“Mo avek zot”

“Messager Jéhovah ti dire . . . : ‘“Mo avek zot,” c’est sa ki Jéhovah dire.’”—HAGGAÏ 1:13.

 1. Ki prophetie parallel en rapport avek nou lepok, Jésus ti mentionné?

Nou pé vive enn lepok bien important dan l’Histoire. Bann prophetie la Bible ki pé realisé montré nou ki depuis 1914, nou pé vive dan “jour du Seigneur.” (Révélation 1:10) Kitfois ou finn deja etudié seki la Bible dire lor sa sujet-la, alors ou koné ki Jésus ti dire ki “lepok [kan] Fils de l’homme” pou gagne pouvoir dan so Royaume, pou pareil couma “lepok Noé” ek “lepok Lot.” (Luc 17:26, 28) Nou appel sa enn prophetie parallel, setadir nou kapav compare bann evenement ki ti arrivé dan lepok Noé ek Lot, ar seki pé passé dan nou lepok. Seulement, ena enn lot parallel ki nou bizin prend compte.

 2. Ki mission Jéhovah ti donne Haggaï ek Zekaria?

² Anou examine situation ki ti existé dan lepok bann prophete hébreux, Haggaï ek Zekaria. Ki message sa deux prophete fidel-la ti annoncé ki applik aussi ar peuple Bondié dan nou lepok? Haggaï ek Zekaria ti bann “messager Jéhovah” pou bann Juif apré ki zot ti sorti Babylone, kot zot ti en exil. Zot ti bizin rassure bann Israélite ki Jéhovah ti pou soutenir zot pou reconstruire so temple. (Haggaï 1:13; Zekaria 4:8, 9) Mem si Haggaï ek Zekaria finn ecrire bann livre assez courte, zot livre forme partie dan ‘tou l’Écriture ki finn inspiré par Bondié ek ki utile pou enseigné, pou corrigé, pou mette bann kitsoz en ordre, pou discipliné dan la justice.’—2 Timothée 3:16.

Nou bizin prend compte zot prophetie

3, 4. Kifer nou bizin interessé ar prophetie Haggaï ek Zekaria?

³ Bann message ki Haggaï ek Zekaria ti ecrire, ti bien utile pou bann Juif ki ti vive dan sa lepok-la. Bann prophetie ki zot ti annoncé ti realisé. Mais kifer nou kapav sur ki sa deux livre-la concerne aussi bann chrétien dan nou lepok? Nou gagne enn reponse dan Hébreux 12:26-29, kot l’apotre Paul ti cite Haggaï 2:6. Sa verset-la dire ki Bondié “pé sakouye le ciel ek la terre.” Finalement sa pou “renverse bann trone ki ena dan bann royaume,” ek sa pou “detruire la force bann royaume tou bann nation.”—Haggaï 2:22.

⁴ Kan Paul cite Haggaï, li dire seki pou arrive “bann royaume tou bann nation.” Li montré ki pli grand Royaume ki ena ek ki personne pa pou kapav detruire, c’est Royaume ki bann chrétien oint pou gagné. (Hébreux 12:28) Sa faire nou comprend ki prophetie Haggaï ek Zekaria ti concerne enn lepok ki pa ti encore arrivé kan livre Hébreux ti ecrire dan premier siecle nou lepok. Zordi, ena encore enn reste chrétien oint lor la terre, ki pou herite Royaume messianik ensam avek Jésus. Sa vedir ki prophetie Haggaï ek Zekaria ena enn signification pou nou lepok.

5, 6. Ki ti arrivé avant ki Haggaï ek Zekaria ti commence prophetisé?

⁵ Livre Ezra koz lor seki ti arrivé zis avant ki Haggaï ek Zekaria ti prophetisé. Apré ki bann Juif ti sorti en exil dan Babylone en 537 a.n.l., gouverneur Zorobabel ek grand pretre Yoshoua (ou Yéshoua) ti dirige bann travail fondation ki ti faire pou nouveau temple, en 536 a.n.l. (Ezra 3:8-13; 5:1) Sa travail-la ti faire bann Juif bien content, mais enn tipé apré, zot ti commence peur. Kifer? Ezra 4:4 dire ki bann l’ennemi, setadir “bann dimoune ki ti pé reste dan sa pays-la, pa ti arrete affaibli la main peuple Juda, ek zot ti decourage bannla pou faire travail construction.” Sa bann l’ennemi-la, surtout bann Samaritain, ti faire bann fausse l’accusation kont bann Juif. Zot ti reussi convaink le roi Perse pou faire arrete travail construction temple.—Ezra 4:10-21.

