Reste Équilibré lor Bann Boissons Alcoolique

“Du vin li enn moqueur, l’alcool li enn tapageur, ek si enn kikenn laisse li trompé par sa, li pa pé agir avec sagesse.”—PROVERBES 20:1.

 1. Couma le psalmiste ti exprime so reconnaissance pou certains bon cadeaux ki Jéhovah inn donné?

DISCIPLE Jacques ti écrire: “Tou joli don ek tou cadeau parfait sorti la-haut, parski li sorti kot Papa tou la lumière ki dans le ciel.” (Jacques 1:17) Enn psalmiste ti tellement reconnaissant pou tou bann joli cadeaux ki Bondié inn faire, ki sa ti pousse li pou chanté: “Li faire l’herbe vert poussé pou bann zanimaux, ek bann plantes ki rann service l’humanité, pou ki la terre produire mangé, ek du vin ki faire léker dimoune content, pou faire figure brillé avec de l’huile, ek du pain ki fortifié léker enn dimoune.” (Psaume 104:14, 15) Du vin ek lézot boissons alcoolique, pareil couma bann plantes, du pain ek de l’huile, zot bann bon cadeaux ki Bondié inn donne nous. Couma eski nous bizin servi zot?

 2. Ki questions nous pou examiné lor l’utilisation l’alcool?

² Enn bon cadeau, li utile seulement kan nous servi li couma bizin. Par exemple, du miel, “bon,” mais ‘mange trop beaucoup du miel, pa bon.’ (Proverbes 24:13; 25:27) Pareillement, li enn plaisir pou boire “enn tipé du vin,” mais kan nous boire trop beaucoup, sa li enn problème grave. (1 Timothée 5:23) La Bible averti nous ki “du vin li moqueur, l’alcool li enn tapageur, ek si enn kikenn laisse li trompé par sa, li pa pé agir avec sagesse.” (Proverbes 20:1) Mais couma eski enn kikenn kapav laisse li trompé par l’alcool?a Ki quantité ki trop beaucoup? Ki l’attitude équilibré nous bizin éna dans sa domaine-la?

“Trompé” par l’Alcool—Comment?

3, 4. (a) Couma nous koné ki boire ziska sou, c’est enn kitsoz ki la Bible condamné? (b) Cite dé-trois symptômes ki montré ki enn dimoune inn sou?

³ En Israël, si enn garçon ti bien gourmand ek enn soûlard ki pa’lé repenti, ti bizin lapide li à mort. (Deutéronome 21:18-21) L’apôtre Paul ti donne sa conseil-la bann Chrétiens: “Arrête fréquente enn kikenn ki nous appelle frère, mais ki enn fornicateur, ou enn gourmand, ou enn adorateur zidoles, ou enn kikenn ki insulté lézot, ou enn soûlard ou enn kikenn ki faire fraude, ek pa même mange avec sa qualité dimoune-la.” Oui, li clair ki boire ziska sou, sa li enn kitsoz ki la Bible condamné.—1 Corinthiens 5:11; 6:9, 10.

⁴ La Bible décrire symptômes ki enn soûlard manifesté, li dire: “Pa guette du vin kan li parette bien rouge, kan so gaz pé brillé dans enn coupe, kan li glissé facilement. À la fin, li mordé couma enn serpent, ek li produire poison couma enn vipère. To lizié pou trouve bann kitsoz bizarre, ek to léker pou dire bann mauvais kitsoz.” (Proverbes 23:31-33) Boire trop beaucoup l’alcool, sa ‘mordé’ pareil couma enn serpent ki empoisonne dimoune. Couma? Kan enn kikenn trop boire, li tombe malade, li népli comprend nanyin, ek li kapav même tombe sans connaissance. Enn soûlard kapav trouve “bann kitsoz bizarre” dans sens ki li kapav gagne bann visions ou-soit li mazinn tou sorte qualités kitsoz. Possible aussi ki li népli kapav contrôle li et sa kapav faire li dire bann mauvais kitsoz ek éna bann mauvais désirs ki normalement li ti pou contrôlé.

