Kan nou rod la justice, sa pou protege nou

“Avant tou kitsoz, contigne rod . . . justice [Bondié].”—MATTHIEU 6:33.

1, 2. Ki decision enn jeune chrétienne ti prend, ek kifer li ti prend sa decision-la?

D AN enn pays en Asie, enn jeune chrétienne ti pé travail couma secretaire dan enn bureau municipalité. Li ti bien serieux dan so travail, li ti rente a l’heure ek li pa ti paresse. Pourtant, parski li pa ti encore confirmé dan sa travail-la, ti arrive enn moment kot so patron finn ré-guette so situation. Chef so departement ti dire li ki li pou employe li ek pou mem donne li enn pli bon travail, a condition ki li accepté pou gagne bann relation sexuel avek li. Bien-sur, soeur-la finn refusé dan enn fason categorik, mem si li ti riské perdi so travail.

² Eski sa jeune chrétienne-la ti raisonnable? Oui, li ti faire tou pou suive conseil ki Jésus ti donné: “Avant tou kitsoz, contigne rod . . . justice [Bondié].” (Matthieu 6:33) Pou li, li ti beaucoup pli important pou respecté bann principe droite, ki pou gagne bann l’avantage, surtout si li ti pou bizin commette l’immoralité sexuel pou gagne sa.—1 Corinthiens 6:18.

L’importance la justice

 3. Ki été la justice?

³ “La justice” implik reste fidel ar bann principe moral ek reste honnete. Dan la Bible, en hébreu ek en grec, sa mot-la vedir “seki droite.” Vrai justice, li pa enn justice ki basé lor nou prop jugement. (Luc 16:15) C’est plutot enn justice ki basé lor bann principe Jéhovah. C’est justice Bondié.—Romains 1:17; 3:21.

 4. Kifer la justice li important pou enn chrétien?

⁴ Kifer la justice, li important? Parski Jéhovah, Li enn “Bondié ki juste,” ek Li donne so faveur so bann serviteur kan zot pratik la justice. (Psaume 4:1; Proverbes 2:20- 22; Habaqouq 1:13) Kikenn ki pa pratik la justice pa kapav ena bann bon relation avek Li. (Proverbes 15:8) C’est a cause sa ki l’apotre Paul ti donne Timothée sa conseil-la: “Rejette bann desir la jeunesse, mais contigne rod la justice,” avek bann lezot qualité bien important. (2 Timothée 2:22) C’est a cause sa aussi ki li ti mentionne “cuirasse la justice” parmi bann different partie ki ena dan nou l’equipement spirituel.—Éphésiens 6:14.

 5. Couma bann dimoune imparfait kapav rod la justice?

⁵ Bien-sur, okenn dimoune pa juste dan enn fason parfait. Parski nou tou nou bann descendant Adam, nou tou nou imparfait, nou faire peché ek nou injuste depuis nou naissance. Pourtant, Jésus ti dire ki nou bizin rod la justice. Eski li possible? Jésus finn donne so la-vie parfait en ranson pou nou, ek si nou ena la foi dan so sacrifice, Jéhovah disposé pou pardonne nou bann peché. (Matthieu 20:28; Jean 3:16; Romains 5:8, 9, 12, 18) Grace a sa, Jéhovah accepté nou l’adoration, mais nou bizin aussi aprann so bann principe ki juste, ek faire tou nou possible pou suive zot, ek aussi nou prié pou Li aide nou pou surmonte nou bann faiblesse. (Psaume 1:6; Romains 7:19-25; Révélation 7:9, 14) C’est vrai-mem encourageant!

Bann dimoune juste dan enn lé-monde injuste

 6. Kifer le monde ti enn place dangereux pou bann premier chrétien?

⁶ Jésus ti donne so bann disciple mission pou vinn so bann temoin dan “region pli loin lor la terre.” Sa pa ti facile pou zot. (Actes 1:8) Tou zot territoire ti “dan pouvoir Satan.” (1 Jean 5:19) Le monde ti contaminé par so mauvais l’influence, ek bann chrétien ti pou exposé ar sa mauvais l’influence-la. (Éphésiens 2:2) Pou zot, le monde ti enn place dangereux. C’est seulement kan zot ti rod la justice Bondié avant tou, ki zot ti pou kapav enduré ek garde zot fidelité. La plupart ti reste fidel, mais ti ena dé-trois ki ti quitte “chemin la justice.”—Proverbes 12:28; 2 Timothée 4:10.