⁶ Sa zèle ki bann Juif ti ena au commencement-la ti diminué. Zot ti commence occupe zot bann zaffaire personnel. Mais, en 520 a.n.l., 16 an apré ki ti pose fondation temple, Jéhovah ti envoye Haggaï ek Zekaria pou pousse le peuple pou reprend travail construction. (Haggaï 1:1; Zekaria 1:1) Bann Juif ti encouragé par sa deux messager Bondié-la ek zot ti trouvé ki Jéhovah ti pé soutenir zot, sa ti pousse zot pou reprend travail construction temple. Zot ti fini sa travail-la en 515 a.n.l.—Ezra 6:14, 15.

 7. Ki comparaison nou kapav faire entre lepok Haggaï ek Zekaria, ek lepok modern?

⁷ Eski ou koné ki signification sa bann evenement-la ena pou nou? Zordi, nou ena enn travail pou faire en rapport avek predication la ‘bonne nouvelle lor Royaume Bondié.’ (Matthieu 24:14) Apré Premier Guerre mondial sa travail-la ti commence prend enn grand l’importance. Pareil couma bann Juif ti delivré dan la ville Babylone, bann serviteur Jéhovah dan lepok modern ti delivré dan Babylone la Grande, l’empire mondial la fausse religion. Bann chrétien oint ti commence preché ek enseigné avek zèle, ek zot ti faire tou pou dirige bann dimoune vers vrai l’adoration. Sa travail-la pé contigné zordi partout lor la terre, kitfois ou-aussi ou pé faire sa. C’est dan nou lepok ki nou bizin faire sa travail-la, parski la fin sa lé-monde mauvais-la bien pré! Sa travail ki Bondié inn donne nou-la bizin contigné ziska ki Jéhovah decidé pou tire tou bann mauvais kitsoz ki pé passé lor la terre. Li pou faire sa kan Li pou amenn la “grande tribulation.” (Matthieu 24:21) Li pou tire la mechanceté, ek lerla partout lor la terre bann dimoune pou kapav adore vrai Bondié.

 8. Kifer nou kapav sur ki Jéhovah pé beni nou travail?

⁸ Bann prophetie Haggaï ek Zekaria montré nou ki Jéhovah soutenir nou ek donne nou so benediction kan nou faire travail ki Li’nn donne nou, avek tou nou leker. Mem si certain dimoune finn essaye faire bann serviteur Bondié disparette, ou-soit interdit zot l’activité, okenn gouvernement pa finn kapav empeche predication la bonne nouvelle progressé. Guette couma Jéhovah finn beni l’activité predication ek finn donne enn grand l’accroissement apré Premier Guerre mondial ziska nou lepok. Mais ena encore enn grand travail pou faire.

 9. Ki situation ki ti arrivé dan le passé nou bizin prend compte, ek kifer?

⁹ Couma eski prophetie Haggaï ek Zekaria kapav encourage nou encore plus pou obeir l’ordre pou preché ek pou enseigné? Anou examine dé-trois leson ki nou kapav tiré dan sa deux livre la Bible-la. Par exemple, anou examine certain detail ki ena enn rapport avek travail construction temple ki bann Juif ti bizin faire. Couma nou ti mentionné avant, bann Juif ki ti sorti Babylone pou retourne Jérusalem pa ti perseveré dan zot travail pou construire temple Jéhovah. Zot ti pose fondation, mais apré sa, zot ti ralenti. Ki mauvais l’attitude ti’nn developpé parmi zot? Ek ki leson nou kapav tiré ladan?