 5. Ki danger éna kan boire trop beaucoup l’alcool?

⁵ Ki nous kapav dire lor enn kikenn ki prend l’habitude pou boire beaucoup, mais seulement li faire attention pou arrêté avant ki lézot remarqué ki li’nn sou? Éna dimoune ki boire beaucoup, mais pourtant zot presque pa montré okenn signe ki zot inn sou. Si enn kikenn pensé ki, kan li agir coumsa péna okenn danger ladan, li pé trompe li-même. (Jérémie 17:9) Tigit par tigit, li kapav fini par dépann lor l’alcool, ek li kapav vinn “esclave beaucoup du vin.” (Tite 2:3) Pou montré couma enn dimoune vinn enn alcoolique, Caroline Knapp, enn écrivain dire : “Enn dimoune vinn enn alcoolique tigit par tigit, sans ki li rann li compte.” Oui, boire trop beaucoup l’alcool, c’est vrai-même enn piège mortel!

 6. Kifer enn kikenn bizin évite mangé ek boire trop beaucoup?

⁶ Anou examine l’avertissement ki Jésus ti donné: “Faire attention ar zot même pou ki zot léker pa vinn lourd avec enn l’excès mangé ek boire, ek tracas dans la vie; ek ki enn coup sa jour-la vinn vite lor zot couma enn piège. Parski li pou vinn lor tou bann ki pé reste lor la terre.” (Luc 21:34, 35) Li pa nécessaire ki enn dimoune boire ziska li sou pou li vinn lourd ek paresse lor plan physique ek spirituel. Ki pou arrivé si jour Jéhovah vini ek maille li dans sa condition-la?

Boire Trop Beaucoup, Kot Sa Kapav Amené?

 7. Kan enn kikenn boire trop beaucoup l’alcool, kifer sa contre principe ki éna dans 2 Corinthiens 7:1?

⁷ Enn kikenn ki boire trop beaucoup expose li-même ar beaucoup dangers, tant lor plan physique ki spirituel. Li kapav gagne cirrhose lé-foie, l’hépatite alcoolique, ek bann troubles mental couma deleriom. Si li boire trop beaucoup pendant longtemps, li kapav aussi gagne cancer, diabète, ek certain maladies léker ek l’estomac. Li évident ki boire trop beaucoup l’alcool, li contraire avec sa l’ordre ki la Bible donné-la: “Anou enlève tou kitsoz ki sali nou lé-corps ek nou l’esprit pou nous kapav purifié nous, ek pou nous vinn complètement saint avec la crainte pou Bondié.”—2 Corinthiens 7:1.

 8. D’après Proverbes 23:20, 21, ki kapav arrivé kan enn kikenn inn trop boire?

⁸ Enn dimoune ki trop boire gaspille so l’argent, ek li kapav même perdi so travail. Le Roi Salomon, ki ti règne en Israël, ti donne sa l’avertissement-la: “Pa retrouve toi parmi bann grand buveurs du vin ek bann gourmands la-viande.” Kifer li ti dire sa? Guette ki l’explication li ti donné: “Parski enn soûlard ek enn gourmand pou konn la misère, ek si zot lourd ar sommeil, zot pou éna zis linges déchiré pou mette lor zot.”—Proverbes 23:20, 21.

 9. Kifer li sage ki enn kikenn évite boire l’alcool kan li koné li pou bizin conduire?

⁹ Enn encyclopédie lor l’alcool (The Encyclopedia of Alcoholism) koz lor enn l’autre danger, li dire: “Bann l’études inn montré ki l’alcool affecté capacité pou conduire bien, li affecté réflexe enn chauffeur, so concentration, so discernement ek so bon jugement.” Enn grand malheur kapav arrivé kan enn kikenn conduire sous l’influence l’alcool. Chaque l’année, zis en Amérique, bann accidents ki arrivé à cause l’alcool, provoque la mort plusieurs milliers dimoune ek éna plusieurs centaines milliers encore ki blessé. Bann jeunes ki fek gagne licence ek ki péna l’expérience avec l’alcool, zot plus exposé encore ar sa danger-la. Eski enn kikenn ki conduire après ki li’nn boire beaucoup l’alcool, kapav prétann en même temps ki li pé respecté la-vie couma enn cadeau ki Jéhovah inn donne nous? (Psaume 36:9) Étant donné ki la vie sacré, si enn dimoune koné ki li pou bizin conduire, li pou pli bon ki li pa touche l’alcool ditou.