 7. A cause ki responsabilité enn chrétien bizin resisté kont mauvais l’influence ki ena dan le monde?

⁷ Eski le monde pli sur zordi pou bann chrétien? Non! Dan le monde zordi, ena encore plus corruption ki dan premier siecle. En plus, Jésus finn jette Satan lor la terre, ek li pé faire enn grand la-guerre kont bann chrétien oint, “le reste . . . descendance [la femme], ki pé suive bann commandement Bondié ek ki ena sa travail-la: rann temoignage lor Jésus.” (Révélation 12:12, 17) Satan pé aussi attak tou bann ki soutenir sa ‘descendance-la.’ Pourtant, bann chrétien pa kapav sorti dan le monde. Mem si zot pa faire partie dan le monde, zot bizin reste ladan. (Jean 17:15, 16) En plus zot bizin preche ar bann dimoune dan le monde ek rod bann ki bien interessé, ek enseigne zot pou vinn bann disciple Jésus Christ. (Matthieu 24:14; 28:19, 20) Alors, parski bann chrétien pa kapav evite tou mauvais l’influence ki ena autour zot, zot bizin faire tou pou resisté kont sa l’influence-la. Anou guette quatre mauvais l’influence ki ena dan le monde.

Piege l’immoralité sexuel

 8. Kifer bann Israélite ti commence adore bondié bann Moabite?

⁸ Vers la fin 40 an ki bann Israélite ti passe dan desert, ti ena beaucoup ki ti detourne-zot ar “chemin la justice.” Zot ti’nn trouvé couma Jéhovah ti’nn delivré zot plusieurs fois, ek zot ti pré pou rente dan la Terre promise. Pourtant, dan sa moment critik-la, zot ti commence servi bann bondié ki bann Moabite ti adoré. Kifer? Parski zot ti laisse-zot tenté par bann “desir la chair.” (1 Jean 2:16) La Bible dire: “Le peuple finn commence ena bann relation immoral avek bann tifi Moab.”—Nombres 25:1.

9, 10. Ki situation ena zordi ki montré ki li bien important pou pa blié mauvais l’influence ki bann desir la chair kapav ena lor nou?

⁹ Sa l’evenement-la montré couma bann mauvais desir kapav amenn bann ki pa reste lor zot garde, pou faire peché. Li bon ki nou tire enn leson ar sa, surtout ki zordi, partout dimoune considere l’immoralité sexuel couma enn kitsoz normal. (1 Corinthiens 10:6, 8) Enn rapport ki sorti l’Amérique dire: “Avant 1970, vive ensam avant mariage, ti enn kitsoz illegal dan tou bann l’etat en Amérique. Zordi sa inn vinn enn kitsoz normal. Plus ki 50% bann dimoune ki marié pou premier fois, finn vive ensam avant zot mariage.” Pa zis dan enn sel pays ki ena sa pratik-la ek bann lezot pratik immoral encore, mais dan le monde entier. Malheureusement, certain chrétien finn suive sa tendance-la—zot inn mem perdi zot place dan congregation chrétienne.—1 Corinthiens 5:11.

¹⁰ En plus zordi, partout ena l’encouragement pou commette l’immoralité sexuel. Bann film ki joué dan cinema ek bann program television montré ki li acceptable ki bann jeune gagne relation sexuel avant mariage. L’homosexualité consideré par beaucoup couma enn kitsoz normal, ek beaucoup program montré bann scene sex cri-cri. Li facile aussi pou bann dimoune guette bann scene sex lor Internet. Par exemple, enn journaliste raconté couma enn jour, kan so ti-garson sept an ti sorti lekol, li ti bien excité ek li ti vinn raconte so papa ki enn so bann camarade ti’nn trouve enn site Internet ki montré bann madame touni pé commette bann pratik sexuel immoral. Papa-la ti gagne choque, mais comié zenfant finn passe par sa situation-la, sans ki zot dire zot parent? En plus, comié parent koné ki ena dan bann video game ki zot bann zenfant joué? Dan beaucoup video game ki bien populaire, ena bann scene l’immoralité sexuel, spiritisme ek violence.

11. Couma enn famille kapav protegé kont l’immoralité ki ena dan le monde?

¹¹ Couma enn famille kapav resisté kont sa bann “divertissement” malprop-la? C’est kan zot rod avant tou la justice Bondié ek zot pa laisse okenn kitsoz immoral rente dan zot la-vie. (2 Corinthiens 6:14; Éphésiens 5:3) Bann parent bizin veille bien lor bann l’activité zot zenfant, ek enseigne zot pou ena l’amour pou Jéhovah ek pou so bann la-loi. Kan zot enseigne zot zenfant coumsa, bannla pou ena la force pou rejette pornographie, bann video game kot ena pornographie, bann film immoral ek tou lezot tentation ki pa bon.—Deutéronome 6:4-9.a