Developpe enn bon l’attitude

10. Ki mauvais l’attitude bann Juif ti’nn developpé ek ki resultat sa ti ena?

¹⁰ Bann Juif ki ti retourne Jérusalem ti pé dire: “Le temps pankor vini.” (Haggaï 1:2) Kan zot ti commence construction ek zot ti pose fondation en 536 a.n.l., zot pa ti pé dire ki “le temps pankor vini.” Mais zot ti laisse l’opposition zot bann voisin ek gouvernement, affecté zot. Bann Juif ti commence donne priorité zot prop lakaz ek zot prop confort. Mais Jéhovah ti faire zot reflechi lor difference ki ena entre zot prop lakaz ek so temple. Zot ti’nn mette bann panneau bon di-bois partout dan zot lakaz, mais temple Jéhovah pa ti encore fini. Jéhovah ti demann zot: “Eski c’est enn lepok pou zot reste dan zot lakaz ki bien decoré avek bann panneau di-bois, alors ki sa lakaz-la, li desert?”—Haggaï 1:4.

11. Kifer Jéhovah ti bizin conseil bann Juif dan lepok Haggaï?

¹¹ Oui, priorité bann Juif ti’nn changé. Au lieu ki zot ti donne priorité projet Jéhovah, setadir construction temple, zot ti pé concentré lor zot-mem ek lor zot lakaz. Zot ti neglige travail ki zot ti bizin faire dan temple Jéhovah. Seki Jéhovah ti dire zot dan Haggaï 1:5, ti encourage zot pou ‘fixé zot leker lor zot chemin.’ Jéhovah ti dire zot arrete enn coup ek reflechi lor seki zot ti pé faire ek guetté ki consequence zot ti pé gagné parski zot pa ti pé donne priorité construction temple.

12, 13. Couma Haggaï 1:6 montré nou dan ki situation bann Juif ti été, ek ki sa verset-la vedir?

¹² Nou pa etonné ki a cause zot mauvais priorité, bann Juif pa ti pé gagne benediction Jéhovah. Guetté ki Bondié ti pensé lor la, dan Haggaï 1:6: “Zot inn sème beaucoup la grain, mais zot inn recolté enn tigit mem. Zot mangé, mais pas assez pou plein zot ventre. Zot boire, mais pa assez pou zot sou. Zot mette linge lor zot, mais sa pa chauffe zot; ek kikenn ki pé al travail pou enn dimoune, pé faire sa pou enn sac ki ena trou.”

¹³ Bann Juif ti dan sa pays ki Bondié ti’nn donne zot-la, pourtant pays-la pa ti pé produire couma zot ti envie. Jéhovah pa ti pé beni zot, ek Li ti averti zot ki sa pou arrivé si zot desobeir. (Deutéronome 28:38-48) Sans so soutien, bann Juif ti sème la-grain, mais zot ti recolté enn tigit-mem; pa ti ena assez mangé pou satisfaire zot la-faim. Parski zot pa ti ena benediction Jéhovah, zot pa ti kapav gagne bann linge ki ti chauffe-zot couma bizin. Mem l’argent ki zot ti gagné, ti al coumadir dan enn sac ki rempli ar trou, zot pa ti pé profite sa. Ki sa vedir l’expression: “Zot boire, mais pa ziska sou”? Sa pa vedir ki, kan enn dimoune boire ziska li sou, c’est enn preuve ki li ena benediction Bondié; Bondié condamne enn dimoune ki boire ziska sou. (1 Samuel 25:36; Proverbes 23:29-35) Sa l’expression-la vedir encore enn fois ki Bondié pa ti pé beni bann Juif. Di-vin ki zot ti pou faire, ti pou tigit; li pa ti pou assez pou faire enn dimoune sou. La Bible Maredsous traduire Haggaï 1:6 coumsa: “Zot boire, mais li pa assez pou satisfaire zot la-soif.”

14, 15. Ki leson nou tiré dan Haggaï 1:6?

¹⁴ Leson ki nou bizin tiré dan tousala, pa concerne decoration enn lakaz. Bien avant ki bann Juif ti al en exil dan Babylone, prophete Amos ti faire reproche bann riche ki ti reste en Israël a cause zot “lakaz en ivoire” ek parski zot “ti pé talé lor bann divan en ivoire.” (Amos 3:15; 6:4) Zot bann joli lakaz ek zot bann meuble bien decoré, pa ti reste longtemps. Zot bann l’ennemi ti detruire tou. Pourtant, mem apré ki zot inn passe 70 an en captivité dan Babylone, la plupart parmi bann serviteur Bondié pa ti tire enn leson ar seki finn arrivé. Eski nou, nou pou tire enn leson? Li ti pou bon ki sakenn parmi nou, nou demann nou-mem: ‘Si mo reponn franchement, ki quantité l’importance eski mo donne mo lakaz ek lé-temps ki mo passé pou faire li vinn joli? Eski mo pé pense pou al faire bann grand l’etude pou mo kapav al faire enn bel carriere, mem si sa kapav prend beaucoup l’année, ek ki kapav prend place bann kitsoz spirituel?’—Luc 12:20, 21; 1 Timothée 6:17-19.

