscite ou. (Jean 5:28, 29) C’est séki Bondié ena l’intention pou faire pou nou, ek c’est sa-mem ki pou arrivé. Li enn grand erreur pou dire ki Bondié pa intéresse ar l’humanité!

“Vinn Proche ar Bondié”

Nou gagne enn grand réconfort kan nou aprann ki Bondié finn trouve enn solution durable ek permanent pou souffrance bann dimoune. Mais ki nou kapav dire pou asterla? Ki nou kapav faire si nou perdi enn kikenn ki nou content ou-soit si nou zenfant tombe malade? Pankor arrive l’heure pou Bondié enlève la maladie ek la mort. La Bible dire nou ki nou pou bizin atann encore inpe avant ki sa realisé. Mais Bondié pa finn laisse nou sans l’aide. Disciple Jacques dire: “Vinn proche ar Bondié, ek Li pou vinn proche ar zot.” (Jacques 4:8) Oui, nou Créateur invit nou pou éna enn relation bien proche avec Li. Ek bann ki éna sa qualité relation-la ar Li, pou touletan gagne so soutien mem dans bann situations bien difficile.

Couma eski nou vinn proche avec Bondié? Trois mille ans de cela, le roi David, ti pose mem question. Li ti dire: “Ah Jéhovah, . . . kisannla ki pou reste dans to montagne saint?” (Psaume 15:1) David ti reponn so propre question kan li ti dire: “Séki pé marche droite ek ki pe pratique la justice, ek ki dire la vérité dans so léker. Li pa’nn koz menti avec so la bouche. Li pa’nn faire du tort so camarade.” (Psaume 15:2, 3) Sa veut dire ki Jéhovah accepté bann dimoune ki obeir Li en contraste avec Adam ek Ève ki’nn désobéir Li. Li vinn proche ar bann dimoune ki faire so volonté.—Deutéronome 6:24, 25; 1 Jean 5:3.

Couma eski nou kapav faire volonté Bondié? Nou bizin aprann séki “bon ek agréable devant lizié nou Sauveur, Bondié.” Nou bizin aussi choisir pou agir en accord avec séki nou aprann. (1 Timothée 2:3) Sa veut dire gagne la connaissance exacte ki sorti dans Parole Bondié, la Bible. (Jean 17:3; 2 Timothée 3:16, 17) Sa implique plus ki zis enn simple lecture de la Bible. Nou bizin imite bann Juifs dans premier siècle en Bérée, ki ti tann l’enseignement Paul. Guette séki la Bible dire nou lor zot: “Zot ti accepté Parole Bondié vite, avec enn grand contentement. Zot ti examine bann l’Écritures en profondeur toulé jours pou guetté si sa bann kitsoz-la ti vrémem coumsa.”—Actes 17:11.

Zordi aussi pareil, enn l’étude profond lor la Bible pou fortifié nou la-foi en Bondié ek pou aide nou pou développe enn relation bien proche avec Li. (Hébreux 11:6) Sa pou aide nou aussi pou comprend bien couma Jéhovah agir avec bann dimoune, pa seulement pou zot gagne bann bienfait asterla, mais surtout pou ki bann dimoune sincère gagne bann bienfait durable dans l’avenir.

Anou guetté ki certain Chrétiens ki ena enn relation bien proche avec Bondié, finn dire. Danielle ki ena 16 ans dire: “Mo ena enn grand l’amour pou Jéhovah, ek mo éna beaucoup raison pou mo remercié Li. Li’nn donne moi bann bon parents ki ena enn véritable l’amour pou Li ek ki finn enseigne moi en accord avec la Bible.” Enn Chrétien 25 ans ki reste en Uruguay écrire: “Mo léker rempli ar reconnaissance; ek mo senti moi poussé pou remercié Jéhovah pou so faveur immérité ek pou so l’amitié.” Bondié intéresse Li mem avec bann ki bien jeunes. Gabriela, enn tifi 7 ans dire: “Mo content Bondié plus ki tou séki existé lor la terre. Mo éna mo propre la Bible. Mo content aprann lor Bondié ek lor so Garçon.”

Zordi, bann dimoune par millions, bien d’accord ar séki enn écrivain Psaumes finn écrire: “Vinn près ar Bondié, sa li bon pou moi.” (Psaume 73:28) Sa bann dimoune-la finn gagne l’aide pou résoudre bann problèmes ki zot pé gagné asterla, ek zot éna enn l’espoir sûr pou vive pou touletan dans Paradis lor la terre. (1 Timothée 4:8) Kifer eski ou pa fixé l’objectif pou “vinn proche ar Bondié”? D’ailleurs nou éna sa l’assurance-la: “Li pa loin ar sakenn parmi nou.” (Actes 17:27) Oui, Bondié vrémem intéresse ar ou!

[Zimage lor page 4]

Dans plusieurs façons nou trouvé couma Bondié intéresse ar nou

[Zimage lor page 7]

Mem bann jeunes zenfants kapav vinn proche ar Bondié

[Zimage lor page 7]

Zordi, Jéhovah aide nou pou enduré. Dans l’heure ki Li’nn fixé, Li pou enlève maladie ek la mort