10. Couma l’alcool kapav affecté nou l’esprit, ek kifer sa li dangereux?

¹⁰ Boire trop beaucoup l’alcool faire dimoune di-tort, pa seulement lor plan physique mais aussi lor plan spirituel. La Bible dire: “Du vin ek du vin doux, sa même ki enlève bann bon mobiles.” (Hoshéa 4:11) L’alcool affecté nou l’esprit. Enn brochure ki’nn publié par l’Institut Américain contre la drogue (U.S. National Institute on Drug Abuse), expliqué: “Kan enn kikenn inn boire, sa l’alcool-la rentre dans so di-sang à travers so système digestif ek arrive vite dans so cerveau. Li commence ralenti parties so cerveau ki contrôle so bann pensées ek so bann sentiments. Dimoune-la commence gagne toupet ek li senti li pli libre.” Dans sa l’état-la, nous kapav ‘laisse nous trompé’ pli facilement, nous kapav éna enn comportement déplacé envers lézot, ek nous kapav expose nous ar beaucoup tentations.—Proverbes 20:1.

11, 12. Ki di-tort lor plan spirituel sa kapav faire kan enn kikenn abuse l’alcool?

¹¹ En plus, la Bible donne sa l’ordre-la: “Kan zot pé mangé, kan zot pé boire ou-soit n’importe ki zot pé faire, faire tou kitsoz pou la gloire Bondié.” (1 Corinthiens 10:31) Kan nous consomme beaucoup l’alcool, eski nous kapav dire ki nous pé donne Bondié la gloire? Enn Chrétien pou certainement faire tou pou évite gagne réputation ki li enn grand buveur. Enn réputation coumsa pou faire dimoune koz en mal lor nom Jéhovah au lieu ki sa glorifié so nom.

¹² Ki pou arrivé si enn Chrétien boire sans li contrôle li ek sa faire enn l’autre Chrétien, kitfois enn nouveau disciple, tombé spirituellement? (Romains 14:21) Jésus ti donne sa l’avertissement-la: “Si kikenn faire enn sa bann tipti ki finn éna la foi en moi-la, tombé, li ti pou préférable pou li, ki attache enn la-meule ki bann bouriques tourné pou craze céréales, autour so li-cou ek coule li dans la mer.” (Matthieu 18:6) Enn kikenn kapav aussi perdi so bann privilèges dans congrégation si li abuse l’alcool. (1 Timothée 3:1-3, 8) En plus, fodé pa nous blié, ki kan enn kikenn abuse l’alcool, sa kapav aussi cause di-tort dans la famille.

Comment Évite Bann Dangers?

13. Ki kitsoz bien important ki pou aide nous évite abuse l’alcool?

¹³ Enn kitsoz bien important ki pou aide nous évite abuse l’alcool, c’est kan nous konn faire la différence pa zis entre boire trop beaucoup ek boire ziska sou, mais plutôt faire la différence entre boire zis ek boire trop beaucoup. Mais kisannla ki kapav décidé si nous pé boire zis ou si nous pé boire trop beaucoup? Étant donné ki éna beaucoup kitsoz ki impliqué, pa kapav fixé okenn règle précis pou dire ki quantité l’alcool ki trop beaucoup. Sakenn bizin konn so limite dans sa domaine-la, ek respecté sa limite-la. Ki pou aide ou décidé ki quantité l’alcool trop beaucoup pou ou? Eski éna enn principe ki kapav guide ou?

14. Ki principe kapav guide ou pou faire la différence entre boire zis ek boire trop beaucoup?

¹⁴ La Bible dire: “Préserve la sagesse pratique ek capacité pou réfléchi, ek sa bann kitsoz-la pou représente la vie pou to nâme ek enn charme pou to la-gorge.” (Proverbes 3:21, 22) Donc, enn principe ki kapav guide ou c’est: Si enn certaine quantité l’alcool fausse ou jugement ek empêche ou réfléchi clairement, sa veut dire ki sa quantité-la trop beaucoup pou ou personnellement. Mais ou bizin honnête envers ou-même ek reconnaite kot ou limite personnel été!