L’influence lezot kapav vinn enn danger

12. Ki problem ti ena dan premier siecle?

¹² Kan Paul ti dan la ville Lystres, dan l’ouest l’Asie, li ti faire enn mirak pou gueri enn missié. La Bible dire: “Kan bann la-foule ti trouve seki Paul ti’nn faire, zot ti crié bien fort en lycaonien: ‘Bann bondié finn vinn pareil couma bann dimoune ek zot finn desann parmi nou!’ Ek zot ti commence appel Barnabas, Zeus, mais Paul, Hermès, parski li-mem ki ti pé koz plus.” (Actes 14:11, 12) Plitar, sa bann mem la-foule-la ti envie touye Paul ek Barnabas. (Actes 14:19) Li clair ki sa bann dimoune-la ti laisse-zot influencé par bann dimoune autour zot. Li parette ki, kan certain dan sa l’endroit-la ti vinn chrétien, zot ti encore ena bann tendance pou croire dan superstition. Nou konn sa parski dan lettre ki Paul ti ecrire bann Colossien, li ti mette zot en garde kont “l’adoration bann ange.”—Colossiens 2:18.

13. Cite certain pratik ki enn chrétien bizin rejeté, ek couma li kapav gagne la force pou faire sa?

¹³ Zordi aussi, bann chrétien bizin rejette bann coutume populaire ki basé lor la fausse religion ek ki pa en accord avek bann principe biblik. Par exemple, dan certain pays, kan ena enn naissance ou-soit enn la-mort, beaucoup dimoune faire bann ceremonie ki basé lor enn fausse croyance: zot croire ki, kan enn dimoune mort, ena enn l’esprit ki quitte so lekor ek ki contigne vive apré. (Ecclésiaste 9:5, 10) Dan certain pays, dimoune ena enn coutume pou faire circoncision avek zot bann jeune tifi. Sa c’est enn pratik bien cruel, ki inutile ek ki pa en accord avek l’amour ki bann parent chrétien bizin ena pou zot zenfant. (Deutéronome 6:6, 7; Éphésiens 6:4) Couma bann chrétien kapav pa laisse-zot influencé par dimoune autour zot, ek abandonne bann pratik coumsa? C’est kan zot mette tou zot confiance en Jéhovah. (Psaume 31:6) Bondié pou donne la force ek Li pou protege bann dimoune droite ki dire Li avek tou zot leker: “To-mem mo refuge ek mo forteresse, mo Bondié en ki mo pou mette mo confiance.”—Psaume 91:2; Proverbes 29:25.

Pa blié Jéhovah

14. Ki l’avertissement Jéhovah ti donne bann Israélite enn tipé avant ki zot rente dan la Terre promise?

¹⁴ Enn tipé avant ki bann Israélite ti rente dan la Terre promise, Jéhovah ti mette zot en garde pou zot pa blié Li. Li ti dire zot: “Faire attention ki to pa blié Jéhovah to Bondié, ek ki lerla to arrete suive so bann commandement ek so bann jugement ek so bann la-loi ki mo pé donne toi l’ordre pou suive zordi; pangar kan to mangé ziska to leker content, to range bann bon lakaz ek to reste ladan, tou to bann troupeau augmenté, to gagne beaucoup l’argent ek l’or, ek tou seki to ena augmenté; lerla to leker kapav commence vinn vantard ek vrai-mem to blié Jéhovah to Bondié.”—Deutéronome 8:11-14.

15. Couma nou kapav sur ki nou pa pé blié Jéhovah?

¹⁵ Eski enn kitsoz coumsa kapav arrive nou zordi? Oui, si nou pa fixé bann bon priorité dan nou la-vie. Mais, si nou rod avant tou la justice Bondié, so l’adoration ki pur pou passe avant tou dan nou la-vie. Lerla, couma Paul ti encourage nou, nou pou “ré-acheté le temps favorable” ek nou pou accompli nou ministere sans ki nou blié ki pa reste beaucoup lé-temps. (Colossiens 4:5; 2 Timothée 4:2) Mais, si pou nou, assisté reunion ek sorti predication zot moins important ki la detente ek bann l’amusement, nou kapav blié Jéhovah, setadir nou mette Li dan deuxieme place dan nou la-vie. Paul ti dire ki dan dernier jour, bann dimoune pou “pli content plaisir ki Bondié.” (2 Timothée 3:4) Bann chrétien sincere examine zot-mem regulierement ek faire tou seki zot kapav pou ki enn l’attitude coumsa pa influence zot.—2 Corinthiens 13:5.