¹⁵ Seki nou lire dan Haggaï 1:6, bizin faire nou reflechi ki nou bizin benediction Jéhovah dan nou la-vie. Bann Juif dan le passé pa ti gagne sa benediction-la, ek a cause sa, zot ti bien souffert. Ki nou ena beaucoup kitsoz lor plan materiel, ou-soit enn tigit-mem, si nou pena benediction Jéhovah, nou pou souffert lor plan spirituel. (Matthieu 25:34-40; 2 Corinthiens 9:8-12) Mais couma eski nou kapav gagne sa benediction-la?

Jéhovah aide nou par so l’esprit saint

16-18. Dan le passé, ki signification Zekaria 4:6 ti ena?

¹⁶ Zekaria ti enn lot prophete ki ti vive dan mem lepok ki Haggaï. Li ti faire koné couma Jéhovah ti motive so bann serviteur fidel dan le passé, ek couma Li ti beni zot. Sa montré couma Li pou beni nou aussi. Nou lire: “ ‘Pa par la force bann l’armée, ni par puissance, mais par mo l’esprit,’ c’est seki Jéhovah des armée finn dire.” (Zekaria 4:6) Kitfois ou finn souvent tann sa verset-la. Mais ki signification sa ti ena pou bann Juif dan lepok Haggaï ek Zekaria, ek couma eski sa concerne ou?

¹⁷ Rappel ki bann parole Haggaï ek Zekaria ti ena enn bon l’effet lor bann Juif dan sa lepok-la. Seki sa bann prophete-la ti dire, ti redonne la force bann Juif fidel. Haggaï ti commence prophetisé pendant sixieme mois dan l’année 520 a.n.l. Zekaria ti commencé li, pendant huitieme mois dan mem l’année. (Zekaria 1:1) Couma nou trouvé dan Haggaï 2:18, bann Juif ti recommence travail avek zèle lor fondation temple dan neuvieme mois. Sa vedir ki zot ti bien motivé, zot ti obeir Jéhovah ek zot ti ena confiance ki Li ti pou soutenir zot. Seki nou lire dan Zekaria 4:6 applik ar sa soutien ki Bondié ti donne zot-la.

¹⁸ Kan bann Juif ti retourne dan zot pays en 537 a.n.l., zot pa ti ena okenn l’armée. Pourtant, Jéhovah ti protege zot ek ti guide zot pendant zot voyage kan zot ti sorti Babylone. Apré, so l’esprit ti guide zot kan zot ti commence travail lor construction temple. Enn fois ki zot ti pou recommence travail avek zèle, Jéhovah ti pou soutenir zot par so l’esprit saint.

19. Ki grand l’obstacle l’esprit Bondié ti tiré?

¹⁹ A travers enn serie huit vision, Zekaria ti gagne l’assurance ki Jéhovah ti pou soutenir so peuple. Zot ti pou reussi fini travail construction temple. Quatrieme vision, ki trouve dan chapitre trois, montré ki Satan ti bien opposé ar zeffort ki bann Juif ti faire pou complete temple Jéhovah. (Zekaria 3:1) Satan pa ti pou content pou trouve grand pretre Yoshoua faire so service en faveur peuple Jéhovah, dan enn nouveau temple. Mais mem si Satan ti faire tou pou empeche bann Juif reconstruire temple Bondié, l’esprit Jéhovah ti pou tire bann l’obstacle ek ti pou donne bann Juif la force pou contigne zot travail ziska ki temple fini.