15. Kan eski nous kapav dire ki même zis enn verre l’alcool, li trop beaucoup?

¹⁵ Dans certains situations, même enn verre kapav trop beaucoup. Enn femme enceinte kapav décidé pou pa boire ditou à cause danger ki l’alcool représenté pou so ti-baba. Aussi, nous pou montré considération si nous évite boire devant enn kikenn ki finn déjà gagne problème l’alcool, ou-soit enn kikenn ki so conscience pa permette li boire l’alcool? Jéhovah ti donne sa l’ordre-la bann prêtres ki ti servi dans tabernacle: “Pa boire du vin, ni okenn boisson alcoolique . . . kan zot rentre dans la tente réunion, pou ki zot pa mort.” (Lévitique 10:8, 9) Donc, évité boire l’alcool zis avant ou al réunion, kan ou sorti dans prédication, ek kan ou bizin occupe lézot responsabilités spirituel. En plus, dans enn pays kot pa gagne droit boire, ou-soit ki interdit l’alcool ziska enn certaine l’âge, nous bizin obéir la loi sa pays-la.—Romains 13:1.

16. Couma ou pou décidé séki ou pou faire kan offer ou enn boisson alcoolique?

¹⁶ Kan offer ou enn boisson alcoolique, premier question ki ou bizin posé c’est: ‘Eski li bon ki mo boire asterla?’ Si ou décide pou boire, rappelle bien ki ou limite personnel été, ek pa dépasse sa limite-la. Peut-être sa kikenn ki’nn invite ou-la, li bien généreux, mais pa laisse li influence ou. Faire attention aussi dans bann situations kot ou kapav boire quantité ki ou envie, sans payé, couma par exemple dans bann mariages. Dans beaucoup pays, la loi permette bann zenfants boire l’alcool. C’est responsabilité bann parents pou instruire zot zenfants concernant l’usage bann boissons alcoolique ek pou veille zot dans sa domaine-la.—Proverbes 22:6.

Ou Kapav Faire Face ar Sa Problème-La

17. Ki pou aide ou pou reconnaite si ou éna enn problème l’alcool?

¹⁷ Eski ou éna problème pou contrôle-ou en rapport avec du vin ek lézot boissons alcoolique? Ou kapav sûr enn kitsoz, si ou pé boire à l’excès ek ki sa pé vinn enn péché ki ou pratiqué en secret, tôt ou tard, sa pou éna enn l’effet lor ou. Donc, prend le temps pou examine ou-même honnêtement. Pose ou-même sa bann questions-la: ‘Eski mo pé boire plus ki mo ti habitué? Eski bann la-boissons ki mo pé boire contenir plus l’alcool ki avant? Eski mo boire pou blié mo bann tracas? Eski enn membre mo famille ou-soit enn camarade, finn attire mo l’attention lor sa problème-la? Eski mo l’habitude pou boire finn crée problèmes dans mo famille? Eski mo trouve sa dur si mo pa boire l’alcool pendant enn semaine, enn mois ou plusieurs mois? Eski mo cachiette lézot lor quantité du vin ou lézot boissons alcoolique ki mo habitué boire?’ Ki nous pou faire si nous réponn oui à certains sa bann questions-la? Dans sa cas-la, pa ressemblé sa kikenn ki ‘guette so figure dans la glace, ek ki dé-suite après, blié couma li été.’ (Jacques 1:22-24) Faire séki bizin pou corrige sa défaut-la. Ki ou kapav faire?

18, 19. Couma ou kapav arrête boire trop beaucoup l’alcool?

¹⁸ L’apôtre Paul ti donne sa conseil-la bann Chrétiens: “Pa soûlé ar du vin, éna conduite immoral ladan, mais contigné rempli zot avec l’esprit.” (Éphésiens 5:18) Décidé ki quantité l’alcool trop beaucoup pou ou ek fixé bann limites ki bizin. Prend détermination pou pa dépasse zot; contrôle ou. (Galates 5:22, 23) Eski ou éna bann camarades ki faire pression lor ou pou boire plus ki bizin? Faire attention. La Bible dire: “Celui ki marche avec bann dimoune sage pou vinn sage, mais celui ki pé gagne zaffaire avec bann dimoune stupide, sa pou fini mal pou li.”—Proverbes 13:20.