Faire attention ar l’esprit l’independance

16. Ki mauvais l’attitude Ève ek certain chrétien dan lepok Paul, ti manifesté?

¹⁶ En Éden, Satan ti reussi tente Ève parski li ti koné ki Ève ti ena enn desir egoïste pou vinn independant. Ève ti envie decidé par li-mem seki bon ek seki mauvais. (Genèse 3:1-6) Dan premier siecle, certain membre congregation Corinthe ti manifesté, zot aussi, enn l’esprit l’independance. Zot ti croire ki zot konn plus ki Paul, ek Paul, ti appel zot bann soi-disant super-apotre.—2 Corinthiens 11:3-5; 1 Timothée 6:3-5.

17. Couma eski nou kapav evité developpe enn l’esprit independance?

¹⁷ Zordi dan le monde, beaucoup dimoune zot ‘la-tête dur, zot rempli ar l’orgueil,’ ek certain chrétien finn laisse-zot influencé par sa l’attitude-la. Certain finn commence oppose-zot ar la verité. (2 Timothée 3:4; Philippiens 3:18) Concernant nou l’adoration, li bien important ki nou laisse Jéhovah guide nou ek ki nou coopere avek “l’esclave fidel et avisé” ek avek bann ancien dan congregation. C’est enn fason ki nou kapav rod la justice, ek sa protege nou kont l’esprit l’independance. (Matthieu 24:45-47; Psaume 25:9, 10; Isaïe 30:21) Bann chrétien oint, zot “enn colonne ek enn support pou la verité.” Jéhovah finn etabli zot pou protege nou ek pou guide nou. (1 Timothée 3:15) Kan nou accepté role important ki zot ena, sa pou aide nou pou pa ‘faire nanyin pou mette nou-mem en avant,’ mais plutot, nou pou soumette avek humilité ar volonté Jéhovah.—Philippiens 2:2-4; Proverbes 3:4-6.

Imite Jésus

18. Dan ki fason eski nou encouragé pou imite Jésus?

¹⁸ La Bible ti annonce sa prophetie-la concernant Jésus: “To finn content la justice ek to ena la haine pou seki mauvais.” (Psaume 45:7; Hébreux 1:9) C’est vrai-mem enn bon l’attitude ki nou bizin imité! (1 Corinthiens 11:1) Jésus pa ti zis konn bann principe juste Jéhovah; li ti content zot. C’est a cause sa ki, kan Satan ti tente Jésus dan desert, avek fermeté ek dan enn fason categorik, Jésus ti refuse pou detourne-li ar “chemin la justice.”—Proverbes 8:20; Matthieu 4:3-11.

19, 20. Ki bienfait nou gagné kan nou rod la justice?

¹⁹ Li vrai ki bann mauvais desir la chair, zot kapav bien fort. (Romains 7:19, 20) Mais, si la justice ena valeur pou nou, nou pou ena la force pou resisté kont seki mauvais. (Psaume 119:165) Si nou ena enn grand l’amour pou la justice, sa pou protege nou kan nou tenté pou faire le mal. (Proverbes 4:4-6) Pa blié ki, a chaque fois ki nou tombe dan tentation, nou pé donne Satan enn victoire. Eski li pa beaucoup pli bon pou resisté kont li, ek donne Jéhovah sa victoire-la?—Proverbes 27:11; Jacques 4:7, 8.

²⁰ Parski bann chrétien rod la justice, zot “rempli avek fruit la justice, ki nou produire grace a Jésus Christ, pou la gloire Bondié ek pou loué Li.” (Philippiens 1:10, 11) Zot “mette lor zot la nouvelle personnalité ki finn crée dapré volonté Bondié, dan enn justice ek enn fidelité ki vrai.” (Éphésiens 4:24) Zot pou Jéhovah ek zot vive pou servi Li, pa pou faire zot-mem plaisir. (Romains 14:8; 1 Pierre 4:2) C’est sa l’attitude-la ki guide zot pensé ek zot action. Zot faire leker zot Papa ki dan le ciel, vrai-mem content!—Proverbes 23:24.

[Note]

Eski ou kapav expliké?

• Kifer li bien important ki nou rod la justice?

• Couma enn chrétien kapav rod la justice malgré ki li imparfait?

• Ki bann kitsoz dan le monde enn chrétien bizin rejeté?

• Couma nou protege nou-mem kan nou rod la justice?

[Zimage, page 28]

Pou bann disciple Jésus, le monde ti enn place dangereux

[Zimage, page 29]

Bann zenfant ki’nn aprann pou content Jéhovah, pou ena la force pou rejette l’immoralité sexuel

[Zimage, page 30]

Kan certain Israélite ti’nn prosperé dan la Terre promise, zot ti blié Jéhovah

[Zimage, page 31]

Pareil couma Jésus, bann chrétien ena la haine pou l’injustice