20. Couma eski l’esprit saint ti aide bann Juif pou faire volonté Bondié?

²⁰ Kan certain fonctionnaire gouvernement ti reussi arrete travail construction temple, sa ti couma enn obstacle ki ti ressemblé enn grand montagne. Malgré sa, Jéhovah ti promette ki Li pou retire sa ‘montagne-la’ ek pou faire li vinn enn “terrain plate.” (Zekaria 4:7) Ek Jéhovah ti tini so promesse! Le roi Darius I^er ti faire bann recherche ek li ti decouvert l’ordre ki Cyrus ti donné, ki ti autorise bann Juif pou reconstruire temple Jéhovah. Alors, Darius ti cancel interdiction ki ti ena. Li ti donne permission pou prend l’argent dan tresor le roi ek pou donne sa bann Juif pou paye bann depense ki ti pou faire pou construction. Enn sel coup situation ti changé! Eski l’esprit Bondié ti joué enn role ladan? Oui, bien-sur! Bann Juif ti termine construction temple en 515 a.n.l., dan sixieme l’année règne Darius I^er.—Ezra 6:1, 15.

21. (a) Dan le passé, couma Bondié ti “sakouye tou bann nation,” ek couma bann “kitsoz desirable” inn sorti? (b) Couma sa pé realisé dan nou lepok?

²¹ Dan Haggaï 2:5, Haggaï ti faire bann Juif rappel l’alliance ki Bondié ti faire avek zot kot montagne Sinaï kan sa “montagne-la entier ti pé tremblé beaucoup.” (Exode 19:18) Dan lepok Haggaï ek Zekaria, Jéhovah ti pou faire enn lot qualité tremblement, couma nou trouvé dan verset 6 ek 7, ki’nn ecrire dan enn langage symbolik. Situation dan royaume perse ti pou nepli stable, mais travail construction temple ti pou contigné ziska li fini. Bann non-Juif aussi, “bann kitsoz desirable ki sorti dan tou bann nation,” ti pou finalement donne la gloire Bondié ensam avek bann Juif, dan sa temple-la. Dan nou lepok, nou pé trouve realisation principal sa prophetie-la: Par nou predication, Jéhovah finn ‘sakouye bann nation,’ ek “bann kitsoz desirable ki sorti dan tou bann nation” inn vinn dan l’organisation Bondié pou adore Li ensam avek bann chrétien oint ki encore lor la terre. Oui, zordi bann chrétien oint ek bann membre lezot brebis pé rempli lakaz Jéhovah avek la gloire. Sa bann vrai adorateur-la pé attann avek la foi kan Jéhovah pou “sakouye le ciel ek la terre” dan enn lot sens. Sa pou arrivé kan Li pou renverse bann royaume ki lor la terre ek detruire zot net.—Haggaï 2:22.

22. Couma Jéhovah pé “sakouye” bann nation, ek ki resultat sa ena? Ki pou arrivé encore?

²² Nou konn bien bann bouleversement ki finn ena dan bann different place ki representé par “le ciel, la terre, la mer, ek la terre ferme.” Par exemple, finn jette Satan le Diable ek so bann demon lor la terre. (Révélation 12:7-12) En plus, nou kapav sur ki predication ki bann chrétien oint finn commencé, finn coumadir sakouye sa lé-monde-la. (Révélation 11:18) Malgré sa, “enn grand la-foule” bann kitsoz desirable dan tou bann nation, finn joinde ensam avek Israël spirituel pou servi Jéhovah. (Révélation 7:9, 10) La grande foule travail avek bann chrétien oint pou preche enn bon nouvel ki bientot Bondié pou sakouye bann nation kan Har–Maguédôn pou vini. Sa l’evenement-la pou permette tou dimoune pou pratik vrai l’adoration dan enn fason parfait.

Eski ou rappel?

• Kan ek dan ki condition prophete Haggaï ek Zekaria ti prophetisé?

• Couma eski ou kapav applik message ki Haggaï ek Zekaria ti donné?

• Kifer ou trouve Zekaria 4:6 encourageant?

[Zimage, page 9]

Prophetie Haggaï ek Zekaria rassure nou ki Bondié pé soutenir nou

[Zimage, page 10]

“Eski c’est enn lepok pou zot reste dan zot lakaz ki bien decoré avek bann panneau di-bois, alors ki sa lakaz-la, li desert?”

[Zimage, page 12]

Peuple Jéhovah rod ‘bann kitsoz desirable ki sorti dan bann nation’