¹⁹ Au lieu ki ou boire pou blié ou problème, faire face ar problème-la couma bizin. Nous kapav faire face ar bann problèmes kan nous applique conseils ki trouve dans Parole Bondié. (Psaume 119:105) Pa hésité pou rode l’aide enn ancien ar ki ou éna confiance. Utilise bien bann dispositions ki Jéhovah inn prend pou fortifié ou spiritualité. Vinn pli proche avec Bondié. Prié Li régulièrement, surtout concernant ou bann faiblesses. Supplie Bondié pou ‘purifié ou lé-reins ek ou léker.’ (Psaume 26:2) Couma ti examiné dans l’article avant, faire tou ou possible pou marche dans l’intégrité.

20. Ki peut-être ou pou bizin faire si ou problème la boisson pé contigné?

²⁰ Ki ou pou faire si ou problème la boisson contigné malgré tou bann zefforts ki ou pé faire? Lerla ou pou bizin suive conseil ki Jésus ti donné, li ti dire: “Si jamais to la-main faire toi tombé, coupe li jeté, vaut mieux ki to gagne la vie, même avec enn seul la main, ki to garde to deux la-mains mais bizin jette toi dans la Géhenne.” (Marc 9:43) Donc la réponse c’est: Arrête touche l’alcool. C’est sa ki enn madame ki nous pou appelle Irène ti décidé pou faire. Li ti dire: “Mo finn réussi arrête boire pendant presque deux ans et demi, mais parfois mo ti commence pensé ki si mo boire zis enn ti verre, sa pa pou faire moi di-tort, zis pou koné si mo encore kapav tini la boisson. Mais couma mo commence pense coumsa, dé-suite mo koz sa problème-la ar Jéhovah dans la prière. Mo’nn bien décidé ki mo pa pou ré-touche l’alcool dans sa vieux système-la, ek peut-être aussi pa même dans le monde nouveau.” Kan nous pense la vie éternelle ki Jéhovah inn promette nous dans le monde nouveau, arrête boire net, li pa enn trop grand sacrifice pou nous faire.—2 Pierre 3:13.

“Galope enn Façon Ki Ou Réussi Gagne Li”

21, 22. Ki obstacle kapav empêche nous arrive dans bitte dans la course pou la-vie, ek couma nous kapav évite sa?

²¹ L’apôtre Paul compare la vie enn Chrétien couma enn lé course ou-soit enn compétition. Li ti dire: “Eski ou pa koné ki dans enn lé-course, tou coureurs galopé, mais enn seul ki gagne prix? Galope enn façon ki ou réussi gagne li. En plus, tou dimoune ki participe dans enn compétition, bizin konn contrôle li dans tou kitsoz. Mais bannla bien sûr, zot pé faire sa pou gagne enn couronne ki kapav détruire, mais nous, pou gagne enn couronne ki jamais pa pou détruire. Donc, mo pa pé galope bonavini; manière mo pé dirige mo bann coups, li pa coumadire mo pé batte l’air; mais mo donne mo lé-corps coups de poing, ek mo amène li couma enn esclave, afin ki kan mo’nn fini prêche avec lézot, mo pa vinn couma enn dimoune ki’nn disqualifié.”—1 Corinthiens 9:24-27.

²² C’est seulement bann ki’nn réussi termine lé-course ki gagne prix. Dans la course pou la vie, si nous abuse l’alcool, sa kapav empêche nous arrive dans bitte. Nous bizin konn contrôle nous. Pou nous galopé sans obstacles, fodé pa nous consomme “trop beaucoup du vin.” (1 Pierre 4:3) Au contraire, nous bizin konn contrôle nous dans tou kitsoz. Kan sa concerne bann boissons alcoolique, li pou sage ki nous “rejette bann kitsoz ki Bondié pa content ek bann désirs sa lé-monde-la, ek vive avec bon jugement ek justice ek l’attachement avec Bondié.”—Tite 2:12.

[Note]

Eski Ou Rappelle?

• Ki sa veut dire abuse l’alcool?

• Ki di-tort sa faire kan boire trop beaucoup l’alcool?

• Couma ou kapav évite bann dangers ki éna kan boire trop beaucoup?

• Si enn kikenn éna problème l’alcool, couma li kapav réglé sa?

[Zimage lor page 29]

Décidé bien en avance kan nous pou arrêté

[Zimage lor page 30]

Prié Jéhovah régulièrement concernant ou bann faiblesses